Nyonɛ nsaki ka wadielo ndo ka wekelo l’etema w’ananyu

YOHO mɔtshi y’ohomba yakoka ambutshi nsala la wolo dia nɔngɔsɔla nshi yayaye y’anawɔ ele lo mbidja welo dia mbetsha anawɔ dia mbadiaka ndo mbekaka. Ande ɔngɛnɔngɛnɔ wakoka monga l’awui asɔ lee! L’atei w’awui waleka anto amɔtshi mbohɔ mbele ndo woho wakâsalɛka ambutshi awɔ wadielo etena kakiwɔ tɔkɛndakɛnda. Wadielo koka monga dui dia dimɛna oko wakoka monga etombelo w’oma lɔkɔ. Dui sɔ diekɔ ngasɔ djekoleko le ekambi waki Nzambi nɛ dia wekelo wa Bible mbakimanyiyaka dia vɔ ndeka monga la diɔtɔnganelo la Jehowa. Ombutshi ɔmɔtshi w’Okristo mbutaka ɔnɛ: “L’atei w’akambo walekaso mbɔsa la nɛmɔ efula mbele wadielo ndo wekelo.”

Mbetsha ananyu dia vɔ monga la mbekelo y’amɛna koka mbakimanyiya dia vɔ ndeka monga la diɔtɔnganelo dia ma ma la Nzambi. (Osam. 1:1-3, 6) Kânga mbele mbeya mbadia bu dui dialɔmbama di’onto shimbamɛ, Bible kakatanyaka wadielo la ɛtshɔkɔ efula wa lo nyuma. Enyelo 1:3 mbutaka ɔnɛ: “Untu tshe ladia, ndu wane wuka akambu wahatayi ane, la wakitanyia akambu wambufundama loko, weli la otshoko.” Ndo nto, nshikikɛ yimba lo kɛnɛ kekama ekɔ dui di’ohomba efula lo wekelo ndo dui sɔ mɛnyama hwe lo dako diakasambiyama diakasha ɔpɔstɔlɔ Paulo Timɔtɛ ɔnɛ: “Utetemali lu akambu aso; uyakimo l’utema aye tshe loko.” Lande na? “Ne dia uhamelu aye wenami le antu tshe.”—1 Tim. 4:15.

Ekɔ mɛtɛ dia mbeya mbadia la mbeka hɛnya di’onto kokaka nkondja wahɔ oma l’awui asɔ. Anto efula wele l’akoka asɔ hawoleke nkamba la wɔ, koko vɔ mbesaka akambo wele bu ohomba efula. Ngande wakoka ambutshi monɛ l’etema w’anawɔ nsaki ka wekelo?

Ngandji ndo ɛnyɛlɔ kashanyu

Ana mbekaka dia ngɛnangɛna wekelo etena kasalema dikambo sɔ la ngandji. Owen la Claudia, atshukanyi amɔtshi w’Akristo mbohɔka lo dikambo di’anawɔ ahende ɔnɛ: “Vɔ wakakongɛka l’asolo walomɔlomɔ wonya wa wekelo nɛ dia ɔsɔ aki etena ka dimɛna efula kakawakokamɛka ndo kakawayaokaka dimɛna. Vɔ wakɛnaka di’awui asɔ wakasalemaka la ngandji ndo la waasaso.” Kânga etena kahomana ana l’ekakatanu lam’akotshawɔ ɛnɔnyi dikumi l’ɛmɔtshi, wekelo wa lo nkumbo wasalema la ngandji wayotetemala mbakimanyiya. Ana waki Owen la Claudia waya ambatshi mboka kakianɛ ndo wekɔ lo ntetemala nkondja wahɔ oma lo nsaki ka wadielo ndo ka wekelo kakonɛ ambutshi l’etema awɔ.

Dui dikina di’ohomba efula ele ɛnyɛlɔ kasha ambutshi. Ana wɛna woho wadia ndo weka ambutshi awɔ mbala la mbala komaka lo ndjɔsa awui asɔ oko etenyi kɛmɔtshi ka lɔsɛnɔ lawɔ la lushi la lushi. Ko ngande wakoka ambutshi mbisha ɛnyɛlɔ naka vɔamɛ hawɔngɛnangɛna wadielo ndo wekelo? Dui sɔ mbeyaka nɔmba dia ambutshi ntshikitanya awui wetshawɔ lo dihole dia ntondo ndo woho wɔsawɔ wadielo. (Romo 2:21) Naka wadielo wekɔ etenyi k’ohomba efula k’awui wasalanyu lushi la lushi, kete dui sɔ diayonga la shɛngiya ya wolo le ananyu. Etete kanyu djekoleko lo wadielo wa Bible, l’ɔlɔngɔswɛlɔ wa nsanganya ndo lo wekelo wa lo nkumbo ayɛnya ananyu nɛmɔ diele l’awui asɔ le nyu.

Omalɔkɔ, ngandji ndo ɛnyɛlɔ kashanyu ekɔ ohomba efula dia monɛ nsaki ka mbadia l’etema w’ananyu. Ko wanya akɔna shikaa wakokanyu ntakola dia mbakeketsha?

Nyokimanyiya ananyu dia vɔ nanga wadielo

Wanya akɔna w’ohomba wakokanyu ntakola dia nkimanyiya ananyu dia vɔ nanga wadielo? Nyosale dia vɔ mongaka l’abuku oma ko tɔkɛndakɛnda tawɔ. Ekumanyi kɛmɔtshi k’Okristo kele ambutshi ande wakonɛ l’otema ande ngandji ka wadielo mbishaka dako nɛ: “Nyosale dia ananyu mongaka l’abuku ndo mbekesanɛ la wɔ. Lo yoho shɔ, abuku wayoyokoma angɛnyi awɔ ndo etenyi kɛmɔtshi ka lɔsɛnɔ lawɔ.” Abuku walembetshiya Bible wele oko Etshama oma le Ombetsha a Woke ndo Buku di’ɛkɔndɔ wa lo Bible komaka angɛnyi w’eshika le ana edja efula la ntondo ka vɔ mbeya mbadia. Etena kadianyu l’ananyu ekanda wa ngasɔ, nyu hanyowakimanyiya tsho dia vɔ mbeya ntɛkɛta, koko nyu mbakimanyiyaka nto ‘l’awui wa lo nyuma’ ndo dia vɔ nkimɛ ‘ɛtɛkɛta wa lo nyuma.’—1 Kor. 2:13.

Nyâsalɛke wadielo la dui dia wolo mbala la mbala. Nyonge la mbekelo ka mbadiaka la ananyu lushi tshɛ. Nsala dui sɔ mbakimanyiyaka dia vɔ mbeya ntɛkɛta dimɛna ndo mbakimanyiyaka dia vɔ monga la mbekelo ka mbadiaka. Woho wadianyu ekɔ nto ohomba. Nyonge la waasaso ko vɔ lawɔ wayonga la waasaso. Tena dimɔtshi, nyu mbeyaka mɛna di’ananyu wayonyɔlɔmbaka dia mbadia ɔkɔndɔ ɔmɔtshi mbala la mbala. Nyosale kɛnɛ kanyɔlɔmbawɔ! L’edjedja ka wonya, vɔ wayoyoyanga mbeka ɛkɔndɔ ekina. Koko, nyonge la yewo diaha mbatshutshuya la wolo. Yeso akatshike ɛnyɛlɔ ka dimɛna lo mbetsha ampokami ande paka awui “wakaweyi nimbitela.” (Mako 4:33) Naka hanyotshutshuya ananyu la wolo, kete vɔ wayokongɛka l’asolo walomɔlomɔ wonya wa wadielo ndo nyayotakotshaka oyango anyu wa monɛ l’etema awɔ nsaki ka wadielo.

Nyakeketsha dia vɔ mbisha kɔmatɛrɛ ndo nyɔkɛtshanya la wɔ kɛnɛ kadianyu. Ananyu w’akɛnda wayonga esadi eto l’akoka wa mbeya mbishola tɔtɛkɛta, ntɛkɛta dimɛna ndo nshihodia tokitshimudi ta tɔtɛkɛta efula ndo dui sɔ diayonyɔngɛnyangɛnya. Nkɛtshanya l’ananyu kɛnɛ kadianyu kokaka mbakimanyiya efula dia vɔ mpama. Lo ndjela dibuku dimɔtshi dialembetshiya woho wa nkimanyiya ana dia vɔ nkoma ambadi w’eshika, sawo kimanyiyaka ana “dia vɔ mbeka tɔtɛkɛta tayowoyonga la tɔ ohomba l’ɔkɔngɔ dia mboka ndo nshihodia kɛnɛ kadiawɔ.” Diɔ tetemalaka mbuta dia “nsawola awui woleki ohomba ekɔ dimɛna le ana wakimanyiyawɔ dia mbeya mbadia ndo nkoma ambeyi wa mikanda.”

Nyokeketsha ananyu dia vɔ nyadiɛka ndo mboka ambola. Nyu mbeyaka monyiya ambola ndo mbisha ekadimwelo. Lo nsala ngasɔ, ana wayeka dia abuku wekɔ l’awui efula ndo awui wadiawɔ wekɔ la tokitshimudi. Dui sɔ diekɔ ohomba efula djekoleko etena kadianyu Ɔtɛkɛta wa Nzambi wele dibuku dioleki abuku akina tshɛ.—Heb. 4:12.

Koko tanyohɛke pondjo dia wadielo ekɔ dui dia wolo. Dia nkoma ombadi wa dimɛna nɔmbaka etena ndo mbadiaka mbala la mbala.a Ɔnkɔnɛ, nyokeketsha ananyu dia vɔ monga la nsaki ka mbadiaka lo mbawandolaka. Mandolaka ananyu ayowakeketsha dia vɔ nanga wadielo.

Wadielo ekɔ dui dia dimɛna ndo di’ɔngɛnɔngɛnɔ

Mbetsha ananyu woho wa mbeka mbakimanyiyaka dia vɔ mbeya mbadia. Wekelo kɛdikɛdi mbeya awui ndo nshihodia woho wɔtɔnɛwɔ. Vɔ nɔmbaka dia monga la dikoka dia nkongɛ awui, mbohɔ ndo nkamba la awui wekama. Kam’eka ɔna woho wa mbeka ndo ohomba wa mbeka, dui sɔ mongaka dimɛna ndo mboshaka ɔngɛnɔngɛnɔ.—Und. 10:10.

Nyɛnya ɔna awui w’ohomba wa lo wekelo. Ɔtɛmwɛlɔ wa lo nkumbo wa l’akɔlɔ, ɛkɛtshanyelo wa divɛsa dia lushi la lushi ndo tena dikina dia ngasɔ mbishaka waaso woleki tshɛ amɛna w’ana monga l’akoka wa mbeka. Mbidjasɛ ki ndo mbidja yambalo lo dui dimɔtshi diekama ayowakimanyiya dia vɔ nshikikɛ yimba lo kɛnɛ kekama ndo dui sɔ diekɔ ohomba efula lo wekelo. Ɛnyɛlɔ, nyu kokaka nkeketsha ɔnanyu la pami dia nyotɛ woho wɔtɔnɛ awui wekinde la kɛnɛ kokondeyaka. Kɛsɔ mbokimanyiyaka dia nde nsala wɛdikelo. Ko kayotota dia nɔmba ɔnanyu la womoto dia nde mbuta lo tshena pe l’ɛtɛkɛta ande ndamɛ kɛnɛ k’omande la mbadia? Dui sɔ diayowokimanyiya dia nde nshihodia kɛnɛ kekande ndo dia nde kiohɔka. Ovuswelo, mbuta ate kalolɛ awui w’ohomba l’ɔkɔngɔ wa mbadia sawo dimɔtshi, ekɔ dui dikina diakimanyiya dia mbohɔka diakokanyu nkimanyiya ananyu dia vɔ salaka. Nyu kokaka mbetsha ananyu dia vɔ mbɔsaka nɔtɛ ya tomondo wonya wa wekelo kana lo nsanganya ya l’etshumanelo. Dui sɔ diayowakimanyiya mɛtɛ dia vɔ nshikikɛ yimba yawɔ. Awui asɔ mbetɛka wekelo dimɛna le nyu ndo le ananyu.

Nyosale dia wekelo mongaka dimɛna. Dihole dieta hiɛlɛlɛ, diɛnama dimɛna, diele bu londjo ndo mbidjasɛ dimɛna kimanyiyaka di’onto nshikikɛ yimba yande lo wekelo. Ekɔ mɛtɛ dia woho wɔsa ambutshi wekelo ekɔ dui di’ohomba efula. Mama kɛmɔtshi akate ɔnɛ: “Ekɔ ohomba efula tshungolaka etena mbala la mbala dia mbadiaka ndo mbekaka. Dikambo sɔ diayokimanyiya ananyu dia vɔ mbeya woho wa nkongɛ akambo. Vɔ mbekaka dia dui sɔ kana dui dikina pombaka salema lo etena kɛmɔtshi shikaa.” Ambutshi efula mbewɔka dia nsala awui akina lo wenya wa wekelo. Lo ndjela nomb’ewo kɛmɔtshi, dui sɔ diekɔ ohomba efula dia nkimanyiya ana dia vɔ monga la mbekelo y’amɛna ya wekelo.

Nyɛnya ohomba wa wekelo. L’ekomelo, nyokimanyiya ananyu dia vɔ mɛna ɛlɔlɔ waya lo wekelo. Nkamba la kɛnɛ kekanyu ayoleka mbaɛnya ohomba wa mbeka. Ɔnangɛso ɔmɔtshi l’ɔlɔngɔlɔngɔ mbutaka ɔnɛ: “Etena kahamɛnyi ohomba w’akambo watameke, dimi halangɛnangɛna mbeka awui akɔ. Ko naka dimi kokaka nkamba la wɔ lo lɔsɛnɔ lami, kete awui akɔ ndjokomaka awui walangami nshihodia.” Etena kɛna akɛnda dia wekelo ekɔ dui diawakimanyiya dia vɔ nkotsha akambo w’ohomba, vɔ ndjashaka tshɛ lɔkɔ. Vɔ wayotatɛ kongɛ wonya wa wekelo l’asolo walomɔlomɔ oko wakawakongɛka wonya wa wadielo.

Difuto dioleki tshɛ

Ekɔ la wahɔ efula waya oma lo monɛ nsaki ka wekelo l’etema w’ana wahatakoke nshila lo sawo nɛ. Otondoyelo wa la kalasa, wa l’olimu, lo diɔtɔnganelo dia l’anto akina, nshihodia awui wa lo lɔsɛnɔ ndo diɔtɔnganelo dia ma ma lam’asa ambutshi l’ana ekɔ l’atei w’ɛlɔlɔ ɛmɔtshi waya oma lo dikambo sɔ. Sho kokaka nkotsha nto ɔngɛnɔngɛnɔ w’efula waya oma lo wadielo ndo wekelo.

Lâdiko dia tshɛ, ngandji ka wekelo kokaka nkimanyiya ananyu dia vɔ nkoma anto wambotshunda lo nyuma. Ngandji ka wekelo ekɔ dui diakimanyiya efula di’onto mɔmbɔ wɔɔngɔ dia mbeya “wekeki, utali, dungulungu la ohongo” w’akambo wa mɛtɛ wa lo Afundelo. (Ef. 3:18) Ɔnkɔnɛ, ambutshi w’Akristo wekɔ l’akambo efula wa mbetsha anawɔ. Etena katshungola ambutshi wonya, kadjawɔ anawɔ yambalo ndo kasalawɔ tshɛ kakokawɔ nsala dia mbakimanyiya dia vɔ mbola dimɛna, vɔ nongamɛka di’anawɔ wayoyokoma atɛmɔdi wa Jehowa. Mbetsha ananyu dia vɔ monga la mbekelo y’amɛna ya wekelo mbakimanyiyaka dia vɔ monga nge lo nyuma ndo monga la diɔtɔnganelo dia dimɛna vɔ la Nzambi. Lo weho akɔ tshɛ, nyekɔ l’ɛkɔkɔ w’eshika wa nɔmbaka Jehowa dia nde ntshɔkɔla welo wadjanyu dia nyu monɛ nsaki ka wadielo ndo ka wekelo l’etema w’ananyu.—Tuk. 22:6.

[Nɔtɛ ka l’ɛse ka dikatshi]

[Kiombo/Esato wa lo lɛkɛ 26]

Wadielo . . .

• Nyosale dia vɔ mongaka l’abuku

• Nyâsalɛke wadielo la dui dia wolo

• Nyakeketsha dia vɔ mbisha kɔmatɛrɛ

• Nyɔkɛtshanya la wɔ kɛnɛ kadianyu

• Nyokeketsha ananyu dia vɔ nyadiɛka

• Nyokeketsha ananyu dia vɔ mbokaka ambola

Wekelo . . .

• Nyowasha ɛnyɛlɔ k’ɔlɔlɔ

• Nyetsha ananyu dia . . .

○ nshikikɛ yimba lo kɛnɛ kekama

○ salaka wɛdikelo

○ mbuta lo tshena pe

○ salaka ovuswelo

○ mbɔsaka nɔtɛ

• Nyosale dia wekelo mongaka dimɛna

• Nyɛnya ohomba wa wekelo