Ambola w’oma le ambadi
Lande na kakatɛ Yeso womoto ɔmɔtshi lakeyamaka oko otshi wa pɛkato ɔnɛ pɛkato yande yambodimanyiyama?—Luka 7:37, 48.
Etena kakalɛka Yeso mbo ya ndɛ lo luudu laki Ofarisɛ wakawelɛka Simɔna, womoto ɔmɔtshi ‘akadjasɛ l’ɔkɔngɔ ande suke l’ekolo ande.’ Nde akalɔya ekolo waki Yeso l’asɔi ande ndo akâkitola la divo dia l’ɔtɛ ande. Oma lâsɔ, nde akanɔnɛ ekolo ande ndo akawatɛ malashi. Ɔkɔndɔ wa l’Evanjiliɔ mbutaka dia womoto akɔ ‘akeyamaka l’osomba oko otshi wa pɛkato.’ Lo mɛtɛ, onto tshɛ lele kema kokele ekɔ otshi wa pɛkato, koko mbala efula Afundelo kambaka la tshɛkɛta nyɛ dia ntɛkɛta dia onto lele pɛkato yande mbeyamaka le anto efula kana leyama oko otshi wa pɛkato. Ondo womoto ɔsɔ aki kanga numba. Woho w’onto wa ngasɔ mbakatɛ Yeso ate: “Kolo yaye yambundimanyema.” (Luka 7:36-38, 48) Kakɔna kakalange Yeso mbuta? Lam’ele l’etena kɛsɔ ko olambo wa tshungo watafutama, ngande wakakoke womoto ɔsɔ dimanyiyama pɛkato yande?
L’ɔkɔngɔ wa womoto ɔsɔ nsola ekolo waki Yeso ndo mbatɛ malashi ndo la ntondo ka Yeso mbotɛ ɔnɛ pɛkato yayɛ yambodimanyiyama, nde akakambe la wɛɛla ɔmɔtshi dia nembetshiya Simɔna dikambo dimɔtshi di’ohomba. Lo mbɛdika pɛkato la dibasa dia woke diahomba futama, Yeso akatɛ Simɔna ate: “Osondjanyi omotshi aki l’akanga w’abasa andi ahendi: omotshi aki la dibasa dia denariyo kama tshanu la ukina akumi atanu. Lam’akiwo kundjala la engo ka mbufuta, ndi akâdimanyia abasa vo ahendi. Okone l’atei awo, akona ayuleka mbûka lusaka?” Simɔna akôkadimola ate: “Dimi lambukana nti: One lakandadimanyia dibasa diuleki.” Yeso akôkaloya dui ate: “We ambusambula ololo.” (Luka 7:41-43) Sho tshɛ kolama dibasa dia monga l’okitanyiya le Nzambi, koko naka tambohindolɛ ndo tambosala pɛkato, kete tambohekɔ dia mbisha Nzambi kɛnɛ kahombande nongola. Ngasɔ mbatatahatanya abasa lâdiko di’abasa. Koko, Jehowa ekɔ oko ɔsɔndjanyi wetawɔ todimanyiya la lolango lande tshɛ. Diakɔ diele, Yeso akakeketsha ambeki ande dia vɔ nɔmbaka Nzambi ɔnɛ: “Utudimanyia kolo yasu, uku adimanyiyasu wane watutshela kolo.” (Mat. 6:12) Luka 11:4 mɛnyaka dia pɛkato mbele abasa asɔ.
Ɛkɔkɔ akɔna wakatshutshuya Nzambi dia nde dimanyiya pɛkato yakasalaka anto lo nshi yakete? Losembwe lande la kokele lakalɔmbaka dia onto nongola dilanya dia nyɔi l’ɔtɛ wa pɛkato yakandasale. Diakɔ diele, Adama akavu l’ɔtɛ wa pɛkato kakandatshe. Koko, lo ndjela ɛlɛmbɛ wakasha Nzambi wodja w’Isariyɛlɛ, otshi wa pɛkato akakokaka dimanyiyama pɛkato yande naka nde nambola Jehowa nyama. Ɔpɔstɔlɔ Paulo akate ate: “Diango tshe diambediama la dikila, lam’aha ekwelo ka dikila, keti edimanyelu ka kolo kema laawo.” (Heb. 9:22) Ase Juda komonga la yoho kina yakakokaka Nzambi mbadimanyiya pɛkato yawɔ. Ɔnkɔnɛ, kema dui dia diambo dia anto wa lo nshi ya Yeso ntona dia mbetawɔ kɛnɛ kakandatɛ womoto laki otshi wa pɛkato. Wanɛ wakalɛka kâmɛ la Yeso wakatatɛ ndjagunɛngunɛ vɔate: “Akona one adimanyia kolo?” (Luka 7:49) Lâsɔ, ngande wakakoke munga ya womoto ɔsɔ laki otshi wa pɛkato dimanyiyama?
Prɔfɛsiya ka ntondo kakewoya Jehowa l’ɔkɔngɔ w’atshukanyi wa ntondo mbɔtɔmbɔkwɛ kakatɛkɛta dikambo dia sangwelo diaki Nzambi dia ntondja ‘kanula’ yakahombe ndjolumatema l’etshindji oma le Satana ndo oma le ‘tokanula’ tande. (Etat. 3:15) Yeso akalumatema l’etshindji etena kakodiake atunyi waki Nzambi. (Ngal. 3:13, 16) Nzambi ekɔ lo nkamba la dikila dia Kristo diakatshulwama oko tshungo dia ntshungola anto oma lo pɛkato la nyɔi. Lam’ele ndoko ɛngɔ kakoka nshimba Jehowa dia nde nkotsha sangwelo diande, tshungo kakafutama lo washo wa Nzambi kam’akandate ɛtɛkɛta wele lo Etatelu 3:15. Oma k’etena kɛsɔ, nde ekɔ lo dimanyiya wanɛ wele la mbetawɔ l’alaka ande.
La ntondo ka Kristo ndja la nkɛtɛ, Jehowa akɔshi anto efula oko anto w’ɛlɔlɔ. L’atei w’anto asɔ mbaki ndo Ɛnɔka, Nɔa, Abarahama, Rahaba ndo Jɔbɔ. Vɔ wakakongɛka okotshamelo w’alaka waki Nzambi la mbetawɔ tshɛ. Ombeki Jakɔba akafunde ate: “Abarahama aketawo [Nzambi]. Wakawadiya mbetawo kandi uku ololo andi.” Lo dikambo dia Rahaba, Jakɔba akate ate: “Okone ndu Rahaba, kanga munanyi, kunyindjama pupu lu etsha andi?”—Jak. 2:21-25.
Davidi nkumekanga ka l’Isariyɛlɛ w’edjedja akasale pɛkato ya weke efula, koko nde aki la mbetawɔ ka wolo le Nzambi ka mɛtɛ ndo nde akayatshumoya l’otema ɔtɔi mbala yakɔ tshɛ. Ndo nto, Afundelo mbutaka ɔnɛ: ‘Nzambi akakimɔ [Yeso] oko olambo wa ekesanelo lo tshimbo ya mbetawɔ lo dikila diande. Nde akasale ngasɔ dia nde nkɛnɛmɔla losembwe lande, nɛ dia nde akadimanyiyaka pɛkato yakasale anto lo nshi y’edjedja etena kakakɛnɛmɔlaka Nzambi solo dia lotutsha; dia nde nkɛnɛmɔla losembwe lande hita l’etena kɛnɛ, woho wa nde monga kanga losembwe lo nyindja onto lele la mbetawɔ le Yeso.’ (Romo 3:25, 26) Lo nkamba la olambo wa tshungo wakahombe Yeso ndjofuta lo nshi yayaye, Jehowa akadimanyiya Davidi munga kakandasale aha la nsekola ɛlɛmbɛ ande wosembwe.
Mɛnamaka dia ndo womoto lakakite Yeso malashi l’ekolo mbakakondja diɛsɛ dia ngasɔ. Nde akasɛnaka lɔsɛnɔ la mindo, koko nde akayoyatshumoyaka. Nde aketawɔ dia nde ekɔ l’ohomba wa ntshungɔ oma lo pɛkato ndo nde akɛnya oma l’etsha ande dia nde akɔsaka onto lakakambe la Jehowa dia tosha etshungwelo kɛsɔ la nɛmɔ. Koko, kânga mbaki Yeso atafute olambo wa tshungo l’etena kɛsɔ, nde aki l’eshikikelo ɔnɛ vɔ wayofutama woho ɔnɛ wele nde akakambe la nɛmɔ diawɔ lo wahɔ w’anto wele oko womoto ɔsɔ. Ɔnkɔnɛ, Yeso akawotɛ ate: “Kolo yaye yambundimanyema.”
Oko wadiɛnya ɔkɔndɔ ɔnɛ dimɛna, Yeso konyanginyola atshi wa pɛkato, koko nde akâsalɛka akambo w’ɛlɔlɔ. Ndo nto, Jehowa ekɔ suke dia dimanyiya atshi wa pɛkato wayatshumoya. Dui sɔ toshaka sho anto wele kema kokele ekeketshelo ka diambo ndo kananda otema.
[Osato wa lo lɛkɛ 7]
Vɔ wakɔsama oko anto w’ɛlɔlɔ