Wakayakimɔ la lolango dia tokimanyiya la Équateur
ƆLƆNGƆLƆNGƆ ɔmɔtshi w’Okristo wadjasɛ l’Italie welɛwɔ Bruno aki la ntondo ka yɛdikɔ mɔtshi ya mbɔsa. L’ɔkɔngɔ wa nde nshidiya kalasa ya sekɔndɛrɛ la pursa y’efula, ewotɔ ndo embetsha ande wa la kalasa wakôkeketsha dia nde mbɔtɔ kalasa y’adidi. Ɛnɔnyi engana la ntondo ka nde nshidiya kalasa, nde akabatizama ndo akalake Jehowa ɔnɛ layetshaka nshi tshɛ lolango lande lo dihole dia ntondo. Kakɔna kakandasale? Nde mbutaka ate: “Lakalɔmbɛ Jehowa dia nde kimanyiyami dia dimi nkotsha dɔkɔlɔkɔ diakamatshike la ntondo kande. Lakɔlɔmbɛ nto dia nde kimanyiyami dia dimi monga la lɔsɛnɔ lele l’oyango, mbuta ate ndjasha tshɛ lo tshɛ l’olimu ande.”
Ɛnɔnyi engana l’ɔkɔngɔ, Bruno akatshu dia tokimanyiya l’Équateur, lo Amɛrikɛ wa lo sidɛ. Nde mbutaka ate: “Jehowa akakadimola dɔmbɛlɔ diami lo woho wakimi konongamɛka.” Etena kakakome Bruno l’Équateur, aha la nde nongamɛ, nde akatotana ɛlɔngɔlɔngɔ l’esekaseka efula wakônɔ ndo vɔ lawɔ dia tokambɛ Jehowa efula lɛkɔ.
ƐLƆNGƆLƆNGƆ L’ESEKASEKA ‘WAHEMBA JEHOWA’
L’ɛnyɛlɔ kaki Bruno, ɛlɔngɔlɔngɔ l’esekaseka efula w’Akristo wa l’andja w’otondo mbetawɔka leeta laki Jehowa lata ɔnɛ: “Nyumpimbi kakiane, . . . naka dimi halunyudihwela adidishi wa l’ulungu dia nyutshulwela otshoko.” (Mal. 3:10) L’ɔtɛ wa ngandji kokawɔ Jehowa, vɔ ‘mbohembaka’ lo nkamba la wenya, wolo, ndo ekundji awɔ dia nsukɛ olimu wa Diolelo lo ntshɔ dia tokimanyiya lɛnɛ ele ohomba w’efula w’apandjudi wa Diolelo.
Yema tshitshɛ l’ɔkɔngɔ w’ɛlɔngɔlɔngɔ l’esekaseka ɛsɔ nkoma l’Équateur, vɔ wakɛnyi dia “diango dia dinela dieko efula, keli ekambi mbeli tshitshe.” (Mat. 9:37) Ɛnyɛlɔ, kadiyɛso k’oma la Allemagne kelɛwɔ Jaqueline akafundɛ Bɛtɛlɛ ka l’Équateur lɛnɛ akandatshu ate: “Lo ɛnɔnyi ehende eto wamomosala lanɛ, laya l’ambeki wa Bible 13 ndo 4 l’atei awɔ ndjaka lo nsanganya mbala la mbala. Kema ɔsɔ ekɔ dui di’ɔngɛnɔngɛnɔ?” Kadiyɛso kekina k’oma la Canada kelɛwɔ Chantal mbutaka ate: “Etena kakamakome l’Équateur lo 2008, lakatane paka etshumanelo ɔtɔi keto. Koko kakianɛ, tshumanelo diaya sato di’etondo ndo ambatshi mboka ndekana 30. Ndoko dui diakoka mbishami ɔngɛnɔngɛnɔ ko ndeka mɛna woho watahame anto lo nyuma.” Nde kotshaka ate: “Atete edja konwemi l’osomba okina w’anganyi la lɛnɛ eso mɛtɛlɛ oko 2 743 l’akona wa Andes. Anto ndekana 75 000 wekɔ l’osomba ɔsɔ, koko ekɔ paka etshumanelo ɔtɔi. Dimi ngɛnangɛnaka nsambisha efula lɛkɔ nɛ dia anto mbetawɔka losango la Diolelo.”
EKAKATANU
Ekɔ mɛtɛ dia monɔ otsha lo wodja okina dia tokimanyiya kema yana ya dikambo ndo ekakatanu wekɔ efula. Koko, ɛlɔngɔlɔngɔ ndo esekaseka efula pomanaka l’ekakatanu kânga la ntondo ka vɔ monɔ. Tɔshi ɛnyɛlɔ ka kadiyɛso k’oma la États-Unis kelɛwɔ Kayla. Nde mbutaka ate: “Ɛtɛkɛta w’anangɛso l’akadiyɛso amɔtshi kaloyakami ɛkɔngɔkɔngɔ. Vɔ hawoshihodia lande na kalangami monɔ otsha lo wodja okina dia tokimanyiya oko ombatshi mboka. Mbala mɔtshi, dimi ndjambolaka ɔnɛ: ‘Onde yɛdikɔ yalangami mbɔsa nyɛ yɛkɔ dimɛna?’” Koko kânga mbakidiɔ ngasɔ, Kayla akonɔ. Nde mbutaka ate: “Woho wakamalɔmbɛ Jehowa efula ndo wakamayange alako le Akristo wambotshunda lo nyuma akakimanyiya dia mɛna ɔnɛ Jehowa tshɔkɔlaka anto wele la yimba ya ndjahombia.”
Okakatanu okina wahomana la wanɛ wonɔ ele, woho wa mbeka ɔtɛkɛta wa lo wodja akɔ. Ɔnangɛso l’oma la Pays-Bas lelɛwɔ Siobhan mbutaka ate: “Aki tshondo y’okakatanu le mi dia nsawola l’anto wa lɛkɔ. Lakahombe monga la solo dia lotutsha, mbeka ɔtɛkɛta akɔ l’etete, ndo mendjolaka etena kasalami dindja.” Kadiyɛso k’oma la Estonie kelɛwɔ Anna mbutaka ate: “Woho wotshikitanyi hiɛlɛlɛ ya lɛnɛ akamatshu la ya lo wodja ami, woho wele otoko ndo tshitshi efula lɛkɔ kôshimbami dia mbeka ɔtɛkɛta w’Espagnol. Lo tena dimɔtshi, dimi lakakɔmɔka. Koko lo dihole dia dimi ndeka mbidja yimba lo wandja, dimi lakalekaka mbidja yimba l’ehamelo wakamatasalaka.”
Okakatanu okina wahomana la wanɛ wonɔ ele olengolengo wa ntshika wodja awɔ ko ntshɔ lo wodja okina. Ɔnangɛso Jonathan l’oma la États-Unis mbutaka ate: “Yema tshitshɛ l’ɔkɔngɔ wa dimi nkoma l’Équateur, lakakɔmɔ l’ɔtɛ wakamângana l’ase nkumbo ndo l’angɛnyi ami. Koko lakalɛndja tokanyi tɔsɔ lo ndjasha tshɛ lo wekelo w’onto ndamɛ ndo l’esambishelo. Woho wayashami efula l’esambishelo ndo wayami l’angɛnyi w’eyoyo l’etshumanelo ambokimanyiya dia nyomonga l’ɔngɛnɔngɛnɔ.”
Okakatanu okina wahomana la wanɛ wonɔ ele yoho ya lɔsɛnɔ ya lo wodja watshɔwɔ. Vɔ pombaka nsala la wolo dia mbekɛ yoho ya lɔsɛnɔ ya lɛkɔ. Ɔnangɛso l’oma la Canada lelɛwɔ Beau mbutaka ate: “Mbeyaka monga ko lo wodja anyu, kura ndo ashi wekɔ wonya tshɛ. Koko lanɛ, diangɔ sɔ mongaka paka lo pai.” Woho wewɔ bu la dihole diatshɔwɔ dia tɔsa mituka, wola ndo wakiwɔ kombɔtɔ kalasa ekɔ l’atei w’ekakatanu wahomana la wanɛ wonɔ lo wedja ekina dia tokimanyiya. Kadiyɛso k’oma la Australie kelɛwɔ Ines ekɔ lo ndɔshana l’ekakatanu ɛsɔ lo ndeka mbidja yimba lo waonga w’amɛna wele l’anto wa lo wodja wende. Nde mbutaka ate: “Vɔ nongɔnaka, wekɔ l’osalosalo, kimanyiyanaka ndo wekɔ l’okitshakitsha. Efula kawɔ nangaka mbeka akambo wendana la Nzambi woho w’anyanya.”
WAKATSHƆKWAMA ‘LO YƐDIKƆ YAKIWƆ KONONGAMƐKA’
Lam’ele ɛlɔngɔlɔngɔ l’esekaseka wakatshu dia tokimanyiya l’Équateur wakɛnya yimba ya ndjahombia, Jehowa ‘akâtshɔkɔla efula.’ (Ef. 3:20) Vɔ suyaka ɔnɛ ‘takatshɔkwama lo yɛdikɔ yakiso konongamɛka.’ (Mal. 3:10) Nyɛsɔ tolonge kɛnɛ katotɛwɔ vɔamɛ:
Bruno: “Lakatatɛ nsambisha lanɛ l’Équateur, lo Amazonie. L’ɔkɔngɔ diko, wakayombelɛka dia tokimanyiya lo Bɛtɛlɛ ka lanɛ ndo kakianɛ lekɔ lo nkamba lɛkɔ. Etena kakimi l’Italie, lakɔshi yɛdikɔ ya mbetsha olimu waki Jehowa lo dihole dia ntondo ndo dui sɔ diambombisha ɔngɛnɔngɛnɔ w’efula ndo diaaso dia ndeka ndjasha l’olimu ande.”
Beau: “Oyelo ami lanɛ l’Équateur ambokimanyiya dia dimi ndeka ndjasukanya la Jehowa nɛ dia lekɔ lo mbetsha wenya ami tshɛ paka l’akambo wa lo nyuma. Lâdiko dia lâsɔ, lekɔ la diɛsɛ dia mbeteta l’ahole wa diambo ndo w’amɛna efula, dui diakamakombolaka nsala lo lɔsɛnɔ.”
Anna: “Tâkamafɔnyaka dia kadiyɛso k’onyemba oko dimi koka monga misiɔnɛrɛ. Koko kakianɛ, lambɛna dia dui sɔ koka salema. Diɛsɛ la ɛtshɔkɔ wa Jehowa, lekɔ l’ɔngɛnɔngɛnɔ wa mbetɛ anto ambeki, mbisha lonya lo wokelo wa Mbalasa ya Diolelo ndo monga l’angɛnyi w’eyoyo.”
Elke: “Etena kakimi l’Australie wodja ami wa lôtɔ, lakalɔmbaka Jehowa dia dimi nkondja kânga ombeki ɔtɔi wa Bible. Endaka lanɛ l’Équateur, laya l’ambeki 15 w’etondo. Lekɔ l’ɔngɛnɔngɛnɔ w’efula lo menda woho watawahame lo nyuma.”
Joel: “Ekɔ dui dia dimɛna efula di’onto ntshɔ tokambɛ Jehowa lo wodja wahandeye ndoko onto. Kɛsɔ mbotshutshuyaka dia ndjaɛkɛ tshɛ le Jehowa ndo tshɔkwama efula oma le nde. Etena kakamamɔ oma lo États-Unis dia ndjokimanyiya l’Équateur, lakatane paka apandjudi 6 ato l’olui wakamasanganaka. Koko l’ɔkɔngɔ w’ɔnɔnyi ɔtɔi oto, apandjudi wakakome 21 ndo takasangana anto 110 lo Ehwelo ka nyɔi ka Yeso.”
KAYOTOTA DIKAMBO DIAYƐ?
Ɔlɔngɔlɔngɔ kana osekaseka le, onde awui wele la yɛ koka kosha diaaso dia ndo wɛ ntshɔ lo wodja okina wewɔ l’ohomba efula w’apandjudi wa Diolelo dia tokimanyiya? Ekɔ mɛtɛ di’ɔsɔ ekɔ yɛdikɔ ya woke yahombayɛ nkana yimba efula la ntondo ka ndjiɔsa. Koko naka wɛ mboka Jehowa ndo anto akina ngandji k’efula, kete wɛ koka nsala dui sɔ. Naka wɛ ekɔ la ngandji kɛsɔ ndo la waonga akina w’amɛna, kete lɔmba Jehowa efula l’oyango wa tokamba lo wodja okina. Ndo nto, sawola l’ambutshi ayɛ w’Akristo ndo la dikumanyi dia l’etshumanelo dia wɛ mbaɛnya nsaki kayɛ kendana la dikambo sɔ. Naka wɛ nsala ngasɔ, kete wɛ ayɛna dia ndo wɛ mbakoka nkamba olimu ɔsɔ ndo nkondja ɔngɛnɔngɛnɔ waya lo monga la yimba ya ndjahombia.
[Efundelo wa l’etei w’odingɔ wa lo lɛkɛ 3]
“Woho wakamalɔmbɛ Jehowa efula ndo wakamayange alako le Akristo wambotshunda lo nyuma akakimanyiya dia mɛna ɔnɛ Jehowa tshɔkɔlaka anto wele la yimba ya ndjahombia.”—Kayla oma la États-Unis
[Kiombo/Osato wa lo lɛkɛ 6]
Woho wa ndjalɔngɔsɔla dia tokimanyiya lo wodja okina
• Onga la mbekelo y’amɛna ya wekelo wa Bible w’onto ndamɛ
• Enda Olimu aso wa Diolelo wa Ngɔndɔ k’enanɛi 2011, lɛkɛ 4-6
• Sawola la wanɛ wambôtshɔka dia tokimanyiya lo wodja okina
• Eya mbekelo ndo ɔkɔndɔ wa wodja walangayɛ ntshɔ
• Mbola dia mbeya ɔtɛkɛta walekawɔ ntɛkɛta lɛkɔ
[Kiombo/Osato wa lo lɛkɛ 6]
Anto amɔtshi wakatshu dia tokimanyiya lo wodja okina ndjakotshɛka ehomba awɔ lo . . .
• nkalola dia ndjokambaka djemulemu lo wodja awɔ ngɔndɔ mɔtshi ɔnɔnyi tshɛ
• futɛka luudu la mbidjasɛ
• kambaka olimu ɔmɔtshi wa dikuta l’ekimanyielo k’Ɛtɛrnɛtɛ
[Esato wa lo lɛkɛ 4, 5]
1 Jaqueline oma la Allemagne
2 Bruno oma la Italie
3 Beau oma la Canada
4 Siobhan oma la Pays-Bas
5 Joel oma la États-Unis
6 Jonathan oma la États-Unis
7 Anna oma la Estonie
8 Elke oma la Australie
9 Chantal oma la Canada
10 Ines oma la Australie