Woho wakokaso nkimanyiya anto akina

FRANÇOIS lele Ɔmɛnyi wa Jehowa ndo ekumanyi mbutaka ate: “L’ɔkɔngɔ wa vɔtɛ, ata wakalɔma wolo efula ndo dui sɔ diakatshutshuya nunu di’Ɛmɛnyi wa Jehowa dia ntakɔ ngelo yawɔ. Lam’ele mbo ya ndɛ ndo ekanga wakakitakita, oshinga awɔ wakadɛ woho w’anyanya. Waa bankɛ yakadihama.”

Aha la ntshimbatshimba, anangɛso w’oma lo Bɛtɛlɛ wakatatɛ tɔlɛ Ɛmɛnyi wa Jehowa wakatakɔ ngelo yawɔ ko todjasɛ lo Mbalasa ya Diolelo mfalanga la diangɔ dikina. Asɔlayi wa lo wedi akɔ ehende wakadje bariyɛrɛ, koko lam’ele vɔ wakeyaka dia Ɛmɛnyi wa Jehowa hawoyatambiya l’awui wa pɔlitikɛ, vɔ komemadiaka mituka w’oma lo Bɛtɛlɛ.

Ɔnangɛso François kotshaka ate: “Lushi lɔmɔtshi etena kakayayaka mutuka aso oya lo Mbalasa ka Diolelo, anto wakaholama dihole dimɔtshi wakakande mutuka wakiso lɔkɔ. Diɛsɛ ko asashi waketaka l’atei aso. Mbala kɛmɔtshi, etena kakatɛnyi osalayi ayaye l’okoma l’anya takakadimola mutuka mbala kakɔ ɔtɔi ko takakalola otsha lo Bɛtɛlɛ. Takasha Jehowa losaka lo woho wakatatshikala la lɔsɛnɔ. La wedi a pindju, anangɛso 130 waki lo Mbalasa ka Diolelo kɛsɔ wakatshu lo dihole diakawakoke kokamɛ. Amɔtshi wakaye lo Bɛtɛlɛ ndo takawakimanyiyaka lo demba ndo lo nyuma edja ndo lam’akashile efukutanu ɛsɔ.”

François kotshaka nto ate: “Anangɛso wakayofundɛka Bɛtɛlɛ mikanda dia mbaoka losaka. Woho wakawakimanyiyama oma le anangɛso w’oma l’ahole akina, akafudia wɛkamu awɔ le Jehowa.”

Naka anangɛso l’akadiyɛso wambohomɔ mpokoso y’oma lo diangɔ diakatongama kana oma lo diangɔ diasala anto, hatohombe mbatɛ ɔnɛ: ‘Nyotoke dja ndo nyotole dimɛna.’ (Jak. 2:15, 16) Lo dihole dia nsala ngasɔ, sho pombaka mbakimanyiya lo demba. Etena kakaweye dia anangɛwɔ wa la Judeya wekɔ lo diɛnɛ la ndjala, “ambeki wakɔshi yɛdikɔ ya ntoma ekimanyielo la Judeya lo tshimbo y’anangɛso, onto l’onto lo ndjela ekondjelo kande.”​—Etsha 11:28-30.

Oko weso ekambi wa Jehowa, sho nomɔlomɔka dia nkimanyiya wanɛ wele lo dihombo lo demba. Koko, anto wa ngasɔ wekɔ ndo l’ehomba wa lo nyuma. (Mat. 5:3) Yeso akatosha ɔkɛndɛ wa mbetɛ anto ambeki l’oyango wa sho mbakimanyiya dia vɔ mbeya ehomba awɔ wa lo nyuma. (Mat. 28:19, 20) Onto tshɛ la l’atei aso kambaka la wenya ande, la wolo ande ndo la diangɔ diele la nde dia nkotsha olimu ɔsɔ. Lo tena dimɔtshi, okongamelo aso kambaka la mfalanga yakimɔso dia nkimanyiya anangɛso l’akadiyɛso wele lo dihombo, koko mfalanga shɔ ndekaka minandema dia ntɔla wahɔ wa Diolelo ndo esambishelo ka lokumu l’ɔlɔlɔ otsha la ntondo. Lo nsala ngasɔ, sho mɛnyaka ngandji kokaso Nzambi la wanyaso anto.​—Mat. 22:37-39.

Mbokɛmaka dia wanɛ wasukɛ olimu wakamba Ɛmɛnyi wa Jehowa l’andja w’otondo koka monga l’eshikikelo dia weshasha wakimɔwɔ wekɔ lo kambema lo yoho ya dimɛna efula. Onde ndo wɛ mbele suke dia nkimanyiya anangɛso l’akadiyɛso wele lo dihombo? Onde wɛ ngɛnangɛnaka nsukɛ olimu wa mbetɛ anto ambeki? Naka ngasɔ, kete “tuyalaki la unyishi a di’ololo le wane wukuki dilungula lam’eye la wulu wa mbashadio.”​—Tuk. 3:27.