Tokotsha ɔkɛndɛ aso w’osambisha dimɛna

1. Lande na kataso ɔnɛ Jehowa mbele Osambisha wa ntondo ndo woleki tshɛ?

OSAMBISHA wa Diolelo ekɔ onto lewoya anto lokumu l’ɔlɔlɔ. Jehowa Nzambi mbele Osambisha wa ntondo ndo woleki tshɛ. Ɛnyɛlɔ, yema tshitshɛ l’ɔkɔngɔ w’ɔtɔmbɔkwɛlɔ w’ambutshi aso wa ntondo, Jehowa akewoya lokumu l’ɔlɔlɔ ɔnɛ olui, mbuta ate Satana Diabolo ayolanyema. (Etat. 3:15) L’edja ka ntambe efula, Jehowa akasambiya anto waki la mbetawɔ dia mfunda awui efula wendana la woho wayondɛdia lokombo lande oma lo ntɛngɔ tshɛ, wayondɔlɔngɔsɔla akambo tshɛ wakalanyema oma le Satana ndo woho wayokondja anto tshɛ ɛtshɔkɔ wakashisha Adama la Eva.

2. a) Kakɔna kasala andjelo lo kɛnɛ kendana l’olimu w’esambishelo? b) Ɛnyɛlɔ kakɔna kakatshikɛ Yeso esambisha wa lokumu l’ɔlɔlɔ tshɛ?

² Ndo andjelo mbele esambisha nɛ dia vɔ mbewoyaka lokumu l’ɔlɔlɔ ndo kimanyiyaka anto akina dia nkamba olimu akɔ. (Luka 1:19; 2:10; Etsha 8:26, 27, 35; Ɛny. 14:6) Kayotota dikambo dia Mikayɛlɛ arkandjelo? Etena kakinde la nkɛtɛ, Yeso akatshikɛ esambisha wa lokumu l’ɔlɔlɔ tshɛ ɛnyɛlɔ lo ndjasha efula l’esambishelo. Lande na? Nɛ dia nde akayashaka tshɛ lo tshɛ l’olimu w’esambishelo lɔsɛnɔ lande l’otondo.​—Luka 4:16-21.

3. a) Naa lokumu l’ɔlɔlɔ latatadianganya? b) Ambola akɔna w’ohomba wayotɔsɛdingola?

³ Yeso akasha ambeki ande didjango dia dianganya lokumu l’ɔlɔlɔ. (Mat. 28:19, 20; Etsha 1:8) Ɔpɔstɔlɔ Pɔɔlɔ akakeketsha Timɔte wonyande okambi ate: “Okambe olimu w’osambisha ndo okotshake ekambelo kayɛ dimɛna.” (2 Tim. 4:5) Naa lokumu l’ɔlɔlɔ lɔsɔ latatadianganya oko weso ambeki wa Yeso? Lɔ mendanaka la losango l’ɔngɛnɔngɛnɔ lɔnɛ Jehowa Shɛso lele l’olongo tokaka ngandji. (Jni. 3:16; 1 Pet. 5:7) Yoho ya dimɛna efula yatɛnya Jehowa ngandji katokande ele lo tshimbo ya Diolelo diande. Diakɔ diele l’ɔngɛnɔngɛnɔ tshɛ, sho mbewoyaka anto akina ɔnɛ onto tshɛ layela ɛlɔmbwɛlɔ ka Diolelo sɔ, lakitanyiya Nzambi ndo lasala kɛnɛ kele ɔlɔlɔ koka monga la diɔtɔnganelo dia ma ma la nde oko angɛnyi. (Osam. 15:1, 2) Lo mɛtɛ, sangwelo diaki Jehowa ele dia minya asui tshɛ. Nde ayokimanyiya anto dia vɔ mbohɛ asui wakawadiɛnɛka. Ande losango lɔsɔ dimɛna lee! (Is. 65:17) Lam’ele tekɔ esambisha wa Diolelo, nyɛsɔ tɔsɛdingole ekadimwelo wa ambola ahende w’ohomba efula anɛ: Lande na kele anto l’ohomba wa mpokamɛ lokumu l’ɔlɔlɔ nshi nyɛ? Ndo ngande wakokaso nkotsha ɔkɛndɛ aso w’esambishelo dimɛna dimɛna?

LANDE NA KELE ANTO L’OHOMBA WA MPOKAMƐ LOKUMU L’ƆLƆLƆ?

4. Naa akambo amɔtshi wa kashi wata anto amɔtshi lo dikambo diaki Nzambi?

⁴ Ohɔsa di’onto ɔmɔtshi ambokotɛ dia papa kanyu ambonyolawɔ. Wanɛ wata dia vɔ mbeeyaka wambota ɔnɛ nde kombidjaka anto lo demba, akatayashɛshɛka ndo aki kanga esehe. Anto akina wambokoma polo ndo lo keetawoya ɔnɛ bu ohomba dia wɛ nyanga dia monga la diɔtɔnganelo la papa kayɛ nɛ dia nde ambovɔka. Lo yoho yakɔ yaamɛ mbele, anto efula mbutaka akambo wa ngasɔ lo dikambo dia Nzambi. Vɔ mbutaka dia Nzambi ekɔ ehekesa, hatokoke mbeeya, kana ɔnɛ nde ekɔ kanga esehe. Ɛnyɛlɔ, ewandji w’ɛtɛmwɛlɔ ɛmɔtshi mbetshaka anto ɔnɛ Nzambi soyaka anto wa kɔlɔ pondjo pondjo lo lowenga la dja. Anto akina mɛndjaka Nzambi onongo wa mpokoso yaya oma lo diangɔ diakatongama. Lam’ele mpokoso shɔ ndjakaka ndo anto w’ɛlɔlɔ ndo anto wa kɔlɔ, vɔ mbutaka ɔnɛ yɔ yekɔ dilanya di’oma le Nzambi.

5, 6. Lande na kele wetshelo w’ohilwelo ndo wetshelo ekina wa kashi wekɔ la shɛngiya le anto?

⁵ Anto akina mbutaka ɔnɛ Nzambi bu ndo ɔnɛ sho takaye oma le nyama. Lo dikambo sɔ, tɔshi ɛnyɛlɔ ka wetshelo w’ohilwelo. Anto efula wasukɛ wetshelo akɔ mbutaka dia lɔsɛnɔ kotongama oma le onto ɔmɔtshi. Vɔ shikikɛka dia ndoko Otungi ɔmɔtshi wekɔ. Akina komaka polo ndo lo mbuta ɔnɛ lam’ele onto akaye oma le nyama, kema dui dia diambo dia mɛna onto asala akambo amɔtshi oko nyama. Vɔ mbutaka ɔnɛ bu kɔlɔ di’anto woleki wolo mbahemɛ wanɛ wele bu la wolo efula la ngala tshɛ. Diakɔ diele bu dui dia diambo di’anto efula mbetawɔka ɔnɛ akambo wa wɛngiya wayongaka nshi tshɛ. Ɔnkɔnɛ, anto wetawɔ wetshelo w’ohilwelo kema l’elongamelo.

⁶ Aha la taamu, wetshelo w’ohilwelo ndo wetshelo ekina wa kashi mbele lo kiɔkɔ y’asui wadiɛnɛ anto wa lo nshi y’ekomelo nyɛ. (Rɔmɔ 1:28-31; 2 Tim. 3:1-5) Aha wetshelo w’anto ɛsɔ mbele lokumu l’ɔlɔlɔ la mɛtɛ ndo la pondjo. Koko, oko wakadite ɔpɔstɔlɔ Pɔɔlɔ, vɔ wekɔ lo ntshika anto lo “wodjima ndo vɔ mangana la lɔsɛnɔ l’oma le Nzambi.” (Ɛf. 4: 17-19) Laadiko dia laasɔ, wetshelo w’ohilwelo ndo wetshelo ekina wa kashi wekɔ lo mbidjɛ anto wekamu diaha vɔ mbetawɔ lokumu l’ɔlɔlɔ l’oma le Nzambi.​—Adia Ɛfɛsɔ 2:11-13.

7, 8. Naa yoho yaamɛ yakoka nkimanyiya anto dia vɔ nshihodia lokumu l’ɔlɔlɔ?

⁷ Di’anto ndjaokanya la Nzambi, vɔ pombaka ntondotondo mbetawɔ ɔnɛ Jehowa ekɔ ndo monga l’ɛkɔkɔ w’eshika w’atshutshuya dia ndjasukanya la nde. Sho koka mbakimanyiya dia nkondja ewo k’akambo wa mɛtɛ lo mbakeketsha dia vɔ nsɛdingola diangɔ diakatongama. Naka anto nsɛdingola diangɔ diakatongama dimɛna, vɔ wayeya dia Nzambi ekɔ la lomba ndo la wolo. (Rɔmɔ 1:19, 20) Ngande wakokaso nkimanyiya anto dia vɔ nshihodia ɔnɛ Nzambi mbakatonge diangɔ tshɛ ndo nkana yimba lo kɛnɛ kendana la diangɔ diakandatonge? Sho kokaka nkamba la tobukubuku tohende tɔnɛ: La vie a-t-elle été créée ? ndo Cinq questions à se poser sur l’origine de la vie. Kaanga mbediɔ ngasɔ, onto kekaka akambo wendana l’etongelo ato, nde hotana ekadimwelo lo ambola amɔtshi wendana la lɔsɛnɔ watshindja wɔɔngɔ wele oko: Lande na katshika Nzambi asui? Kakɔna kasangoya Nzambi lo dikambo dia nkɛtɛ? Onde Nzambi ndjakiyanyaka lo dikambo diayɛ?

⁸ Yoho yaamɛ yakoka anto nshihodia lokumu l’ɔlɔlɔ lendana la Nzambi ndo asangwelo ande ele lo mbeka Bible. Ande diɛsɛ diele la so dia nkimanyiya anto dia vɔ nkondja ekadimwelo lo ambola awɔ lee! Dia munanda etema w’ampokami aso, ekɔ akambo efula walɔmbama lo dihole dia mbatɛ tsho kɛnɛ ketsha Bible lo dikambo dimɔtshi; sho pombaka nto mbaetawoya. (2 Tim. 3:14) Sho koka ndeka monga l’akoka wa mbetawoya anto lo ndjela ɛnyɛlɔ ka Yeso. Lande na kakandakondjaka etombelo w’amɛna? Ɔkɔkɔ ɔmɔtshi ele, nde akakambaka la ambola lo yoho ya dimɛna. Ngande wakokaso mbookoya?

ESAMBISHA WA TOMANAMANA KAMBAKA LA AMBOLA LO YOHO YA DIMƐNA

9. Dia nkimanyiya anto dia vɔ mbetawɔ lokumu l’ɔlɔlɔ, ahombaso nsala?

⁹ Etena keso l’olimu w’esambishelo, lande na kahombaso nkamba la ambola lo ɛnyɛlɔ ka Yeso? Tɔshi ɛnyɛlɔ kɛnɛ: Wɛ ambotshɔ dia tɛnana la dɔkɔtɛlɛ dimɔtshi, ko kam’okɛnyinde nde ambokotɛ ɔnɛ wɛ ekɔ la hemɔ ka wolo, laasɔ dia tɔ nkɔnɔ paka vɔ kosala epaso. Wɛ koka mbetawɔ kɛnɛ kakotɛnde. Ko kayotota naka nde ambokotɛ dia wɛ pombaka nsala epaso wa wolo la ntondo ka nde kooka kaanga dimbola ɔtɔi diendana la hemɔ kayɛ? Ondo wɛ hetawɔ kɛnɛ kokotende. Oyadi diewo diakɔna diele la dɔkɔtɛlɛ sɔ, nde pombaka kooka ambola ndo kohokamɛ dia mbeya tolembetelo tɛnya dia wɛ ekɔ la hemɔ la ntondo ka nde ndjoshikikɛ hemɔ kele la yɛ dia kosakɛ. Woho akɔ waamɛ mbele, etena kakimanyiyaso anto dia vɔ mbetawɔ lokumu l’ɔlɔlɔ la Diolelo, sho pombaka kambaka la ambola dimɛna dia mbeya kɛnɛ kele l’etema awɔ. Paka l’ɔkɔngɔ wa sho mbeya kɛnɛ kele l’etema awɔ, mbakokaso ndjaakimanyiya.

10, 11. Naka sho mbokoya yoho ya mbetsha yaki Yeso, kakɔna kayotonga l’akoka wa nsala?

¹⁰ Yeso akeyaka dia ambola wɔsɔnami dimɛna hawokimanyiya tsho ombetsha dia mbeya kɛnɛ kele l’otema w’ombeki ande, koko vɔ kimanyiyaka ndo ombeki dia nde ndjasha lo sawo dimɛna. Ɛnyɛlɔ, etena kakalange Yeso mbetsha ambeki ande wetshelo wendana l’okitshakitsha, ntondotondo nde akawaoke dimbola diakaatshutshuya dia nkana yimba. (Makɔ 9:33) Dia mbetsha Petero woho wa nkana yimba l’atɔndɔ wa lo Bible, Yeso akawoke ambola efula wakasɔnama dimɛna. (Mat. 17:24-26) Lo diaaso dikina, etena kakalange Yeso mbeya kɛnɛ kaki l’etema w’ambeki ande, nde akawaoke ambola watshutshuya onto dia mbisha kanyi yande. (Adia Mateo 16:13-17.) Yeso kokomɛka tsho lo mbutɛ anto kɛnɛ kakawahombaka nsala. Koko, nde akanandaka etema awɔ ndo akaatshutshuyaka dia vɔ nsala akambo lo yoho yɔtɔnɛ la lokumu l’ɔlɔlɔ.

¹¹ Naka sho ndjela ɛnyɛlɔ ka Yeso lo kambaka la ambola dimɛna, kete tayeya akambo asato anɛ: Tayoshola woho wa ndeka nkimanyiya wanyaso anto, tayeya woho wa mbekola wekamu, ndo tayeya mbaetsha woho wakokawɔ ndjakondjiyɛ wahɔ. Tɔsɛdingole bɛnyɛlɔ sato diɛnya woho wakokaso nkamba la ambola dia nkondja etombelo w’ɛlɔlɔ.

12-14. Ngande wakokayɛ nkimanyiya ɔnayɛ dia nde nsambisha lokumu l’ɔlɔlɔ aha l’okakatanu? Sha ɛnyɛlɔ.

¹² Ɛnyɛlɔ ka 1: Tɔshi dia wɛ ekɔ ombutshi, kakɔna kayoyosala naka ɔnayɛ lele l’ɛnɔnyi dikumi l’ɛmɔtshi ekɔ lo ndjakiyanya dia mbeya woho wakokande tolembetshiya asekande wa la kalasa dietawɔ diele la nde lo kɛnɛ kendana la diangɔ diakatongama, etena kayondotosawola la wɔ? Aha la taamu, wɛ ayɔngɛnangɛna dia mbokimanyiya dia nde tosambisha lokumu l’ɔlɔlɔ l’eshikikelo tshɛ. Ɔnkɔnɛ, lo dihole dia mbɔɔnyɔla kana mbosha alako mbala kakɔ ɔtɔi, shi wɛ kokaka mbokoya ɛnyɛlɔ ka Yeso lo mbooka ambola wayowotshutshuya dia nde mbisha kanyi yande? Ngande wakokayɛ nsala dui sɔ?

¹³ L’ɔkɔngɔ wa wɛ l’ɔnayɛ mbadia asawo amɔtshi wa lo biukubuku Cinq questions à se poser sur l’origine de la vie, wɛ kokaka mbooka ambola dia mbeya dui diakɔna diambondɔngɛnangɛna dia tosawola l’ampokami ande. Keketshande dia ndamɛ nshihodia ɛkɔkɔ wawotshutshuya dia monga la mbetawɔ ɔnɛ Otungi ekɔ ndo lande na ketawɔnde nsala lolango lande. (Rɔmɔ 12:2) Ɔnayɛ pombaka mbeya dia ɛkɔkɔ wakakotshutshuya dia mbetawɔ ɔnɛ Otungi ekɔ ntshikitana la wande.

¹⁴ Lembetshiya ɔnayɛ dia etena kasawolande l’osekande ɔmɔtshi la la kalasa, nde pombaka ndjela kɛnɛ kakayawɛnyisha. Dia nkotsha dui sɔ, ɔnayɛ pombaka toohodi awui amɔtshi w’ohomba ndo ambola amɔtshi walɔmba onto dia mbisha kanyi yande. Ɛnyɛlɔ, nde mbeyaka nɔmba osekande la la kalasa dia mbadia kiombo yele lo lɛkɛ 21 ya lo biukubuku Cinq questions à se poser sur l’origine de la vie. Oma laasɔ, ɔnayɛ mbeyaka mbombola ɔnɛ: ‘Onde ekɔ mɛtɛ dia dikoka diele la ADN dia nama akambo ntshikitana la dikoka diele la ɔrdinatɛrɛ dia nama akambo?’ Osekande la la kalasa mbeyaka nkadimola ɔnɛ eelo. Oma laasɔ, ɔnayɛ koka mbooka dimbola nɛ: ‘Naka ɔrdinatɛrɛ ɛngɔ kakasalema oma le anto bu la dikoka diele oko ADN dia nama akambo, onde ehomɔ kakasalema kele bu la yimba koka nama akambo lo tɔ tɔamɛ?’ Dia nkimanyiya ɔnayɛ dia nde sawolaka l’asekande wa la kalasa awui wendana la dietawɔ diande aha l’okakatanu, ekɔ ohomba wɛ salaka kaamɛ la nde wɛnyɛlɔ wa woho wakokande tosala dui sɔ. Naka wɛ ndowanya ɔnayɛ dia nkamba la ambola lo yoho ya dimɛna, kete wɛ ayowokimanyiya dia nde nkotsha ɔkɛndɛ ande w’osambisha dimɛna.

15. Ngande wakokaso nkamba la ambola dia nkimanyiya onto lahetawɔ dia Nzambi ekɔ?

¹⁵ Ɛnyɛlɔ ka 2: Tɔshi dia tekɔ l’olimu w’esambishelo ko tambohomana l’onto ɔmɔtshi lahetawɔ ɔnɛ Nzambi ekɔ. Lo dihole dia minya demba, sho kokaka mbombola la dilɛmiɛlɔ tshɛ ɔnɛ aya ɛnɔnyi engana wahayetawɔ ɔnɛ Nzambi ekɔ ndo kakɔna kakotshutshuya dia monga la kanyi shɔ? L’ɔkɔngɔ wa sho mbohokamɛ ndo mbosha losaka lo ekadimwelo ande, sho kokaka mbombola kana ayonga dimɛna sho mbadia kaamɛ la nde awui amɔtshi washikikɛ dia lɔsɛnɔ lakatongama mɛtɛ. Naka nde mbetawɔka, kete nde koka mbuta ɔnɛ nde nanganaka mbeya tolembetelo tɔsɔ. Oma laasɔ, sho kokaka mbosha oyadi biukubuku La vie a-t-elle été créée ? kana Cinq questions à se poser sur l’origine de la vie. Mboka ambola lo yoho ya dimɛna kimanyiyaka ompokami dia nde monga suke dia mpokamɛ lokumu l’ɔlɔlɔ.

16. Lande na kahatahombe mbetawɔ di’ombeki aso taadiaka ekadimwelo ladia oma lo okanda wekaso la nde Bible?

¹⁶ Ɛnyɛlɔ ka 3: Etena kekawɔ l’ambeki awɔ wa Bible, apandjudi amɔtshi mbalɔmbaka dia tashaka ekadimwelo wa ambola lo tadiaka paka kɛnɛ kofundami lo okanda wekawɔ la nde Bible. Naka sho nsala ngasɔ, kete tayowatshindjatshindja dia vɔ mpama lo nyuma. Lande na? Nɛ dia ombeki watadɛ ekadimwelo ladia aha la nkana yimba dia nkadimola, mongaka l’okakatanu dia mpama lo nyuma. Nde koka ntshika wekelo ande esadi eto oko lɔtɔngɔ lakonɛma l’ave latɔlɛngɛka etena kahomanande l’ɛhɛnyɔhɛnyɔ kana l’asui. (Mat. 13:20, 21) Dia nkimanyiya ombeki aso diaha dui dia ngasɔ mbokomɛ, sho pombaka mbombola wetshelo wambondokondja oma lo kɛnɛ kambondeka. Sala la wolo dia mbeya kana nde ambetawɔ kɛnɛ kambondeka. Kɛnɛ koleki ohomba ele, mbolande dia nde mbuta lande na kambondetawɔ kana kahandetawɔ kɛnɛ kambondeka. Oma laasɔ, kimanyiyande dia nkana yimba l’Afundelo dia ndamɛ mbɔsa yɛdikɔ. (Hɛb. 5:14) Naka sho nkamba la ambola lo yoho ya dimɛna, kete anto weka la so Bible wayonga la mbetawɔ ka wolo ndo wayonga l’akoka wa nshika tanga la ntondo ka tɔsɛngiya t’anto wayolanga mbanganyiya. (Kɔl. 2:6-8) Kakɔna kakokaso nsala nto dia sho nkotsha ɔkɛndɛ aso w’osambisha dimɛna?

ESAMBISHA WA DIOLELO WA TOMANAMANA KIMANYIYANAKA

17, 18. Etena katombaso l’osekaso opandjudi l’olimu w’esambishelo, ngande wakokaso nkamba kaamɛ?

¹⁷ Yeso akatome ambeki ande l’olimu w’esambishelo ahende ahende. (Makɔ 6:7; Luka 10:1) L’ɔkɔngɔ wa laasɔ, ɔpɔstɔlɔ Pɔɔlɔ akatɛkɛta dikambo dia “aseka[nde] ekambi” wanɛ “wakakambe la [nde] dihɛka lo dihɛka dikambo dia lokumu l’ɔlɔlɔ.” (Flpɛ. 4:3) Lo yoho yɔtɔnɛ l’avɛsa wele la diko ango, lo 1953, okongamelo wakakongɛ di’apandjudi wa Diolelo talowanyaka asekawɔ apandjudi etena kewɔ l’esambishelo.

¹⁸ Etena katasambisha apandjudi ahende, ngande wakokawɔ nkamba kaamɛ? (Adia 1 Kɔrɛtɔ 3:6-9.) Etena keeka opandjudi ɔmɔtshi l’ombeki ande ko vɔ waadia divɛsa dimɔtshi dia lo Bible, opandjudi okina pombaka mbifola Bible nde lawɔ dia tawayelaka. Etena tshɛ katɛkɛta wonyayɛ opandjudi kana ombeki weka la nde, ekɔ ohomba dia wɛ mpokamɛ dimɛna. Ekɔ ohomba dia wɛ tayelaka ɔkɛtshanyelo awɔ dimɛna dimɛna nɛ dia lo nsala ngasɔ, wɛ ayoka etena kakokayɛ nkimanyiya osekayɛ dia mbisha elembetshiyelo ɛmɔtshi wahombama. (Und. 4:12) Dui diahombayɛ mbewo: Ewɔ dia tahembolaka osekayɛ ɔtɛkɛta naka nde ekɔ lo nkana yimba lo yoho ya dimɛna la ompokami ande. Mbekelo ka mbɔsaka ɔtɛkɛta mbala la mbala mbeyaka ndjɔkɔmɔla osekayɛ ndo ndjodja ompokami anyu l’okandokando. Lo tena dimɔtshi, wɛ koka ndjɛna dimɛna dia mbisha kanyi mɔtshi. Koko, naka wɛ ambolanga mbisha kanyi mɔtshi, ekɔ ohomba dia ntɛkɛta mbala ɔtɔi kana hiende ndo lo tshena pe. Nsala ngasɔ ayosha osekayɛ diaaso dia nde ntetemala nɔmbɔla wekelo dimɛna.

19. Kakɔna kahombaso mbohɔka, ndo lande na?

¹⁹ Ngande wakokanyu wɛ l’osekayɛ opandjudi kimanyiyana etena katanyasambisha lo luudu la luudu? Shi nyu koka nkɛtshanya woho wakokanyu ndeka ndowanya mbɔtwɛlɔ yanyu dia nkondja etombelo w’amɛna? Ewɔ dia ntɛkɛta awui wakoka nkɔmɔla anto wa l’ɛtshi kanyu ka nkɛtɛ. Ndo nto, tetawɔke pondjo dia ntɛkɛta kɔlɔ lo dikambo di’apandjudi akina. (Tuk. 18:24) Tatohɛke dia sho tshɛ tekɔ anto wele kema kokele. Jehowa akatɛnya kɛtshi kande k’efula lo tosha diɛsɛ dia laande dia nsambisha lokumu l’ɔlɔlɔ. (Adia 2 Kɔrɛtɔ 4:1, 7.) Ɔnkɔnɛ, nyɛsɔ tɛnya lowando la so lo diɛsɛ diakatakondja lo nkotsha ɔkɛndɛ aso w’osambisha dimɛna dimɛna.