Ɛmɛnyi Wa Jehowa: Esambisha W’eshika W’evanjiliyɔ
1 Yeso Kristo akasha ambeki ande tshɛ ɔkɛndɛ wa sambisha evanjiliyɔ, awadjangɛ l’ɔlɔlɔ tshɛ dia vɔ sambisha lokumu l’ɔlɔlɔ la Diolelo. (Mat. 24:14; Etsha 10:42) Lo dikambo sɔ, ambeki ande wa ntondo wakasha ɛnyɛlɔ lam’akawatɛkɛtaka dia Diolelo aha la pekɔ, lo tɛmwɛlɔ ndo l’ahole tshɛ wakawahomanaka l’anto, lo sɛkɛ ndo lo luudu la luudu. (Etsha 5:42; 20:20) Ɛlɔ kɛnɛ, sho Ɛmɛnyi wa Jehowa, tamboyaɛnya dia sho mbele esambisha w’eshika w’evanjiliyɔ oma l’esambishelo ka losango la Diolelo lo wedja 232 ndo oma lo lofulo la batismu lambolekana miliyɔ ɔtɔi k’ambeki w’eyoyo l’ɛnɔnyi esato eto! Lande na kahomɔso lokolo l’ɔlɔ ngasɔ l’olimu aso w’esambishelo k’evanjiliyɔ na?
2 Lokumu l’Ɔlɔlɔ Tosalanganyaka: Esambisha w’evanjiliyɔ wekɔ apandjudi wa lokumu l’ɔlɔlɔ. Oko weso apandjudi, tekɔ la diɛsɛ dia mamba dia mbewoya Diolelo dia Jehowa, tshɔi yakɔ ya lokumu l’ɔlɔlɔ l’oshika lakokaso mbutɛ anto wɛna pâ. Sho ngɛnangɛnaka efula dia nteyi ntondo ɔnɛ elongo w’eyoyo wayolɛ la losembwe lâdiko dia nkɛtɛ k’oyoyo kayokengama l’anto wa kɔlamelo lo Paradiso kayoya. (2 Pet. 3:13, 17) Sho ato mbele l’elongamelo kɛsɔ ndo tekɔ la nsaki k’efula ka kiewoya anto akina.
3 Ngandji k’Oshika Totshutshuyaka: Sambisha evanjiliyɔ ekɔ olimu w’eko. (Romo 1:16) Diɔ diakɔ diokaso ɔlɔ efula dia pandjola losango la Diolelo. Oko weso esambisha w’eshika w’evanjiliyɔ, sho nangaka anyaso anto, dui diatosokoya dia sho mbewoya nkumbo kaso, asukanyi, wanɛ weyana la so ndo anto akina efula lokumu l’ɔlɔlɔ. Kamba olimu ɔsɔ l’anima aso tshɛ ekɔ yoho mɔtshi yoleki dimɛna ya mɛnya ngandji k’oshika kokaso onyaso onto.—1 Tes. 2:8.
4 Nyuma k’Ekila ka Nzambi Tokimanyiyaka: Ɔtɛkɛta wa Nzambi toshikikɛka ɔnɛ lam’onɛso lɔtɔngɔ la Diolelo ndo alitɛso ashi, Jehowa ‘kôdia.’ Kɛsɔ mɛtɛ kɛnaso l’ɔlɔngɔswamelo wa Jehowa ɛlɔ kɛnɛ. (1 Kor. 3:5-7) Nyuma ka Nzambi mbatosukɛ l’elimu aso w’esambishelo k’evanjiliyɔ ndo katokimanyiya dia kondja etombelo w’ɔlɔlɔ efula.—Joe. 2:28, 29.
5 Aha la mbohɛ dui di’ekeketshelo diele lo 2 Timote 4:5 dia ‘ntsha olimu w’osambisha’ ndo mboka onyaso ngandji, tonge la saki ka mbewoya lokumu l’ɔlɔlɔ la Diolelo lo diaaso tshɛ, l’elongamelo ɔnɛ Jehowa ayotetemala tshɔkɔla olimu aso!