Onde wɛ koka ndjaɛkɛ l’ɔtɛmwɛlɔ lo kɛnɛ kendana la ata?

Alberto akakambe olimu w’ɔsɔlayi suke l’ɛnɔnyi 10. Nde mbutaka ate: “Ɔnɔmbɔdi w’ɔtɛmwɛlɔ aso akatɔtshɔkɔlaka ndo akataka ate: ‘Nzambi ekɔ la nyu.’ Koko lakayambolaka nte: ‘Dimi lekɔ lo tatshu dia todiaka, koko Bible mbutaka ate: ‘Tudiakaki.’’”

Ray akakambaka lo masuwa w’ata etena kakalɔmaka Ta dia hende di’andja w’otondo. Nde akambola pastɛrɛ kawɔ mbala kɛmɔtshi ate: “Wɛ amboya dia ndjɔlɔmbɛ asɔlayi aso dia vɔ todja otshumba lo ta. Onde atunyi aso hawosale woho akɔ waamɛ?” Pastɛrɛ akookadimola ate Nkumadiɔndjɔ salaka akambo lo yoho yahamanema mfundo.

Naka okadimwelo ɔsɔ hawokɔngɛnyingɛnyisha, kete aha wɛmɛ.

BIBLE ETSHATƆ?

Yeso akate ate ɔlɛmbɛ wa hende woleki woke l’atei w’ɛlɛmbɛ waki Nzambi mbutaka ɔnɛ: “Olange wonyayɛ onto oko wayalangayɛ.” (Makɔ 12:31) Onde kɛsɔ nangaka mbuta dia Yeso akatotɛ dia sho nanga paka ase ngelo kaso kana wodja aso? Keema. Nde akatɛ ambeki ande ate: “Oma lo dikambo nɛ, anto tshɛ wayeya dia nyu nyekɔ ambeki ami naka nyayokana ngandji lam’asanyu.” (Joani 13:34, 35) Vɔ wakahombe mbokana ngandji ka wolo ndo anto wakahombe mbaeya ɔnɛ ambeki wa Yeso mbewɔ diɛsɛ oma lo ngandji kɛsɔ. Vɔ wakahombe nkimɔ ndo nsɛnɔ yawɔ dikambo di’asekawɔ lo dihole dia mbadiaka.

Akristo wa lo ntambe ka ntondo wakakitanyiyaka ɛtɛkɛta waki Yeso ɛsɔ. Dibuku dimɔtshi (The Encyclopedia of Religion) mbutaka ɔnɛ: “Ewandji w’ɛtɛmwɛlɔ wa lo ntambe ka ntondo, mbidja ndo Tertullien nde la Origène wakashikikɛka di’Akristo komonga la lotshungɔ la ndjaka onto ndo dui sɔ diakaashimbaka dia nsukɛ ase Rɔmɔ lo ata awɔ.”

ONDE ƐMƐNYI WA JEHOWA SALAKA NGASƆ?

Lam’ele Ɛmɛnyi wa Jehowa mbidjasɛka lo wedja efula, efula ka l’atei awɔ tanemaka lo wedi akɔ ehende naka wedja ehende wɔlɔshana. Koko vɔ salaka la wolo dia nama ngandji kele lam’asawɔ kaakimanyiya dia mbeyama oko ambeki wa Yeso.

Ɛnyɛlɔ, etena kakalɔshanaka waa Hutu la waa Tutsi lo 1994 lo wodja wa Rwanda, Ɛmɛnyi wa Jehowa wakalame lomangemange lawɔ. Kaanga mbakawaanemɛ dia ndjakema naka vɔ mbishɛ asekawɔ, vɔ wakombanaka lam’asawɔ. Etena kakawande Ɛmɛnyi wa Jehowa ehende wa waa Hutu wakashɛ asekawɔ wa waa Tutsi, asɔlayi wa Interhamwe wakawatɛ ɔnɛ: “Nyu pombaka ndjakema nɛ dia nyu kimanyiyaka waa Tutsi dia vɔ ndawɔ.” Lonyangu ko, vɔ wakadiake Ɛmɛnyi wa Jehowa wa waa Hutu tshɛ waki laawɔ.—Joani 15:13.

Oko le yɛ, onde Ɛmɛnyi wa Jehowa wekɔ la ngandji ka ndjahombia oko wakate Yeso?