‘Jehowa todimanyiyaka l’otema ɔtɔi’

Edward Herbert ombewi w’ɛkɔndɔ w’ose Grande-Bretagne wa lo ntambe ka 17 akafunde ɔnɛ: “Onto lahadimanyiya anto akina ekɔ oko onto lahembola kilalo kahombande tehɔ ashi.” Ɛtɛkɛta ande ɛsɔ mɛnyaka ɔkɔkɔ ɔmɔtshi wahombaso dimanyiyaka anto akina, nɛ dia kotamba kolembɔ sho la wɔ tayonga l’ohomba wa vɔ todimanyiya. (Mateo 7:12) Koko, tekɔ l’ɔkɔkɔ okina woleki woke wahombaso dimanyiyaka anto akina. Ɔkɔkɔ akɔ tanemaka lo Kɔlɔsayi 3:13.​—Adia.

Lam’ele sho tshɛ kema kokele, lo tena dimɔtshi sho koka salɛ anto akina kɔlɔ kana vɔ tosalɛ. (Rɔmɔ 3:23) Ko, ngande wakokaso mbidja wɔladi lam’asaso l’asekaso anto wele kema kokele? L’ekimanyiyelo ka nyuma k’ekila, ɔpɔstɔlɔ Pɔɔlɔ tolakaka dia sho mbikikanɛ ndo dimanyiyana lam’asaso. Dako sɔ diekɔ ohomba efula ɛlɔ kɛnɛ oko wakidiɔ l’etena kakadiafundama ambeta ɛnɔnyi oko nunu pende. Ɛsɔ tɔsɛdingole la yambalo tshɛ ɛtɛkɛta w’ɔpɔstɔlɔ Pɔɔlɔ ɛsɔ.

“Nyotetemale mbikikanɛ kɔlɔ . . . lam’asanyu.” Etelo k’ɔnɛ “nyotetemale mbikikanɛ kɔlɔ” ndja oma lo tshɛkɛta ya lo Grɛkɛ yalembetshiya minya yimba. Dibuku dimɔtshi mbutaka ɔnɛ Akristo kɛnɛmɔlaka dionga dia dimɛna sɔ lo “mbetawɔ monga la solo dia lotutsha otsha le anto wele waonga awɔ amɔtshi hawotɔngɛnyangɛnya.” Etelo k’ɔnɛ “lam’asanyu” nembetshiyaka dia sho tshɛ pombaka mbikikanɛ. Diakɔ diele, etena kohɔso dia tekɔ la ditshelo dimɔtshi diahangɛnyangɛnya anto akina, hatohombe mbetawɔ dia ditshelo sɔ mfukutanya wɔladi wele lam’asaso la wɔ. Kayotota naka wambotosalɛ kɔlɔ?

“Nyotetemale . . . [dimanyiyana] l’otema ɔtɔi lam’asanyu.” Lo ndjela nomb’ewo kɛmɔtshi, tshɛkɛta ya lo Grɛkɛ yokadimɔmi ɔnɛ: “Dimanyiya l’otema ɔtɔi” “bu tshɛkɛta yakamba l’anto y’ɔnɛ edimanyielo . . . , koko yɔ nembetshiyaka awui efula ndo yɔ mbikaka epole ɔsɛkɛ l’ohomba wa dimanyiya l’otema ɔtɔi.” Dibuku dikina mbutaka dia etelo kɛsɔ koka nembetshiya nto “salɛ onto lakatosalɛ kɔlɔ ɔlɔlɔ ndo mbokombolɛ lokolo l’ɔlɔ.” Sho mɛnyaka dia tekɔ lo mboka anto akina kɛtshi, lo mbadimanyiya l’otema ɔtɔi oyadi etena keso ‘la dikambo dia mbanyangɛ.’ Ko, lande na kahombaso mbokana kɛtshi polo ndo lo yɛdikɔ shɔ? Ɔkɔkɔ ɔmɔtshi ele, weho akɔ tshɛ sho la wɔ tayonga l’ohomba wa vɔ todimanyiya lushi lɔmɔtshi.

“Oko wakanyodimanyiya Jehowa l’otema ɔtɔi, nyu lawɔ pombaka dimanyiya asekanyu.” Ɔkɔkɔ woleki woke wahombaso dimanyiya anto akina ele: Jehowa Nzambi todimanyiyaka l’otema ɔtɔi. (Mika 7:18) Ohokanyiya yema lo kɛnɛ kendana la kɛtshi k’efula kooka Jehowa atshi wa pɛkato wayatshumoya. Otshikitanyi la so, Jehowa atasalaka pɛkato. Koko, nde mbetawɔka dimanyiya atshi wa pɛkato wayatshumoya kaanga mbeyande dia ndooko lushi lalongamɛnde dia vɔ ndjowodimanyiya. Lo mɛtɛ, Jehowa ekɔ ɛnyɛlɔ koleki tshɛ k’onto ladimanyiya l’otema ɔtɔi atshi wa pɛkato wayatshumoya.

Kɛtshi kaki Jehowa tosukanyaka la nde ndo totshutshuyaka dia sho mbookoya. (Ɛfɛsɔ 4:32–5:1) Diakɔ diele, ayonga dimɛna wɛ ndjambola ɔnɛ: ‘Lam’ele Jehowa dimanyiyakami, lande na kahombami ntona dimanyiya asekami ambetawudi wele keema kokele wayatshumonya l’otema ɔtɔi etena kasalɛwɔ kɔlɔ?’​—Luka 17:3, 4.