Onde sho koka mɛtɛ ngɛnyangɛnya Nzambi?
Ondo wɛ ambadiaka ɛkɔndɔ w’anto watɛkɛtama lo Bible la diambo di’efula ndo wɛ ambotaka ɔnɛ: ‘Dimi hakoke monga oko vɔ.’ Ondo wɛ mbeyaka mbuta wate: ‘Dimi keema onto laha l’onongo kana kanga losembwe ndo aha nshi tshɛ mbatomosalaka kɛnɛ kele ɔlɔlɔ.’
Jɔbɔ aki ‘onto laha l’onongo ndo kanga losembwe.’—Jobo 1:1
Jɔbɔ laki owandji wa nkumbo akɔsamaka oko ‘onto laha l’onongo ndo kanga losembwe.’ (Jobo 1:1) Lɔta akelamɛ ɔnɛ “onto ɔlɔlɔ.” (2 Petero 2:8) Ndo vɔ mbutaka lo dikambo dia Davidɛ ɔnɛ nde akasalaka ‘kɛnɛ kaki ɔlɔlɔ’ lo washo wa Nzambi. (1 Khumi ya Dikanga 14:8) Koko, nyɛsɔ tɔsɛdingole la yambalo tshɛ nsɛnɔ y’anto asɔ watɛkɛtama lo Bible. Tayɛna dia 1) vɔ wakasale munga, 2) sho koka nkondja wetshelo efula oma lo bɛnyɛlɔ diawɔ, ndo 3) anto wele keema kokele koka ngɛnyangɛnya Nzambi.
VƆ WAKASALE MUNGA
“[Nzambi] akashimbɛ Lɔta, onto ɔlɔlɔ laki la lonyangu l’efula l’ɔtɛ wa lɔkɛwɔ la fumbɔ nsɔnyi laki l’anto wa kɔlɔ.”—2 Petero 2:7
Jɔbɔ akadiɛnɛ l’asui efula wakɛnama oko tshondo ya wɛngiya. Nde aki la kanyi ya kɔlɔ, lo mbuta ɔnɛ Nzambi hayakiyanya dikambo diande oyadi nde aki la mbetawɔ le nde kana bu. (Jobo 9:20-22) Jɔbɔ akayashikikɛ dia nde aki la losembwe ndo le anto akina ekɔ oko nde akayatombolaka dia nde ndeka Nzambi ɔlɔlɔ.—Jobo 32:1, 2; 35:1, 2.
Lɔta akengenga nsala kɛnɛ kakahombe monga yɛdikɔ ya dimɛna ndo yokɛma hwe. Nde akanyange efula oma lo lɔkɛwɔ la mindo la anto wakadjasɛka la Sɔdɔma la Gɔmɔra, ndo “wakawoshaka paa l’asolo” oma lo lɔkɛwɔ lawɔ. (2 Petero 2:8) Nzambi akewoya dia nanya esomba wa kɔlɔ ɛsɔ ndo akasha Lɔta diaaso dia nde mpanda nde la nkumbo kande. Wɛ koka nkanyiya ɔnɛ dui sɔ diakatshindja Lɔta wɔɔngɔ ndo nde mbakahombe monga onto la ntondo la ntomba oma l’osomba ɔsɔ. Koko l’etena ka kɔlɔ kɛsɔ, nde akatshimbatshimba. Andjelo wanɛ wakatomama dia ndjootshungola nde la nkumbo kande wakaakimɛ l’anya ndo wakaatondja oma l’osomba dia mbakokɛ.—Etatelu 19:15, 16.
Davidɛ ‘akayele Nzambi la otema ande tshɛ lo nsala paka kɛnɛ kaki ɔlɔlɔ lo washo wa Nzambi.’—1 Khumi ya Dikanga 14:8
Lo diaaso dimɔtshi, Davidɛ akɛnya dia nde bu la ndjakimɛ ndo akasale loseka la wadi akana. Lo nsala la wolo dia mbishɛ kɛnɛ kakandasale, Davidɛ akadiake omi aki womoto akɔ. (2 Samuele, tshapita 11) Bible mbukata dia kɛnɛ kakasale Davidɛ ‘kɔngɛnyangɛnya Jehowa kaanga yema.’—2 Samuele 11:27.
Jɔbɔ, Lɔta ndo Davidɛ vɔ tshɛ wakasale munga ndo munga mɔtshi yakawasale yaki weke efula. Koko oko wayotodiɛna, vɔ waki la nsaki k’oma k’ɛse otema ka kambɛ Nzambi l’okitanyiya tshɛ. Vɔ wakɛnya la lolango lawɔ dia wakanyange lo kɛnɛ kakawasale ndo wakasale etshikitanu wahombama. Koko, Nzambi akawaoke ngandji ndo Bible mɛnyaka dia vɔ waki anto waki la kɔlamelo.
WETSHELO AKƆNA WAKOKASO NKONDJA?
Oko weso anto wele kema kokele, hatokoke mbewɔ dia nsala munga. (Rɔmɔ 3:23) Koko etena kasalaso munga, sho pombaka mɛnya dia tambonyanga ndo oma laasɔ nsala kɛnɛ kakokaso nsala dia mbidja akambo l’ɔnɔngɔ.
Ko ngande wele Jɔbɔ, Lɔta, ndo Davidɛ wakadje akambo l’ɔnɔngɔ? L’otema ande, Jɔbɔ akikɔ onto l’olowanyi. L’ɔkɔngɔ wa Nzambi nkana la nde yimba, Jɔbɔ akatshikitanya ekanelo kande ka kɔlɔ ndo akanyange lo kɛnɛ kakandate. (Jobo 42:6) Kanyi yaki Lɔta lo kɛnɛ kendana la lɔkɛwɔ la mindo l’anto waki l’osomba wa Sɔdɔma la Gɔmɔra akɔtɔnɛka tshɛ lo tshɛ la atɔndɔ waki Nzambi. Koko woho wakinde kosala akambo la shamanya mbakikɔ kɔlɔ. L’ekomelo, nde akalawɔ esomba wakalanyema ɛsɔ ndo akahande elanyelo kaki Nzambi kɛsɔ. L’okitanyiya tshɛ, nde komenda l’ɔkɔngɔ kɛnɛ kakandatshike. Kaanga mbele Davidɛ akasale munga ka woke lo nsekola ɔlɛmbɛ waki Nzambi, nde akashola kɛnɛ kaki mɛtɛ l’otema ande lo ndjatshumuya l’otema ɔtɔi ndo lo nɔmba kɛtshi kaki Nzambi.—Osambu 51.
Kanyi yaki Nzambi lo dikambo dia anto asɔ mbɔtɔnɛka la kɛnɛ kalongamɛnde oma le anto wele kema kokele. Nzambi ‘mbeyaka dimɛna woho wakatakengama, nde mbohɔka dia tekɔ ditshu.’ (Osambu 103:14) Ko, naka Nzambi mbeyaka dia sho hatokoke mbewɔ nsala munga, kakɔna kalongamɛnde le so?
Nzambi ‘mbeyaka dimɛna woho wakatakengama, nde mbohɔka dia tekɔ ditshu.’—Osambu 103:14
NGANDE WAKOKA ANTO WELE KEEMA KOKELE NGƐNYANGƐNYA NZAMBI?
Dako diaki Davidɛ otsha le Sɔlɔmɔna y’ɔnande tɛnyaka kɛnɛ kahombaso nsala dia ngɛnyangɛnya Nzambi: ‘Wɛ Sɔlɔmɔna ɔnami le, eya Nzambi ka shɔ ndo kambɛnde olimu l’otema ɔtɔi.’ (1 Ekondo 28:9) Kakɔna kalembetshiya otema ɔtɔi? Ekɔ otema walanga Nzambi ndo wayashikikɛ dia mbeya ndo nsala lolango lande. Ɔsɔ keema otema wa kokele, koko ekɔ otema wakombola dia kambɛ Nzambi l’okitanyiya tshɛ ndo wele suke dia mingɔma. Lam’ele vɔ wakokaka Nzambi ngandji ndo waki la nsaki ka mbokitanyiya, Nzambi akɔshi Jɔbɔ oko ‘onto laha l’onongo,’ Lɔta oko “onto ɔlɔlɔ” ndo Davidɛ oko onto lakasalaka ‘kɛnɛ kaki ɔlɔlɔ’ lo washo wa Nzambi. Kaanga mbakawasale munga, vɔ wakangɛnyangɛnya Nzambi.
Nkamba la otema ɔtɔi kɛdikɛdi monga suke dia nsala lolango la Nzambi ndo tshutshuyama la nsaki ka wolo ka mbookambɛ l’okitanyiya tshɛ
Ɔnkɔnɛ, naka tokanyi ta kɔlɔ tahatakombodi tambotoyɛ lo wɔɔngɔ, kana tambota dui dimɔtshi dia nsɔnyi kana nsala akambo wakokaso ndjɛna l’ɔkɔngɔ ɔnɛ wekɔ kɔlɔ, nyɛsɔ tokondja dihonga oma lo bɛnyɛlɔ diambotɔsɛdingola. Nzambi mbeyaka dia sho hatokoke monga kokele l’etena kɛnɛ. Koko nde nongamɛka dia sho mbooka ngandji ndo monga la okitanyiya. Naka sho nsala akambo asɔ l’otema ɔtɔi, kete ndo sho lawɔ koka monga l’eshikikelo dia sho koka ngɛnyangɛnya Nzambi.