Kambɛ Jehowa lo ‘nshi ya paa’

ERNST laya l’ɛnɔnyi 70 l’ɛmɔtshi, akayakiyanyaka ɔnɛ: “Ekakatanu wendana la yoonge yami wekɔ lo taleke mfula tsho.”a Onde ndo wɛ mboka ngasɔ? Naka wɛ ekɔ lo tatshunde tsho ndo oyaoka dia wɛ ambotatɛ nshisha wolo ayɛ wa demba, wɛ koka mboka dia kɛnɛ kotami lo Undaki tshapita 12 mbɔtɔnɛka layɛ. Lo divɛsa 1, nshi y’osombe mbelamɛka ɔnɛ “nshi ya kolo,” kana ‘nshi ya paa.’ Kaanga mbediɔ ngasɔ, ndooko kɛnya ɔnɛ wɛ ayongaka la lɔsɛnɔ la paa. Wɛ koka ntetemala monga la lɔsɛnɔ la dimɛna lo kambɛka Jehowa l’ɔngɛnɔngɛnɔ.

ONGA LA MBETAWƆ KA WOLO

Anangɛso l’akadiyɛso wa ngandji w’esombe le, nyu bu ekalema etena kenyu l’ehemba. Ekambi wa Jehowa w’esombe wa lo nshi yakafundamaka Bible waki l’ekakatanu akɔ waamɛ. Ɛnyɛlɔ, Isaka, Jakɔbɔ, ndo Ahidja wakayonga totshungu. (Etat. 27:1; 48:10; 1 Khum. 14:4) Sara akayaoke dia nde hayokoka “nungamela otshoko.” (Etat. 18:11, 12) Nkumekanga Davidɛ ‘akokaka paka tshitshi keto.’ (1 Khum. 1:1) Barazilai kondjokoka mboka diɛndjɛ dia mbo ya ndɛ kana ɔlɔ wa mishiki. (2 Sam. 19:32-35) Abrahama ndo Naɔmi wakalɔshanaka la lɔkɔnya l’oshishelo w’olonganyi.—Etat. 23:1, 2; Ruta 1:3, 12.

Kakɔna kakakimanyiya onto l’onto dia ntshikala la kɔlamelo le Jehowa ndo nama ɔngɛnɔngɛnɔ? L’ɔtɛ wakinde la mbetawɔ lo alaka waki Nzambi lo nshi yande y’osombe, Abrahama “akakeketala oma lo mbetawɔ kande.” (Rɔmɔ 4:19, 20) Sho lawɔ pombaka monga la mbetawɔ ka wolo. Mbetawɔ ka ngasɔ halemanɛ l’ɛnɔnyi, l’akoka kana akambo wele la so. Ɛnyɛlɔ, kaanga etena kakinde wɔdu, tshungu, ndo baka la hemɔ, owandji wa nkumbo Jakɔbɔ akɛnya mbetawɔ ka wolo lo alaka waki Nzambi. (Etat. 48:1-4, 10; Hɛb. 11:21) Nshi nyɛ, kadiyɛso Ines lele l’ɛnɔnyi 93 ekɔ lo diɛnɛ la hemɔ k’emunyi mbɔlaka, koko nde mbutaka ate: “Lushi tshɛ dimi mbokaka dia lambɔtshɔkwama efula oma le Jehowa. Dimi kanyiyaka dikambo dia Paradiso lushi tshɛ. Dui sɔ mbishakami elongamelo.” Ande yoho ya dimɛna ya mɛna akambo la sso di’ɔlɔlɔ lee!

Sho keketshaka mbetawɔ kaso lo nɔmbaka, sɛdingolaka Ɔtɛkɛta wa Nzambi ndo mbɔtɔka nsanganya y’Akristo. Omvutshi Danyɛlɛ laki aya osombe akalɔmbaka tena tshɛ mbala shato lo lushi ndo akekaka Ɔtɛkɛta wa Nzambi. (Dan. 6:10; 9:2) Anna laki wadi aki odo l’osombe aki l’etete, “ndooko lushi lakandetsha lo tɛmpɛlɔ.” (Luka 2:36, 37) Etena katshɔyɛ lo nsanganya naka wɛ ekɔ l’akoka ndo kashayɛ kɔmatɛrɛ yakokayɛ mbisha, wɛ keketshaka anto tshɛ wakatshwe, koko aha wɛmɛ oto. Ndo tena tshɛ, Jehowa ngɛnangɛnaka mpokamɛ alɔmbɛlɔ ayɛ, kaanga naka wɛ ekɔ l’elelo lo kɛnɛ kakokayɛ nsala.—Tuk. 15:8.

Efula ka l’atei anyu wele la mbetawɔ kombolaka mɛna dia mbadɛ ndo nkondja wolo wa ntshɔ lo nsanganya, koko wɛ ekɔ lo nsala awui asɔ l’okakatanu kana ondo bu. Ahombayɛ nsala laasɔ? Kamba dimɛna la dikoka tshɛ diele la yɛ. Anto efula wele bu l’akoka wa ntshɔ lo nsanganya yihokamɛka lo telefɔnɛ. Kaanga mbahandayɛna, Inge lele l’ɛnɔnyi 79 nɔngɔsɔlaka nsanganya lo nkamba la akatshi wele l’efundelo wa l’alɛta wa weke wawosha ɔnangɛso ɔmɔtshi la l’etshumanelo.

Mbeyaka monga ko wɛ ekɔ la ɛngɔ kɛmɔtshi kele anto akina bu la tɔ, ɛnyɛlɔ wenya. Shi wɛ koka pokamɛka wadielo wa Bible wakadjama l’eshinga, ekanda walembetshiya Bible, asawo, ndo adramɛ wa lohokamɛ? Ndo nto, wɛ koka ntatɛ mbelɛ asekayɛ ambetawudi lo telefɔnɛ dia mbasha woshasha ɔmɔtshi wa lo nyuma ndo ‘keketshana la wɔ.’—Rɔmɔ 1:11, 12.

TETEMALA NDJASHA L’OLIMU WA NZAMBI

Christa lele l’ɛnɔnyi 80 l’ɛmɔtshi, mbutaka la lonyangu tshɛ ate: “Ekɔ dui dia kɔlɔ dia monga ko hatoyoyasha efula oko wakatasalaka.” Ko, epalanga w’anto akokawɔ nsala dia ntetemala monga l’ɔngɛnɔngɛnɔ? Peter laya l’ɛnɔnyi 75 mbutaka ɔnɛ ele, “lo mɛna akambo la sso di’ɔlɔlɔ, aha nkanyiya lo dikambo dia kɛnɛ kahatayokoka nsala, koko tɔngɛnɛngɛnɛ la kɛnɛ kakokaso nsala.”

Shi wɛ koka nkanyiya toho t’esambishelo takokayɛ nsala? Kadiyɛso Heidi hayokoka nsambisha lo luudu la luudu oko wakandasalaka. Diakɔ diele, etena kakandakotsha ɛnɔnyi 80 l’ɛmɔtshi, nde akafundanɛka mikanda lo ɔrdinatɛrɛ. Apandjudi amɔtshi w’esombe kɛtshanyaka l’anto awui wa lo Bible etena kodjashiwɔ l’ekala wa lo parkɛ kana ahole wemala mituka. Naka wɛ ekɔ lo mbidjasɛ lo luudu lalamawɔ esombe, shi wɛ koka mbɔsa dihole sɔ oko “ɛtshi kayɛ ka nkɛtɛ” ndo enganga wakokokɛ ndo anto akina wadjasɛ lɛkɔ?

Lo ɛnɔnyi w’ekomelo wa lɔsɛnɔ lande, nkumekanga Davidɛ akasukɛ ɔtɛmwɛlɔ wa mɛtɛ. Nde akakimɔ weshasha efula ndo akayakongɛ dia sukɛ wokelo wa tɛmpɛlɔ. (1 Ek. 28:11–29:5) Woho akɔ waamɛ mbele, wɛ koka ndjasha dia mbeya kɛnɛ kasalema l’olimu wa l’andja w’otondo wa Diolelo ndo nsala kɛnɛ tshɛ kakokayɛ nsala dia sukɛ. Shi wɛ koka sukɛ ambatshi mboka kana apandjudi akina wele l’ohetoheto l’etshumanelo kanyu la ɛtɛkɛta wakeketsha, mbasha weshasha wa totshitshɛ kana mbasha yangɔ ya ndɛ? Lo alɔmbɛlɔ ayɛ, wɛ koka shilaka ɛlɔngɔlɔngɔ la esekaseka, nkumbo, ekambi wa lo tena tshɛ, wanɛ wele la hemɔ ndo wanɛ wele l’ɛkɛndɛ efula.

Wɛ la olimu wakambayɛ mbɔsamaka la nɛmɔ di’efula. Anangɛso la akadiyɛso w’esombe le, Shɛso lele l’olongo hanyokalɛki pondjo. (Osam. 71:9) Jehowa nyokaka ngandji ndo nyɔsaka la nɛmɔ di’efula. Kem’edja nto, sho tshɛ tayanga monga epalanga, waha l’ekiyanu kana paa. Koko, wele la wolo efula, la yoonge ya kokele ndo tayotetemalaka kambɛ Jehowa Nzambi kaso ka ngandji pondjo pondjo!