Tetemala kongɛɛ

1, 2. Dionga diakɔna diele l’ekambi wa Jehowa?

EKAMBI wa Jehowa wokokongɛka la solo dia lotutsha tshɛ okotshamelo wa prɔfɛsiya. Ɛnyɛlɔ, Jɛrɛmiya akalongamɛka dia ase Babilɔna wayolanya Juda, ndo kɛsɔ mbakasalema lo 607 ntondo ka Yeso mbotɔ. (Jeremiya 25:8-11) Isaya akewoya dia Jehowa ayokaloya ase Juda waki lo lɔhɔmbɔ l’osomba awɔ wa Juda ndo akate ate: “Waku tshe watulungamelaka le ndi weli la otshoko.” (Isaya 30:18) Mika nde la wɔ akalongamɛka dia alaka wa Jehowa wayokotshama ndo nde akate ate: ‘Dimi layotetemala mendɛ le Jehowa.’ (Mika 7:7) Ndo l’edja k’ɛnɔnyi nkama, ekambi wa Nzambi waki l’eshikikelo ɔnɛ Mɛsiya wakalakema kana Kristo ayoya.—Luka 3:15; 1 Petero 1:10-12.a (Enda nɔtɛ ka l’ɛse ka dikatshi.)

² Ɛlɔ kɛnɛ, sho la wɔ tekɔ lo kongɛɛ okotshamelo wa prɔfɛsiya yendana la Diolelo dia Jehowa. Kem’edja, Yeso Nkumekanga ka Diolelo sɔ, ayanga ntshungola ekambi wa Nzambi oma l’andja ɔnɛ wa waale. Nde ayolanya anto wa kɔlɔ ndo ayokomiya asui tshɛ. (1 Joani 5:19) Diakɔ mbele, sho pombaka ntetemala kongɛɛ lushi la Jehowa ɔnɛ layoya l’etena kakɔna tshɛ ndo nsala kɛnɛ tshɛ kakokaso nsala dia monga suke dia lushi lakɔ.

3. Naka aya edja efula kakongɛso ekomelo, naa dimbola diakokaso ndjotatɛ ndjambola?

³ Mɛtɛ, tekɔ lo kongɛɛ l’asolo walomɔlomɔ lushi layosalema lolango la Nzambi la nkɛtɛ. (Mateo 6:10) Koko naka aya ɛnɔnyi efula wakongɛso ekomelo, sho koka ndjotatɛ ndjambola ɔnɛ: ‘Lande na kahombaso ntetemala nongamɛ ɔnɛ ekomelo kaya suke?’

LANDE NA KAHOMBASO NTETEMALA NONGAMƐ ƆNƐ EKOMELO KAYA SUKE?

4. Lande na kele ekɔ ohomba dia sho ‘ntetemala nsungukalaka’?

⁴ Yeso akadjangɛ ambeki ande ɔnɛ ‘nyotetemala nsungukalaka’ ndo “nyɔsɛnake.” Diakɔ diele, ekɔ ohomba efula sho ntetemala nongamɛ ɔnɛ ekomelo kaya suke. (Mateo 24:42; Luka 21:34-36) Ndo nto, okongamelo wa Jehowa wekɔ lo ntetemala tohola dia ‘kongɛɛ ndo mbohɔka woongelo wa lushi la Jehowa’ ndo ndeka mbidja yimba lo daka dia Jehowa di’andja w’oyoyo.—Adia 2 Petero 3:11-13.

5. Naa ɛkɔkɔ ekina wele la so watokonya dia ntetemala nongamɛ lushi la Jehowa?

⁵ Naka ambeki wa Yeso wa lo ntambe ka ntondo wakahombe ntetemala nongamɛ lushi la Jehowa, kete dui sɔ diamboleka monga ohomba leso ɛlɔ kɛnɛ. Lande na? Nɛ dia tolembetelo takasha Yeso shikikɛka dia nde ambongaka Nkumekanga ka Diolelo dia Nzambi oma ko 1914 ndo ɔnɛ tekɔ lo nsɛna lo nshi y’ekomelo k’andja, kana ‘ekomelo ka dikongɛ nɛ di’akambo.’ Ɛnyɛlɔ paka oko wakadite Yeso, akambo wa l’andja ɔnɛ wekɔ lo taleke ntshɔ otsha lo kɔlɔ ndo lokumu l’ɔlɔlɔ la Diolelo lambosambishama l’andja w’otondo. (Mateo 24:3, 7-14) Yeso kombuta edja ka ngande kayonga nshi y’ekomelo, laasɔ sho pombaka ndjalɔngɔsɔla nɛ dia ekomelo kayoya l’etena kakɔna tshɛ.

6. Ngande weyaso ɔnɛ akambo wa l’andja ɔnɛ wayoleka ntshɔ otsha lo kɔlɔ lo yɛdikɔ yatataleke sukana l’ekomelo?

⁶ Onde ‘ekomelo ka dikongɛ nɛ di’akambo’ mendanaka l’etena ka lo nshi yayaye kayoleka andja ɔnɛ monga kɔlɔ? Bible mbutaka di’anto wa kɔlɔ wayotalekaka monga kɔlɔ “lo nshi y’ekomelo.” (2 Timɔte 3:1, 13; Mateo 24:21; Ɛnyɛlɔ 12:12) Akambo wamboleka kɔlɔ nshi nyɛ ndo sho mbeyaka dia vɔ wayotetemala ntshɔ otsha lo kɔlɔ.

7. Kakɔna katetsha Mateo 24:37-39 lo kɛnɛ kendana l’akambo wa l’andja ɔnɛ lo nshi y’ekomelo?

⁷ Anto amɔtshi koka mfɔnya ɔnɛ la ntondo ka “mfɔnu ka woke” ndja, ata wayonga lo wedja tshɛ ndo anto efula wayotata elando kana mvɔ ndjala. (Ɛnyɛlɔ 7:14) Koko naka awui asɔ salema ngasɔ, kete anto tshɛ wayeya ɔnɛ prɔfɛsiya ya lo Bible yamboshila kotshama. Kete kaanga anto wahayasha lo kɛnɛ kata Bible wayɛna awui asɔ hwe. Tohɔ dia Yeso akate ɔnɛ lo nshi y’ekomelo, anto efula ‘hawotodja yimba.’ Vɔ wayɔsɛnaka lɔsɛnɔ paka oko wokowɔsɛnaka lushi la lushi ndo wayoyokashimɔ tsho paka lushi la Jehowa lamboya. (Adia Mateo 24:37-39.) Mbokɛmaka hwe dia, hatohombe nongamɛ ɔnɛ akambo wayonga kɔlɔ k’efula la ntondo ka “mfɔnu ka woke” dia ntshutshuya anto dia mbetawɔ ɔnɛ ekomelo kaya suke.—Luka 17:20; 2 Petero 3:3, 4.

8. Lam’ele tambɛna ekotshamelo ka tolembetelo takasha Yeso, tekɔ l’eshikikelo kakɔna?

⁸ Naka Yeso akasha ambeki ande tolembetelo, kete l’oyango wa mbahɛmɔla di’etena kayowɔsɛna. Ambeki wa Yeso wakahombe nsungukala. (Mateo 24:27, 42) Oma ko 1914, tenyi diotshikitanyi dia djembetelo yakasha Yeso diakakotshama. Tekɔ l’eshikikelo ɔnɛ tekɔ lo nsɛna lo nshi y’ekomelo, mbuta ate ‘l’ekomelo ka dikongɛ nɛ di’akambo.’ Jehowa amboshilaka nshikikɛ etena kayondolanya andja wa kɔlɔ waki Satana.

9. Lande na kahombaso ntetemala nongamɛ ɔnɛ ekomelo kaya suke?

⁹ Ko lande na kahombaso ntetemala nongamɛ ɔnɛ ekomelo kaya suke? Nɛ dia sho kitanyiyaka Yeso Kristo. Ndo nto, tambɛna hwe ekotshamelo ka tolembetelo takasha Yeso tendana la nshi y’ekomelo. Sho mbetawɔka di’ekomelo kaya suke, aha nɛ dia sho mbetawɔka dui tshɛ diokaso, koko nɛ dia tamboshikikɛ ɔnɛ prɔfɛsiya ya lo Bible yekɔ lo takotshama. Sho pombaka nsungukala ndo monga suke lo dikambo dia lushi l’ekomelo.

EDJA KA NGANDE KAHOMBASO KONGƐƐ?

10, 11. a) Lande kakatɛ Yeso ambeki ande dia ‘ntetemala nsungukala’? b) Kakɔna kakatɛ Yeso ambeki ande dia nsala naka ekomelo kataye esadi oko wakawafɔnyaka? (Enda osato wele lo mbɔtwɛlɔ.)

¹⁰ Efula l’atei aso wambokambɛ Jehowa la kɔlamelo tshɛ ndo wambokongɛ oyelo wa lushi lande l’edja k’ɛnɔnyi efula. Oyadi l’edja ka ngande kambotokongɛ, sho pombaka ntetemala nongamɛ ɔnɛ lushi lɔsɔ laya suke la ndja. Sho pombaka monga suke etena kayanga Yeso ndanya andja waki Satana. Tohɔ kɛnɛ kakatɛ Yeso ambeki ande dia vɔ nsala: “Nyendake, nyɔsɛnake, nɛ dia nyu hanyeye etena kakashikikɛma. Ekɔ oko onto latatshu lo wodja okina ko nde ntshika luudu lande ndo mbisha ase olimu ande lowandji lo mbisha onto l’onto olimu ande ndo mbutɛ olami wa soko dia nde sungukalaka. Ɔnkɔnɛ, nyosungukalake nɛ dia hanyeye etena kayoya Owandji wa luudu, kana la dikɔlɔ kana l’atei wa deke kana la yosose kana la pindju, kele lam’ayondoya la shashimoya, nde atonyotanake nyoladi djɔ. Koko kɛnɛ kanyotɛmi, mbatɛmi ndo anto tshɛ nte: Nyosungukalake.”—Makɔ 13:33-37.

¹¹ Etena kakashihodia ambeki wa Yeso ɔnɛ nde ambotatɛ mbolɛ lo 1914, vɔ wakashikikɛ dia ekomelo kokaka ndja l’etena kakɔna tshɛ. Ɔnkɔnɛ, vɔ wakayalɔngɔsɔla lo dikambo dia tɔ lo ndjasha efula l’olimu w’esambishelo. Yeso akate dia nde koka ndja yema l’ɔkɔngɔ, “l’atei wa deke kana la yosose kana la pindju.” Naka ngasɔ mbayodionga, kakɔna kahomba ambeki ande nsala? Yeso akate ate: ‘Nyotetemale nsungukala.’ Ɔnkɔnɛ, kaanga naka tɔfɔnya ɔnɛ tambokongɛ edja efula, kɛsɔ halembetshiya ɔnɛ ekomelo keke etale efula kana hatoya etena kekeso la lɔsɛnɔ.

12. Kakɔna kakalɔmbɛ Habakuka Jehowa, ndo ngande wakandokadimola?

¹² Ɔprɔfɛta Habakuka akakongɛ la solo dia lotutsha tshɛ etena kakandasambishaka dia elanyelo ka Jɛrusalɛma. Aprɔfɛta akina waki la ntondo kande vɔ la wɔ wakasambishaka losango lɔsɔ l’edja k’ɛnɔnyi efula. Habakuka akakoke mɛna di’akambo wa kɔlɔ ndo wɛngiya wamboleka woho wakiwɔ ntondo. Nde akasɛngasɛnga Jehowa efula dia mbokimanyiya lo mbombola ɔnɛ: “[Jehowa] li, edja ndu kaandi ayumulela ekimanyelu”? Kaanga mbele Jehowa kombuta etena kakahombe ekomelo ndja, nde akalake Habakuka ɔnɛ: “To kayuya mete, hakiutshimbatshimba.” Jehowa akatɛ Habakuka nto dia ‘ntetemala kongɛɛ.’—Adia Habakuka 1:1-4; 2:3.

13. Kakɔna kakakoke Habakuka mfɔnya, ndo lande na kele dui sɔ diotowoongɛ waale?

¹³ Tɔshi dia Habakuka akatshike kongɛɛ ekombelo ndo akate ɔnɛ: ‘Lambokongɛ elanyelo ka Jɛrusalɛma ɛnɔnyi efula. Ekomelo keke etale efula. Handjosambisha lo dikambo diatɔ nto. Anto akina watokokamba olimu ɔsɔ.’ Kakɔna kotoyosalema otondonga l’ekanelo ka ngasɔ? Totondetawɔma nto le Jehowa. Ndo otondonga nde komonga suke etena kakayoya ekomelo, tshike nde otolanyema.

14. Lande na kayotɔngɛnangɛna l’ɔtɛ wakatɔhɛmɔlaka Jehowa dia ntetemala kongɛɛ ekomelo?

¹⁴ Ohɔsa dia wɛ aya l’andja w’oyoyo. Akambo tshɛ wakatama lo dikambo dia nshi y’ekomelo wambokotshama paka oko wakate Jehowa. Wɛ ayoleka ndjaɛkɛ le Jehowa ndeka nshi ya ntondo, ndo wɛ ayoleka monga l’eshikikelo ɔnɛ nde ayosala awui akina tshɛ wakandalake. (Adia Jashua 23:14.) Wɛ ayoleka ngɛnangɛna nɛ dia Jehowa ambela ekomelo l’etena ka dimɛna ndo ɔnɛ nde akahɛmɔla ekambi ande dia ntetemala kikongɛ.—Etsha 1:7; 1 Petero 4:7.

TOTETEMALE NSAMBISHA LAM’AWESO LO KONGƐƐ

15, 16. Lande na kahombaso nsala kɛnɛ tshɛ kakokaso nsala l’olimu w’esambishelo lo nshi y’ekomelo nyɛ?

¹⁵ Okongamelo wa Jehowa wayotetemala tohola dia ndeka ndjasha dia kambɛ Jehowa. Waohwelo asɔ tokimanyiyaka aha tsho dia monga l’akambo efula wa nsala l’olimu wa Nzambi, koko ndo dia mɛna hwe ɔnɛ losango laso pombaka mbewoyama la shamanya. Tamboshikikɛ dia tolembetelo takasha Yeso tekɔ lo takotshama l’etena kɛnɛ ndo ɔnɛ ekomelo kaya suke suke. Diakɔ diele, tekɔ lo mbetsha Jehowa lo dihole dia ntondo lo nsɛnɔ yaso ndo tekɔ lo ntetemala nsambisha lokumu l’ɔlɔlɔ lendana la Diolelo.—Mateo 6:33; Makɔ 13:10.

¹⁶ Etena kasambishaso anto akina lokumu l’ɔlɔlɔ, sho mbakimanyiyaka dia vɔ ndjoshimbamɛ oma l’elanyelo k’andja wa Satana kaya suke. Mpokoso kɛmɔtshi koleki kɔlɔ kakasalema lo ndjale lo 1945 etena kakadinde masuwa Wilhelm Gustloff. Anto nunu wakavu. Kadiyɛso kɛmɔtshi nde la omɛnde wakake lo masuwa akɔ. Nde mbohɔka dia etena kakatadindaka masuwa akɔ, womoto ɔmɔtshi akalele wolo ɔnɛ: “Atapa ami! Atapa ami! Dɛngalɛnga diami! Dɛngalɛnga diami tshɛ diekɔ l’ɛse lɛnɛ adjawɔ etshumu. Lamboshisha diangɔ diami tshɛ wadjɔ!” Waa pasase kina wakɛnyi kɛnɛ kakaleke ohomba efula ko wakasale la wolo dia shimbɛ nsɛnɔ y’anto. Ɛlɔ kɛnɛ, nsɛnɔ y’anto yekɔ lo waale. Sho lawɔ, nangaka monga oko waa pasase yaha la lokaki shɔ ndo ndeka mbidja yimba l’olimu aso w’esambishelo wa la shamanya. Sho pombaka nsala kɛnɛ tshɛ kakokaso nsala dia nkimanyiya anto dia vɔ ndjoshimbamɛ lo lushi l’ekomelo ka dikongɛ nɛ.

17. Lande na kahombaso mbetawɔ ɔnɛ ekomelo koka ndja l’etena kakɔna tshɛ?

¹⁷ Tambɛna hwe dia prɔfɛsiya ya lo Bible yekɔ lo kotshama ndo ɔnɛ ekomelo ka dikongɛ dia kɔlɔ nɛ kaya suke suke efula. Tekɔ lo kongɛɛ dia “nseke dikumi” ndo “nyama ka ngala” ndɔsha ɛtɛmwɛlɔ wa kashi, mbuta ate Babilɔna ka Woke. (Ɛnyɛlɔ 17:16) Hatohombe mfɔnya ɔnɛ aakahombe mbeta etena k’otale dia dui sɔ salema. Tatohɛke dia Nzambi ayodja “kanyi yande l’etema awɔ” dia ndɔsha ɛtɛmwɛlɔ wa kashi ndo dui sɔ koka salema esadi eto ndo l’etena kakɔna tshɛ! (Ɛnyɛlɔ 17:17) Eelo, ekomelo k’andja wa kɔlɔ wa Satana kaya suke. Diakɔ diele, sho pombaka nkitanyiya ɔhɛmwɛlɔ wa Yeso ɔnɛ: “Nyoyalame diaha etema anyu monga wotsho la deshi dia tshambandeko ndo la nɔshi dia tshambandeko ndo la ekiyanu wa lo lɔsɛnɔ, ko mbala kakɔ ɔtɔi lushi lɔsɔ ndjonyokumɛ la shashimoya oko shunyi ya djonga.” (Luka 21:34, 35; Ɛnyɛlɔ 16:15) Nyɛsɔ tɔsɛnɛ wolo ndo totetemale monga l’akambo efula wa nsala l’olimu wa Jehowa, tele l’eshikikelo ɔnɛ nde “katukimanyiaka wane watûlungamelaka.”—Isaya 64:4.

18. Dimbola diakɔna diayokadimwama lo sawo diayela?

¹⁸ Etena kaakatakonge ekomelo k’andja wa kɔlɔ ɔnɛ, sho pombaka nkitanyiya dako diakasha ombeki Judɛ ɔnɛ: “Nyu analengo wa ngandji, nyoyahike nyamɛ lo mbetawɔ kanyu koleki ekila ndo nyɔlɔmbake lo yoho yɔtɔnɛ la nyuma k’ekila kele nyotshikale lo ngandji ka Nzambi etena kakonganyu kɛtshi ka Nkumɛso Yeso Kristo, nyele l’elongamelo ka lɔsɛnɔ la pondjo.” (Judɛ 20, 21) Ko ngande wakokaso mɛnya dia tekɔ lo nongamɛ ɔnɛ andja w’oyoyo waya suke la ndja ndo ɔnɛ tekɔ lo mbokongɛ l’asolo walomɔlomɔ? Tayɔsɛdingola dui sɔ lo sawo diayela.