Lama lomangemange layɛ l’andja ɔnɛ wambatɔna

1. Ngande wakokaso nkitanyiya Nzambi ndo mandji y’ana w’anto?

BIBLE tetshaka dia sho nkitanyiya mandji y’ana w’anto, koko tɔ totɛka nto dia mbala tshɛ sho pombaka nkitanyiya Nzambi. (Etsha 5:29; Tito 3:1) Ngande wakoka dui sɔ salema? Yeso akalembetshiya tɔndɔ dimɔtshi diatokimanyiya dia mbeya onto akɔna ahombaso nkitanyiya. Nde akate dia sho pombaka mbisha “Kayisa diangɔ dia Kayisa ndo [mbisha] Nzambi diangɔ dia Nzambi.”^[1] (Enda nɔtɛ ka la koma.) (Mateo 22:21) Sho mbishaka “Kayisa diangɔ dia Kayisa” etena kakitanyiyaso ɛlɛmbɛ wa wodja, kasalɛso ewandji wa wodja akambo la dilɛmiɛlɔ ndo kafutaso elambo. (Rɔmɔ 13:7) Koko, naka emboledi wambototɛ dia nsala dikambo dimɔtshi diele Nzambi halange sho disala, sho tonaka nsala dui sɔ, koko ntena tshɛ la dilɛmiɛlɔ.

2. Ngande wɛnyaso ɔnɛ hatoyatambiya lo akambo wa pɔlitikɛ wa l’andja ɔnɛ?

² Yoho mɔtshi yashaso “Nzambi diangɔ dia Nzambi” ele lo mbewɔ ndjatambiya l’akambo wa pɔlitikɛ wa l’andja ɔnɛ. Sho namaka lomangemange laso l’akambo asɔ. (Isaya 2:4) Ntatɛ lam’aketawɔ Jehowa dia mandji y’ana w’anto mbolɛ, sho hatɔlɔshana la yɔ. Ndo nto hatɔtɔ lo akambo wakɛnɛmɔla ngandji ka wodja. (Rɔmɔ 13:1, 2) Sho hatohombe ntshikitanya mandji kana nsɛngiya ase pɔlitikɛ ndo sho hatɔvɔtɛ kana nkoma ase pɔlitikɛ.

3. Lande na kahombaso nama lomangemange laso?

³ Ɛkɔkɔ wekɔ efula watotɛ Nzambi dia monga la lomangemange. Ɔkɔkɔ ɔmɔtshi ele sho mbokoyaka Yeso, ɔnɛ laki ‘komonga la l’andja ɔnɛ.’ Nde kosukɛ pondjo akambo wa pɔlitikɛ kana w’ata. (Joani 6:15; 17:16) Ɔkɔkɔ okina ele sho sukɛka Diolelo diaki Nzambi. Lam’ele sho hatosukɛ mandji y’ana w’anto, tekɔ la nkum’otema ka pudipudi etena kasambishaso ɔnɛ paka Diolelo diaki Nzambi mbayokandola ekakatanu tshɛ wele l’anto. Ɛtɛmwɛlɔ wa kashi mbɔtɔka lo akambo wa pɔlitikɛ ndo dikambo sɔ kakitolaka anto. Koko, lam’ele sho namaka lomangemange laso, tekɔ kaamɛ l’anangɛso ndo l’akadiyɛso wa l’andja w’otondo.—1 Petero 2:17.

4. a) Ngande weyaso dia ayonyomoleka monga wolo nama lomangemange laso? b) Lande na kahombaso ndjalɔngɔsɔla oma ko kakianɛ dia nama lomangemange laso?

⁴ Sho mbeyaka nsɛna lo dihole diele anto hawototshutshuya dia mbɔtɔ lo pɔlitikɛ. Koko, oko wambotoleka nsukana l’ekomelo ka dikongɛ dia Satana nɛ, mbayotoleka monga l’okakatanu wa nama lomangemange laso. Anto wa nshi nyɛ wambotongaka ‘hawokana,’ “akanga w’ɛtɛ wolo” ndo wayonyomoleka kakitɔna. (2 Timɔte 3:3, 4) Anangɛso amɔtshi wambodiɛnɛka l’ɔtɛ w’etshikitanu wa pɔlitikɛ wakasalema la shashimoya lo wodja awɔ. Diakɔ diele sho pombaka ndjalɔngɔsɔla oma ko kakianɛ dia nama lomangemange laso kaanga la ntondo ka dikambo dimɔtshi dia wolo. Nyɛsɔ tɔsɛdingole akambo anɛi wakokaso nsala dia sho ndjalɔngɔsɔla.

TƆSHI MANDJI Y’ANA W’ANTO WOHO WAYƆSA JEHOWA

5. Ngande wɔsa Jehowa mandji y’ana w’anto?

⁵ Yoho mɔtshi yakokaso ndjalɔngɔsɔla oma ko kakianɛ dia nama lomangemange laso, ele lo mbɔsa mandji y’ana w’anto woho wayiɔsa Jehowa. Jehowa kombisha anto lotshungɔ la vɔ mbolɛ anto akina etena kakandaatonge. (Jeremiya 10:23) Nde mbɔsaka anto tshɛ oko nkumbo ɔtɔi. Koko mandji y’ana w’anto mbidjaka diatɔnelo lam’asa anto lo sɛmaka ɔnɛ wodja awɔ ndeka ekina. Kaanga etena kɛnama mandji y’ana w’anto dia yekɔ amɛna, yɔ hayokoke nkandola ekakatanu tshɛ. Ndo nto, yɔ yakakome atunyi wa Diolelo diaki Nzambi, diele diɔ diakatatɛ mbolɛ lo 1914. Kem’edja, Diolelo sɔ diayanga minya mandji tshɛ y’ana w’anto.—Adia Osambu 2:2, 7-9.

6. Ngande wahombaso mbɔsaka anto wele la lowandji lo mandji y’ana w’anto?

⁶ Nzambi mbetawɔka dia mandji y’ana w’anto monga nɛ dia yɔ koka mbidja yema ya wɔladi ndo mbidja yema akambo l’ɔnɔngɔ. Dui sɔ tokimanyiyaka dia sho nsambisha lokumu l’ɔlɔlɔ lendana la Diolelo diaki Nzambi. (Rɔmɔ 13:3, 4) Nzambi totɛka kaanga dia sho nɔmba lo dikambo dia wanɛ wele la lowandji dia sho mbeya mbɔtɛmɔla lo wɔladi. (1 Timɔte 2:1, 2) Etena katosalɛwɔ akambo waha la losembwe, sho mbeyaka nɔmba wanɛ wele la lowandji lo wodja ekimanyielo. Ngasɔ mbakasale Pɔɔlɔ. (Etsha 25:11) Kaanga mbata Bible dia Satana kalɔmbɔla mandji y’ana w’anto, tɔ hate pondjo dia nde nɔmbɔlaka oseka onto tshɛ lele la lowandji lo wodja. (Luka 4:5, 6) Ɔnkɔnɛ, hatohombe mbisha kaanga onto ɔtɔi lokanyi l’ɔnɛ lowandji lɔmɔtshi lekɔ lo nɔmbɔma oma le Diabolo. Bible totɛka dia hatohombe ntɛnga anto akina.—Tito 3:1, 2.

7. Tokanyi takɔna tahombaso mbewɔ?

⁷ Sho kitanyiyaka Nzambi lo mbewɔ nsukɛ ose pɔlitikɛ ɔmɔtshi kana olui ɔmɔtshi wa pɔlitikɛ, kaanga etena kele tokanyi tawɔ koka monga la wahɔ le so. Lo ntena dimɔtshi, dui sɔ hatongaka wɔdu le so. Ɛnyɛlɔ, ohokanyiya di’anto amɔtshi wambɔtɔmbɔkwɛ lowandji lɔmɔtshi lambela asui efula, kaanga le Ɛmɛnyi wa Jehowa. Lo mɛtɛ, wɛ honga l’atei wa wanɛ wambɔtɔmbɔkɔ, ko onde wɛ ayota dia atɔmbɔki wekɔ la shadiya ndo nongamɛ ɔnɛ vɔ wayotondoya? (Ɛfɛsɔ 2:2) Naka sho kombolaka nama lomangemange laso, kete sho pombaka mbewɔ tokanyi t’ɔnɛ wedi ɔmɔtshi wekɔ ɔlɔlɔ kana dimɛna ndeka okina. Dui sɔ diayɛnama lo kɛnɛ katɛkɛtaso ndo kɛnɛ kasalaso.

ONGA LA “YEWO” NDO “AHA LA ONONGO”

8. Etena konga wolo dia nama lomangemange, ngande wakokaso monga la “yewo” ndo “aha la onongo”?

⁸ Yoho ya hende ya nama lomangemange laso ele monga “la yeewo oko eloyi ndo aha la onongo oko tofudu ta benga.” (Adia Mateo 10:16, 17.) Sho mongaka la “yewo” etena kakanyiyaso ekakatanu wele la ntondo kaso. Ndo sho tshikalaka “aha la onongo” etena kalamaso lomangemange la ntondo k’ekakatanu wa wolo. Nyɛsɔ tɔsɛdingole akambo amɔtshi ndo kɛnɛ kakokaso nsala dia nama lomangemange laso.

9. Lo akambo akɔna wahombaso monga la yewo etena katɛkɛtaso l’anto akina?

⁹ Asawo. Sho pombaka monga la yewo y’efula etena katatɛ anto nkɛtshanya akambo wa pɔlitikɛ. Ɛnyɛlɔ, etena katɛkɛtaso l’onto ɔmɔtshi akambo wendana la Diolelo diaki Nzambi, hatohombe mbuta ɔnɛ sho mbetawɔka kana ɔnɛ hatetawɔ tokanyi t’olui wa pɔlitikɛ kapanda kana ɔnɔmbɔdi kapanda. Lo dihole dia nkɛtshanya kɛnɛ kalanga ewandji w’ana w’anto nsala dia nkandola ekakatanu wele l’anto, ɛnyawɔ oma lo Bible woho wayokomiya Diolelo diaki Nzambi ekakatanu ɛsɔ lo pondjo. Naka anto nangaka monga la taamu lo asawo wele oko, diwala dia lam’asa pami la pami kana womoto la womoto kana otondjelo wa diemi, kete tɛwɔ kɛnɛ kata Ɔtɛkɛta wa Nzambi ndo woho wayelayɛ kɛnɛ katatɔ lo lɔsɛnɔ layɛ. Naka onto ɔmɔtshi ambota ɔnɛ ɛlɛmbɛ ɛmɔtshi wakahombe minyama kana tshikitanyema, hatohombe monga lo wedi ande ndo hatokoke tɛtɛ di’onto akɔ ntshikitanya kanyi yande.

10. Ngande wakokaso ndjashikikɛ ɔnɛ tekɔ nama lomangemange laso etena kendaso kana kadiaso akambo amɔtshi wa lo ntita nsango?

¹⁰ Ntita nsango. Ntena dimɔtshi, dui dimɔtshi diotami lo ntita nsango mbeyaka nsukɛ la wolo tshɛ wedi ɔmɔtshi lo dikambo dimɔtshi diambotomba. Dui sɔ ndekaka salema lo wedja wele nsango yekɔ lo nɔmbɔma oma le ewandji wa wodja. Naka atshunda amɔtshi kana tojurunalistɛ wambeta lo wedi ɔmɔtshi, sho pombaka monga la yewɔ di’aha ntatɛ monga la ekanelo kele oko kawɔ. Ɛnyɛlɔ yambola ɔnɛ: ‘Onde dimi ngɛnangɛnaka mpokamɛ jurunalistɛ mɔtshi nɛ dia dimi mbetawɔka awui watande wendana l’akambo wa pɔlitikɛ?’ Dia kokimanyiya dia nama lomangemange, ewɔ menda kana mbadia alapɔlɔ efula wasukɛ wedi ɔmɔtshi lo kɛnɛ kendana l’awui wa pɔlitikɛ. Lo dihole dia nsala ngasɔ, hemba dia nkondja alapɔlɔ wahasukɛ awui asɔ. Ndo lushi tshɛ ɛdikaka kɛnɛ kahokamɛyɛ la “lokongɛ l’ɛtɛkɛta w’eshika” watanema lo Bible.—2 Timɔte 1:13.

11. Lande na kele koka monga okakatanu le so dia nama lomangemange laso naka sho mbɔsa diangɔ diaso la nɛmɔ di’efula?

¹¹ Nsaki ka lomombo. Naka sho mbɔsa falanga kana diangɔ diaso la nɛmɔ di’efula, kete sho kokaka monga l’okakatanu dia nama lomangemange. L’ɔkɔngɔ wa 1970, Ɛmɛnyi wa Jehowa efula wa lo Malawi wakatshike oseka ɛngɔ tshɛ kaki lawɔ l’ɔtɛ wakawatone mbɔtɔ l’olui ɔmɔtshi wa pɔlitikɛ. Lonyangu ko, amɔtshi konanga ntshika lɔsɛnɔ l’ɔngɔnyi. Kadiyɛso kɛmɔtshi kakawelɛka Ruth mbohɔka ate: “Anto amɔtshi wakatshu lo dawo kaamɛ la so, koko l’ɔkɔngɔ diko wakayɔtɔka lo pɔlitikɛ ndo wakayokalolaka la ngelo nɛ dia vɔ konanga ntshikala lo lɔsɛnɔ lakatasɛnaka lo pango ka dawo.” Koko ekambi efula waki Nzambi komonga oko anto asɔ. Vɔ wakalame lomangemange lawɔ, kaanga mbakiwɔ komonga la falanga kana kakawashisha osek’ɛngɔ tshɛ kaki lawɔ.—Hɛbɛru 10:34.

12, 13. a) Kakɔna kakanyiya Jehowa lo dikambo di’anto? b) Ngande wakokaso mbuta naka taya l’ofunu wamboleka lo kɛnɛ kendana la wodja aso?

¹² Otako. Anto wekɔ la mbekelo ka monga l’otako ndo l’ ofunu lo kɛnɛ kendana la lokoho lawɔ la demba, dioho diawɔ, mbekelo yawɔ, osomba awɔ kana wodja awɔ. Koko, Jehowa hɛnyi dia onto ɔmɔtshi kana olui ɔmɔtshi w’anto wekɔ dimɛna ndeka okina. Le nde, sho tshɛ tekɔ popo. Lo mɛtɛ, Jehowa akatotonge sho tshɛ lo yoho yotshikitanyi l’onto ndo l’onto ndo sho koka ngɛnangɛna dui sɔ. Nde halange sho ntshika mbekelo yaso. Koko nde halange dia sho mfɔnya ɔnɛ sho ndeka anto akina.—Rɔmɔ 10:12.

¹³ Sho hatohombe pondjo monga l’ofunu wa w’odja aso, lo nkanyiya ɔnɛ vɔ ndeka wedja ekina tshɛ. Naka sho nkanyiya yoho shɔ, kete dui sɔ mbeyaka monga okakatanu wa wolo le so dia nama lomangemange. Dui sɔ diakatombe lo ntambe ka ntondo. Anangɛso amɔtshi wa la Hɛbɛru kosalɛka wadi waki edo w’ase Ngirika akambo la losembwe. (Etsha 6:1) Ngande wakokaso mbuta naka tambotatɛ nkɛnɛmɔla yoho y’otako ya ngasɔ? Naka ɔnangɛso kana kadiyɛso k’oma lo dihole dimɔtshi ambokosha lokanyi lɔmɔtshi, onde wɛ ayokanyiya mbala kakɔ ɔtɔi ɔnɛ, ‘sho salaka akambo dimɛna lanɛ,’ ndo oma laasɔ ko mbikasha lokanyi lande? Naka ngasɔ, kete ohɔ dako di’ohomba diata ɔnɛ: ‘La okitshakitsha, nyɔshi dia anto akina nyoleka.’—Filipɛ 2:3.

JEHOWA AYOKOKIMANYIYA

14. Ngande wakoka dɔmbɛlɔ kokimanyiya ndo naa bɛnyɛlɔ dia lo Bible diɛnya dui sɔ?

¹⁴ Yoho ya sato ya nama lomangemange ele lo ndjaɛkɛ le Jehowa. Lɔmba nyuma k’ekila dia kosha solo dia lotutsha ndo ndjakimɛ. Waonga asɔ wayokokimanyiya naka lowandji la wodja lambosala dui dimɔtshi diaha la losembwe. Ndo lɔmbande lomba dia nshihodia dikambo dimɔtshi diakoka monga wolo le yɛ dia ntshikala lomangemange. Lɔmbande dia kokimanyiya dia wɛ nsala akambo w’ɔlɔlɔ lo dikambo sɔ. (Jakɔba 1:5) Wɛ mbeyaka tomama lo lokanu kana mbishama dilanya dimɔtshi l’ɔtɛ weyɛ la kɔlamelo le Jehowa. Naka ngaasɔ mbediɔ, lɔmba dihonga l’oyango wa wɛ nembetshiya anto akina lo yoho yokɛma hwe bonde keso la lomangemange. Wɛ koka monga l’eshikikelo ɔnɛ Jehowa ayokokimanyiya dia wɛ mbikikɛ.—Adia Etsha 4:27-31.

15. Ngande wakoka Bible tokimanyiya dia nama lomangemange laso? (Enda kiombo yele l’ɔtɛ a dui ɔnɛ: “Ɔtɛkɛta wa Nzambi akakeketsha dietawɔ diawɔ.”)

¹⁵ Jehowa akatosha Bible dia tokeketsha. Kana yimba la avɛsa wakoka kokimanyiya dia wɛ nama lomangemange. Hemba dia nkondja wetshelo oma lo avɛsa akɔ ndo ohɔkawɔ nɛ dia vɔ wayokokimanyiya kaanga etena keyɛ bu la Bible l’anya. Bible koka nto nkeketsha elongamelo kayɛ lo kɛnɛ kata Nzambi lo dikambo dia nshi yayaye. Tekɔ l’ohomba w’elongamelo kɛsɔ dia mbikikɛ ɛhɛnyɔhɛnyɔ. (Rɔmɔ 8:25) Sɔna avɛsa walembetshiya akambo wa laande wangɛnangɛnayɛ l’andja w’oyoyo ndo yaɛna dia wɛ aya lɛkɔ.

KONDJA WAHƆ OMA L’ƐNYƐLƆ K’EKAMBI WA NZAMBI WA KƆLAMELO

16, 17. Wetshelo akɔna wakokaso nkondja oma lo bɛnyɛlɔ di’ekambi wa Nzambi wa kɔlamelo wakalame lomangemange lawɔ? (Enda osato wele lo mbɔtwɛlɔ.)

¹⁶ Dikambo dia nɛi diayotokimanyiya dia sho nama lomangemange laso, ele lo nkana yimba lo bɛnyɛlɔ di’ekambi wa Jehowa wa kɔlamelo. Anto efula wa lo nshi yakafundamaka Bible waki la dihonga, ndo wakɔsaka tɛdikɔ ta la lomba dia vɔ nama lomangemange lawɔ. Ohokanyiya dikambo dia Shadrakɛ, Meshakɛ, ndo Abɛdɛ-Nɛngɔ, wanɛ wakatone ntɛmɔla lohingu lɔmɔtshi laki didjidji dia lowandji l’ase Babilɔna. (Adia Danyele 3:16-18.) Ɔkɔndɔ wa lo Bible ɔnɛ wambokimanyiya Ɛmɛnyi wa Jehowa efula ɛlɔ kɛnɛ dia monga la dihonga ndo ntona ntɛmɔla dalapo dia lo wodja wodjashiwɔ. Yeso kondjatambiya lo akambo wa pɔlitikɛ kana lo akambo akina wadja diatɔnɛlo. Nde akeyaka dia ɛnyɛlɔ kande k’ɔlɔlɔ kayokimanyiya ambeki ande. Nde akate ate: “Nyonge la dihonga! Dimi lambodja andja ɔnɛ otshumba.”—Joani 16:33.

¹⁷ Ɛmɛnyi wa Jehowa efula wa lo nshi yaso nyɛ wekɔ lo nama lomangemange lawɔ. Amɔtshi l’atei awɔ wakahɛnyahɛnyama, wakɔtɔ lo nkanu, ndo kaanga ndjakema l’ɔtɛ wakawatshikala la kɔlamelo le Jehowa. Bɛnyɛlɔ diawɔ koka tokimanyiya dia sho monga la dihonga. Ɔnangɛso ɔmɔtshi ladjasɛ la Turquie akate ate: “Ɔnangɛso Franz Reiter aki ɔnangɛsɔ l’ɔlɔngɔlɔngɔ lakandama l’ɔtɛ wakandatone dia tokamba kaamɛ l’asɔlayi wa Hitler. Mukanda wakandafundɛ nyango l’otsho wa la ntondo ka nde mvɔ wakɛnya woke woke wa mbetawɔ ndo wa wɛkamu ande le Jehowa ndo dimi lakalange ndjela ɛnyɛlɔ kande naka lambohomana la woho w’ohemba wa ngasɔ.”^[2]—Enda nɔtɛ ka la koma.

18, 19. a) Ngande wakoka ase etshumanelo kayɛ kokimanyiya dia wɛ nama lomangemange layɛ? b) Kɔkɔna kamboyashikikɛ dia nsala?

¹⁸ Anangɛso la akadiyɛso wa l’etshumanelo kayɛ koka kokimanyiya dia wɛ nama lomangemange layɛ. Etawɔ dia dikumanyi mbeya naka wɛ ekɔ l’okakatanu wa wolo. Vɔ koka kosha alako w’amɛna w’oma lo Bible. Ndo nto, naka ase etshumanelo akina mbeya dikambo diayɛ, kete vɔ koka kokeketsha. Lɔmbawɔ dia vɔ nɔmbaka lo dikambo diayɛ. Koko, sho lawɔ pombaka nsukɛ anangɛso ndo nɔmbaka lo dikambo diawɔ. (Mateo 7:12) Dia ntana listɛ la nkombo y’anangɛso wele lo lokanu, enda sawo diele lo jw.org, diele l’ɔtɛ a dui ɔnɛ: “Témoins de Jéhovah emprisonnés en raison de leur foi—(par pays),” ɔtɔ lam’ofundjiwɔ ɔnɛ SALLE DE PRESSE > ACTUALITÉS. Sɔna nkombo mɔtshi ndo lɔmba Jehowa dia nde nkimanyiya anangɛso l’akadiyɛso asɔ dia vɔ monga la dihonga ndo ntshikala la kɔlamelo le nde.—Ɛfɛsɔ 6:19, 20.

¹⁹ Oko watataleke nsukana l’ekomelo, sho koka nongamɛ dia mandji ya l’andja ɔnɛ yayoleka totshutshuya dia sho mbeta lo wedi awɔ. Diakɔ diele, ekɔ ohomba efula le so dia sho ndjalɔngɔsɔla oma ko kakianɛ lo nama lomangemange laso l’andja ɔnɛ wambatɔna!