Tokalole dia tolomia lomia saki k’onto
1 Waembwelo w’eyoyo w’eshika kimanyiaka di’onto pama, ko yema yema nde ndjokoma ombetawodi. Tokanyi takɔna kana wetshelo akɔna wahombaso namaka lo wɔɔngɔ etena kakalolaso atenda anto wakɛnya oko ayashawɔ na?
2 La ntondo k’akambo tshɛ, sho pombaka ndjalɔngɔsɔla dimɛna. Ɔlɔngɔswɛlɔ mimɛka omako dihoma dia ntondo. Woho akɔna ɔsɔ na? Tofunde akambo w’eshika wahombama lo dikatshi. Tofunde lokombo l’onto akɔ, dikambo diakatasawola, okashimwelo w’ɔtɛkɛtshi aso ndo kɛnɛ kakatôtshikɛ. Ko sho ndjadia kalupɛ yafundaso awui w’endana l’olimu wa luudu la luudu la ntondo ka sho kalola ndo sho pombaka kana lomba dia kɛnɛ kayotɔtɛkɛta lo dɔmbɛlɔ.
3 Tamboyâmbalɛ kakianɛ. Ayotota na? Naka takatshike dimbola dimɔtshi diakiso kokadimola mbala katondo kakatɛnana, kete l’okalwelo aso, tayohomba nyomɔtɛkɛta dia dikambo diakɔ. Oko ɛnyɛlɔ, naka sawo diatondo akatɛkɛtaka dikambo di’ɛngɛnɔngɛnɔ wayela Diolelo diaki Nzambi, kete sho kokaka mboka dimbola nɛ: “Lande na k’etawo Nzambi akambo wa kɔlɔ na?”
Lam’ayotokalola, l’ɔkɔngɔ wa sho memula onto akɔ, sho kokaka mbuta ɔkɔnɛ:
◼ “Etena k’ekomelo kakiso lo sawola, takayambola lande na kele Nzambi ka ngandji mbetawɔka di’akambo wa kɔlɔ w’efula wa nganɛ watshame ɛlɔ kɛnɛ. Onde w’akakanyia dia dikambo diakɔ oka? [Tshikɛ onto akɔ dihole akadimole.] Onde wɛ fonyaka dia mɛtɛ, Nzambi kanɛka anto oka? [Tshikɛ onto akɔ dihole akadimole.] Ohenda kɛnɛ kata Bible lo Joani 3:16.” L’ɔkɔngɔ wa mbadia vɛsa yakɔ, tɔtɔlɛ yambalo otsha lo tokanyi t’eshika ta lo tshapita 8 ya dibuku La vérité qui conduit à la vie éternelle; diɔ mɛnyaka ɔkɔkɔ akɔna wetawɔ Nzambi akambo wa kɔlɔ lo nshi yaso nyɛ.
4 Dimbola dikina diayohomba mbetola okanelo a lomba mbala katondo kayoteta diɔ nɛ: “Otondonga Nzambi akalange di’onto onge la lɔsɛnɔ la pondjo, ko lande na katshunda anto ndo kavɔwɔ na?” Etena kayotokalola, tɛnya onto akɔ okadimwelo washa Bible dia dikambo diakɔ lo Romo 5:12. L’ɔkɔngɔ wa mbadia vɛsa yakɔ, tokadimɔ dia menda kɛnɛ katama lo palagalafɛ kahɔnyi la k’ekomelo, lo lɛkɛ 35 la dibuku Tout finit-il avec cette vie?, dibuku dialembetshiya ɔkɔkɔ akɔna a woke wɛnya lande na kele otshundelo la nyɔi kondjaka dihole.
5 Naka dibuku Tout finit-il avec cette vie? mbakatatshike lam’akatete, kete sho kokaka mɛnya osato watanema lo lɛkɛ 24, mɔmbɔla osato akɔ lo tshena pe, ko mbadia Osambu 90:10. L’ɔkɔngɔ diko, tayokoka mbuta ɔnɛ: “Oko adiɛnayɛ, Bible mɛnyaka l’ɔlɔlɔ tshɛ ele lɔsɛnɔ laso ndo mɛnyaka nto ɔnɛ lekɔ mondo mondo. Ko onde ngasɔ mbayongaka nshi tshɛ oka? Lembetɛ kɛnɛ kata Joani 17:3 dikambo dia dikongelo dia monga la lɔsɛnɔ la pondjo lo andja w’oyoyo wa losembwe.” Tadia Joani 17:3 ndo tɔtɛkɛtɛ dikambo dia tokanyi t’eshika t’oma lo dibuku.
6 Koko, sho pombaka monga la yewo. Tatôkake wembola wôkoka lo diembwelo di’oyoyo. Naka sho mumbola ɔnɛ: “Onde wakadia okanda akamakosha?” kana “Onde wɛ akambohɔ nto ondo?” kana nto ɔnɛ: “Onde wɛ akôhɔ dia kɛnɛ kakatasawola mbala k’ekomelo lam’akamaye oka?,” kete tayokoka pandjola wɔɔngɔ w’onto akɔ. Tena efula, wembola ɛsɔ kema ohomba. Koko, tônge la laladi la ngandji, esasɔki ndo tɔtɛkɛtɛ lo tshena pe. Waonga asɔ ayokimanyia kɛnɛ kataso.
7 Oma l’ekimanyielo k’etshelo wa ngasɔ, ndo w’ekina nto, ondo tayokeketsha woho wayasha anto l’etema awɔ. Lande na keso hatokoke ndjahikɛ oyango wa sala kânga diembwelo ɔtɔi di’oyoyo oseka lobingu tshɛ na? Tokambe olimu la wetshelo w’eshika woyedi, ndo tɔtɔne l’apandjudi wambekesanɛ efula l’olimu ndo wayokoka tokimanyia. Naka tayoka etshina lo woshelo wa ntondo wayɛnya onto, kete ɔngɛnɔngɛnɔ aso wasala waembwelo w’eyoyo w’eshika ayodɛ.