Ekadimwelo lo wembola anyu

◼ Ɔlɔndji akɔna wahomba ndjelama dia mɛnya esangoyelo le etshumanelo na?

Osangoyelo ɔmɔtshi wekɔ ohomba etena kahombama yɛdikɔ mɔtshi mbɔsama dia dikambo dimɔtshi di’ohomba efula oko osombelo wa diangɔ dia mbika luudu, ovuswelo kana wokelo wa Mbalasa ka Diolelo, otomelo wa weshasha wa laande le la Société, kana wɔsɛlɔ w’ɔkɛndɛ wa omendji w’otshimbedi. Mbala efula, pombaka mɛnya osangoyelo wahombama etena tshɛ kele ohomba wa mbɔsa falanga y’etshumanelo ambotomba sɛkɛ.

Onyake kana lo wenya wele ehomba w’endana l’elimu kana eyango w’ohomba efula ambɛnama mbele ɔlɔndji ɔsɔ hakoke ndjelama. Oko ɛnyɛlɔ, etshumanelo mbeyaka sala vɔtɛ ko shikikɛ mbala kakɔ ɔtɔi lofulo la oshasha watomɛ̂ka la Société ngɔndɔ tshɛ dikambo di’olimu w’esambishelo ka l’andja w’otondo. Lo wedi okina, otondjelo wa falanga wasalema dikambo dia Mbala ka Diolelo tena tshɛ, oko osombelo wa diangɔ dia weoho la weoho kana diangɔ dia nɔngɔsɔla Mbalasa ka Diolelo, hahombama osangoyelo.

Naka ohomba watondja falanga ambonga, kete olui a dikumanyi ayenda dikambo diakɔ ɔlɔlɔ. Naka efula ka l’atei awɔ wambôkana dia mbɔsa tshenyi mɔtshi di’elimu ɛmɔtshi, kete ekumanyi kɛmɔtshi, oko ɛnyɛlɔ ose komite k’olimu, ayɔlɔngɔsɔla osangoyelo wa lofunda wele alapɔlɔ wayɛnyama lo wonya wayosalema losanganya l’olimu.

Ekumanyi kayɔ̂lɔmbɔla vɔtɛ ayɛ̂nya dikambo diakɔ hwe koko lo tshena pe ndo ayolembetshiya kɛnɛ kambɛna olui wa dikumanyi ɔlɔlɔ dia dikambo diakɔ. Ɔnkɔnɛ wanɛ wa tonga etshumanelo wayokondja dikoka dia mumbola eshikikelo. Naka dikambo diakɔ diekɔ ohokosanu, ondo ayoleka dimɛna sɛkɔla vɔtɛ yakɔ lo losanganya l’olimu la mbala kayaye woho wa tshikɛ onto l’onto etena ka kanyiya. Vɔtɛ yayosalema lo memɛ anya l’olongo.

Paka anto a l’atei w’etshumanelo wamboshila la ndjakimɔ l’etondo ndo wambolongola batismu mbahomba sala vɔtɛ, onyake kana wanɛ wahembola dikambo diakɔ kawɔshi tɛdikɔ tokina, oko ɛnyɛlɔ, lo akambo w’ɔtɔnɛ la atshunda kana abasa wa mbɔsa lo dikambo dia wokelo wa Mbalasa ya Diolelo. Hatônga dimɛna dia wanɛ wele lo tshumanelo dikina sala vɔtɛ yakɔ.

Etena kayetawɔma osangoyelo ɔmɔtshi, vɔ pombaka fundama lushi kana datɛ lɔkɔ, mbika lohita ndo nɔnga lo mpata k’etshumanelo.