Totate Mbetsha Anto Bible la Dibuku Vivre éternellement
1 Ngandji ka onyaso pombaka totshutshuya dia sho kalolaka dia tenda wanɛ wele la ndjala ndo la posa ka mɛtɛ esadi esadi dia mbakimanyiya. (Mat. 5:6) Sho pombaka nama oyadi kânga yema tshitshɛ ya saki yayotɛna le onto ndo kikokɛkokɛ naka sho hatolange tɔ shila. Dia sala ɔsɔku, sho pombaka ndjalɔngɔsɔla.
2 Oyango aso pombaka ndjâla wa tatɛ mbeka l’anto Bible. (Mat. 28:20) Abuku Vivre éternellement wakatombe ntondo wakataka nganɛ lo mbɔtwɛlɔ: “Dibuku nɛ dia wekelo sunganaka le anto tshɛ, dikɛnda kana osombe, oyadi lo mvula kakɔna kakandakome lo kalasa.” Omalɔkɔ, yoho yakafundama dibuku nɛ mbetɛka wekelo wɔdu efula lo nɔmbɔla ndo kimanyiyaka kânga eyoyo dia vɔ sala olimu ɔsɔ. Tayokokaka dia tatɛ mbeka l’anto Bible naka sho sala waendelo w’eyoyo w’eshika.
3 Woho Akɔna wa Tatɛ Wekelo Na? Tena tshɛ, lam’ayaso dia ndjenda onto, ekɔ dimɛna tatɛ la sawola lo lokanyi lɔmɔtshi kana dimbola dimɔtshi diakatatɛkɛta mbala kakatahomana lande ntondo. Ondo kana takatɛkɛta dia woho wele wanɛ wakavu ndo takambola dimbola nɛ: “Dikongelo diakɔna diele la wakiso wa ngandji wakavu na?” Tolembetshiya ɔnɛ eolwelo kema elongamelo k’anyanya; Bible kɔndɔlaka waolwelo efula wakasalema. Tɔsɛdingole asango wele lo lɛkɛ 167-9. L’ɔkɔngɔ diko, tɔkɛtshanya lande lo palagalafɛ 1 la 2, lo lɛkɛ 166. Naka onto akɔ ekɔ lo mɛnya saki, towote dia tayoya la ndjowenda nto woho wa tetemala la sawo.
4 Ondo takatɛkɛta la papa kana mama kɛmɔtshi ko wakayaɛnya dia wekɔ lo ndjakiyanya di’ekakatanu watatɛkɔya wɛnawɔ dia mbodia ana. Oko ɛnyɛlɔ sho kokaka mbuta l’ɛtɛkɛta aso shoamɛ ɔnɛ:
◼ “Ambutshi tshɛ kombolaka mbisha an’awɔ kɛnɛ koleki dimɛna. Alako washa ambutshi diaaso dia vɔ kimanyiya an’awɔ dia vɔ ndjâla la lɔsɛnɔ l’ɔngɛnɔngɛnɔ ndo lele l’oyango, tanemaka lo Bible. L’ɔkɔkɔ ɔsɔ, sho tambokeketsha nkumbo la wangasanu dia vɔ mbeka Bible kâmɛ. [Kotola yambalo y’onto akɔ oya lo palagafɛ 23, lɛkɛ 246.] Lam’ayowonga l’ewo ka ngasɔ vɔ wayokondja ɛtshɔkɔ wa pondjo lo nkumbo k’otondo.” Tâle Joani 17:3. Tolembetshiya ɔtɛkɛtshi aso ɔnɛ sho kokaka ndja dia ndjɛnya nkumbo kande woho watatɛwɔ wekelo.
5 Naka tekɔ ɔlɔngɔlɔngɔ kana opandjudi w’oyoyo ndo naka, mbala ka ntondo, takatɛkɛta dikambo di’elongamelo ka Paradiso lo tshena pe, sho kokaka mbufola dibuku lo lɛkɛ 3 ndo mbuta, oko ɛnyɛlɔ, l’ɛtɛkɛta a wɔdu ɔnɛ:
◼ “Bible ndakaka ɔnɛ wanɛ wasala lolango la Nzambi kokaka nongamɛ dia ndjâla la lɔsɛnɔ l’andja wa nganɛ, lɛnɛ ayoyala ɔngɛnɔngɛnɔ la wɔladi. Dibuku nɛ mɛnyaka kɛnɛ kahombaso sala dia kondja ɛngɛnɔngɛnɔ ɛsɔ.” Tolembetshiya lo tshena pe woho wasalema wekelo ndo towɛnya ɛnyɛlɔ kɛmɔtshi.
6 Oko weso ambeki wa Yeso, sho tekɔ l’ɔkɛndɛ wa kimanyiya anyaso. (Rom. 10:14) Naka takatshike okanda ɔmɔtshi, kana takasawola tsho l’onto akɔ dimɛna, sho tekɔ l’ɔkɛndɛ wa nomialomia saki kande. (Mat. 9:37, 38) Naka sho sala lotumu lɔsɔ l’ɔlɔlɔ tshɛ, kete anto tshɛ wayokondja ɛngɛnɔngɛnɔ w’oma lɔkɔ.—1 Tim. 4:16.