Tokalole dia tênda wanɛ wakalongola periodikɛ kana biukubuku
1 Yeso akakeketsha ambeki ande dia vɔamɛmɛ mbetɛ anto akina ambeki. (Mat. 28:19) Dikambo sɔ hadiotokoka salema paka la tshika ekanda eto; sho kombolaka kimanyiya anto dia vɔ pama lo nyuma. Di’ɔkɔkɔ akɔ, sho pombaka nyomotênda wanɛ wakayasha dia mbatɔlɛ ekimanyielo ka ladiko.
2 Naka takakambe olimu la artikɛlɛ ɔmɔtshi w’oma lo periodikɛ lo sawo diaso dia mbala ka ntondo, kete ayonga dimɛna tɛkɛta dikambo diakɔ diamɛ lam’ayotokalola:
◼ “Lo diembwelo diami dia mbala k’etshi, lakakotola yambalo yayɛ lo artikɛlɛ ɔmɔtshi wa lo La Tour de Garde (kana wa lo Réveillez-vous!) wakɛnya lande na kele ohomba menda lo Bible. Sangwelo dia Nzambi, dia mbisha anto tshɛ ɛlɔlɔ woleki lo nshi yayaye, mendanaka la Diolelo diande. Daka sɔ diofundami lo Mika 4:3, 4, mbutaka dia Diolelo sɔ diayokumiya ata tshɛ.” L’ɔkɔngɔ a mbala divɛsa diakɔ, ɛnyande biukubuku “Voici!” ndo ɛnya osato wele lo lohoso. Nyɔsɛdingole palagalafɛ ka ntondo la avɛsa wofundami lɔkɔ, lo shikikɛ ɔnɛ Mika 4:3, 4 ekɔ l’atei awɔ. Nyolakani dia diembwelo diayela woho wa ndjɔsɛdingola palagalafɛ 2.
3 Naka onto akɔ haleke ndjasha, ko kana nde bu l’etena ka kɛtshanya, wɛ mbeyaka mbɔsa yɛdikɔ dia mbɔtshiya l’ɔnɔngɔ w’ɔsɛsɛ ayɛ w’okahanyelo:
◼ “Lam’ele wɛ akayasha lo periodikɛ yakamakotshikɛ mbala katondo, lakafɔnyisha dia wɛ ayolanga mbala numɛlɔ ya ndjihelo nyɛ. Lambosuya dia artikɛlɛ ɔnɛ wa laande ayokɔngɛnyangɛnya.” Kotola yambalo y’onto akɔ lo artikɛlɛ wɛnayɛ wate kokaka mbonda l’evɔ. Ntɛnde dia wɛ nangaka mbêla numɛlɔ yayela.
4 Naka wɛ akatshike biukubuku ko kokondja diaaso dia mɛnya woho wasalema wekelo, takanyi dia ndjodisala lo diembwelo diayaye.
Oko ɛnyɛlɔ, naka wɛ akatshike biukubuku “Diulelu,” lɔmba onto akɔ dia nde tɔsa yande ndo ntɛ̂nde wate:
◼ “Ohenda kɛnɛ kotami lo lɛkɛ 3 lo dikambo dia dui diakasambishaka Yeso lam’akinde la kɛtɛ.” L’ɔkɔngɔ nyênde lo tshena pe kɛnɛ kele lo lɛkɛ 3. Mbola ɔtɛkɛtshi ayɛ kɛnɛ kahombande sala, oko akanande, dia nyomoleka mbeka. L’ɔkɔngɔ wɛ mbeyaka mbuta wate: “Ekɔ ɔlɔlɔ dia mboka lande na eso l’ohomba w’efula wa Diolelo dia Nzambi. Dimi nangaka nyomoya dia ndjokolembetshiya lande na kahombaso mbɛlɛ tsha lo lowandji lakalɔngɔsɔla Nzambi, tshɔyi yaso ya dikongelo.”
5 Têkɔ la tobukubuku totshikitanyi. Lembetɛ atshina w’akambo lo nyɛ yakanyiyɛ dia kamba layɔ olimu. Dikambo sɔ diayokokimanyiya dia keketsha anto w’etema ɛlɔlɔ dia nyomoleka mbeya aui wakadjangɛ Yeso.—Mat. 28:20.