Tôkoya Jehowa Lo Kanɛka Akina Mɛtɛ
1 Jehowa ekɔ ɛnyɛlɔ koleki ɔlɔlɔ ka onto lakanɛ akina mɛtɛ. Oko wende Omboledi w’andja w’otondo, nde kanɛka ditongami diande lo ehomba awɔ. (1 Pet. 5:7) Yeso akakeketsha ambeki ande dia vɔ mbɔsa She, ɔnɛ latotondjaka yanyi ndo latɔlɔshaka mvula le anto w’ɔlɔlɔ la wa kɔlɔ. (Mat. 5:45) Sho kokaka mbokoya Jehowa lo ndjashaka le akina l’otema ɔtɔi, lo ndjalɔngɔsɔlaka dia mbewoya onto tshɛ lahomana la so losango la Diolelo. Naka sho manyamanya tobukubuku tayotokamba latɔ l’olimu lo ngɔndɔ ka Loseketanya, kete tayokoka kimanyiya akina lo nyuma. Alako wayela anɛ toshaka tokanyi tɔmɔtshi lo woho wahombaso ndjalɔngɔsɔla dia sawola l’onto mbala ka ntondo ko ndjɔhɛtshahɛtsha saki la waendelo w’eyoyo wasungana mɛtɛ.
2 Naka tekɔ lo mɛnyanya biukubuku “Onde na Nzambi tokaneka mete ondo?” sho kokaka mbuta ɔnɛ:
◼ “Onde wɛ atayambolaka bonde katshika Nzambi pâ, naka mɛtɛ nde tokanɛka? [Totshike onto akɔ akadimole.] Biukubuku nyɛ hayosha paka okadimwelo wa dimbola sɔ oto, koko yɔ mɛnyaka nto ɔnɛ Nzambi akalake dia minya pâ tshɛ yakɛnya onto anyande ndo nkɛtɛ.” Tâle odingɔ 23 lo lɛkɛ 27. Towɛnya sango diele l’ɛse ko sho mbala Osambu 145:16 woshilami l’odingɔ 22. Tɔ̂lɛkɛ biukubuku. Naka onto akɔ amboyiɔsa, tombole dimbola dimɔtshi diayotoyokadimula lo diendelo dikina, oko ɛnyɛlɔ: “Onde wɛ kombolaka mbeya woho wayokotsha Nzambi sangwelo diande dia tshulolɛ anto ɛtshɔkɔ ndo kadimula nkɛtɛ paradiso?”
3 Etena kakalolaso dia tenda wanɛ wakatatshikɛ biukubuku “Onde na Nzambi tokaneka mete ondo?” sho kokaka tatɛ sawo dia hende nganɛ:
◼ “Mbala ketshi kakamaye, takɛnyi ɔnɛ Nzambi tokanɛka mɛtɛ ndo ɔnɛ nde ekɔ l’oyango wa minya pâ tshɛ yakɛnya onto anyande ndo nkɛtɛ.” Tofole biukubuku lo lɛkɛ 2 la 3, lɛnɛ ele sango, ko sho tetemala ɔnɛ: “Takakakitɔna lo dimbola nɛ: ngande wayokotsha Nzambi sangwelo diande dia tshulolɛ anto ɛtshɔkɔ ndo kadimola nkɛtɛ paradiso na? Akanɛ lo dikambo sɔ?” L’ɔkɔngɔ a nonga okadimwelo, tâle odingɔ 2 lo lɛkɛ 17 ndo Danyele 2:44. L’ɔkɔngɔ tâle odingɔ 12 lo lɛkɛ 18. Tombole ɔtɛkɛtshi aso kana nde ayolanga sɛdingola la so etenyi 9 ka biukubuku. Naka nde ambetawɔ, têke la nde etenyi kakɔ.
4 Mbɔtwɛlɔ ka sawo kɛmɔtshi kɛnɛ kokoki tokimanyiya naka tekɔ lo mɛnyanya biukubuku “Etena Kavɔ Onto Ɔmɔtshi Lalangayɛ. . ..” Tɛ̂nya onto lohoso ko sho mbuta shate:
◼ “Ɛlɔ tekɔ lo ndɛkɛ anto biukubuku nyɛ yakasambe miliyɔ y’anto wakashisha onto ɔmɔtshi la ngandji ndo yakawasha elongamelo. Onde wɛ amboyambolaka dia mbeya elongamelo kakɔna kele la wanɛ wambovɔ? [Tolonge okadimwelo.] Bible mbutaka hwe ɔnɛ Nzambi akalake eolwelo.” Tâle Joani 5:28, 29. Tofole biukubuku ko sho mbisha kɔmatɛrɛ l’elembetshiyelo wele l’odingɔ wa komelo lo lɛkɛ 28 ndo lo odingɔ wahɔnyi lo lɛkɛ 31. Towɛnya asango wele lawɔ. Tɔ̂lɛkɛ biukubuku. Sho kokaka nɔngɔsɔla diendelo di’oyoyo lo mumbola ɔnɛ: “Ngande wokokiso ndjashikikɛ ɔnɛ l’edja l’edja nyɔi okonyɛma pondjo?”
5 Lam’ayotokalola dia tenda anto wakalongola biukubuku “Etena Kavɔ Onto Ɔmɔtshi Lalangayɛ. . . ” ondo sho mbeyaka mbuta ɔnɛ:
◼ “Mbala ketshi, takasawola dia elongamelo ka dimɛna efula ka eolwelo. Biukubuku yakamakotshikɛ nembetshiyaka bonde kakokaso shikikɛ ɔnɛ l’edja l’edja nyɔi ayonyɛma pondjo. Onde wɛ hɛnyi dia alaka wa Nzambi asɔ tosambaka ndo toshaka elongamelo?” Totshike onto akɔ akadimole. L’ɔkɔngɔ tofole biukubuku lo lɛkɛ 31 ko sho mbala odingɔ wa hende la wa sato, kâmɛ ndo Enyelo 21:1-4. Toke epole ɔsɛkɛ lo elongamelo kele laso ka sɛna pondjo aha mvɔ. Lo menda saki kɛnya onto ndo odinganu wele lande, tɔ̂sɛngɔlɛ dia mbeka la nde Bible lo dibuku Ewo kana tombole dimbola dikina diayokadimwama lo diendelo diayela.
6 Enda kɛnɛ kakokaso mbuta naka tekɔ lo mɛnyanya biukubuku “Quel est le but de la vie? Comment le découvrir?”:
◼ “Anto efula ndjambolaka oyango wa lɔsɛnɔ. Vâmɛ ndjatɛkɛtɛka ɔnɛ: ‘Bonde kemi lanɛ? Lende atatshu lɔsɛnɔ lami? Ngande ayomonga lo nshi yayaye?’ Oko le yɛ, lende okokiso tana ekadimwelo? [Tôlonge.] Enda kɛnɛ kata Bible. [Tâle Osambu 36:9.] Kema sunganaka sho mbetawɔ ɔnɛ Otungi w’onto koleki mbeya dia tolembetshiya kɛnɛ kasalaso lanɛ? [Totshike onto akɔ akadimole.] Biukubuku nyɛ mɛnyaka sangwelo dia woke diaki la Nzambi lo dikambo diaso.” Tofole biukubuku lo lɛkɛ 20 la 21, tâle ɛtɛkɛta wa sango ko sho mbisha kɔmatɛrɛ lo sango diakɔ, l’ɔkɔngɔ tɔ̂lɛkɛ biukubuku. Naka nde amboyiɔsa, towombole shate: “Ngande wakokaso ndjashikikɛ ɔnɛ Nzambi okongaka l’oyango w’ɔnɛ anto wadjasɛ pondjo lo Paradiso la nkɛtɛ?” Tôkane la nde lushi la ndjowenda.
7 Naka takatshike biukubuku “Quel est le but de la vie? Comment le découvrir?” kete sho kokaka mbuta, ɛnyɛlɔ oko, lam’ayoteta mbala ka hende ɔnɛ:
◼ “Mbala ketshi kakamaye, lakangɛnangɛna mɛtɛ sawo diaso lo kɛnɛ kata Bible, ɔnɛ lɔsɛnɔ lekɔ mɛtɛ l’oyango.” Towɛnya sango diele lo lɛkɛ 31 ko sho mumbola ɔnɛ: “Ngande akokaso ndjashikikɛ ɔnɛ lolango la Nzambi lekɔ nshi tshɛ ɔnɛ anto wadjasɛ pondjo lo Paradiso la nkɛtɛ?” Tâle odingɔ 3 lo lɛkɛ 20. Tɔkɛtshanya la nde lo tokanyi tɔmbwami l’ɔtɛ a dui w’ɔnɛ: “Sangwelo dia Nzambi hadiotshikitanaki,” lo lɛkɛ 21. Tâle lo lohoso la komelo la biukubuku yakɔ losha l’endana la mbeka l’onto Bible la ngelo aha la mbɔlɔmba falanga. Towɛnya dibuku Ewo ndo tɔ̂sɛngɔlɛ dia sho mbɛ̂nya woho wakambaso la dibuku diakɔ dia mbeka Bible.
8 Olimu aso pombaka mɛnya saki k’oshika kele laso ka kimanyiya anto w’etema ɔlɔlɔ dia vɔ ‘kondja ewo k’oshika ka mɛtɛ.’ (1 Tim. 2:4) Omalɔkɔ, toyaombe etena lo ekongelo kaso k’olimu dia kalolaka dia tenda wanɛ wakatatshikɛ biukubuku. Lo ndjashaka le wɔ l’otema ɔtɔi ngasɔ, ondo tayokoka kimanyiya wanɛ wakuma akumu ndo walela nɛ dia akambo wa wɔnɔnyi wasalema l’ɛtɛmwɛlɔ wa kashi dia vɔ mbidjama djembetelo dia kondja panda. (Ezek. 9:4, 6) Tayonga nto l’ɔngɛnɔngɛnɔ ndo l’ɔlɔ dia mbeya ɔnɛ tekɔ lo mbokoya Jehowa lo kanɛka akina mɛtɛ.—Enda lo Filipi 2:20.