Nzambi nɛmiyamaka oma lo pudipudi
1 Ɛlɛmbɛ wa Mɔsɛ wakahikaka dia pudipudi ndjâla. Vɔ waketɛka Isariyɛlɛ wodja wa lânde, wodja wakahombe tshikala pudipudi lo demba ndo lo nyuma. (Lew. 11:35, 36; 15:1-11; Is. 52:11) Nzambi akalɛmiyamaka oma lo pudipudi ndo, oma lo pudipudi kakɔ, wodja wâki l’alemba w’amɛna.
2 Ndo ɛlɔ kɛnɛ, pudipudi ekɔ eongelo ka lânde k’ekambi waki Jehowa. Ko, kânga mbɛnama dikambo sɔ l’olui awɔ tshɛ, onde ɔsɔku mbediɔ le ɔmɔmɔ wa l’atei aso oka? Woho wayakiyanyaso efula kana yema tshitshɛ dia ndjâla la kongamu ndo la pudipudi mɛnyaka efula ka saki kele laso ka ndjela adjango wa Jehowa.
3 Kayotota dia luudu laso na? Lɔ mbetshaka losango la Diolelo lêso lo tasambisha ɛngɛnɔ oka? Onde na, anto amɔtshi kokaka tɔ̂sa oko anto wa kashi lam’ataso ɔnɛ kɛtɛ kayokadimɔ paradiso koko luudu laso lekɔ efutefute, ndo sho hatohembola pasipalɔmɛ ndo sɛkɛ diaso diambodɔnɛ l’adiyo oka? Ko naka luudu laso lekɔ ɛsɔhanasɔhana oko ema kambokalema ndo kana solo ka kɔlɔ kekɔ lo mbupola oma lɔkɔ nɛ dia lɔ kema pudipudi, kokaka sho mbuta ɔnɛ tekɔ lo mbisha ‘ɛnyɛlɔ k’ɔlɔlɔ ka pudipudi kasungana l’andja w’oyoyo wayɔlɔmbwama oma le Diolelo dia Nzambi oka?’—om lɛk. 129-31.
4 Ko mutuka (le wanɛ wele l’ɔmɔtshi) wakamb’aso olimu l’esambishelo, ngande wewɔ na? Onde na, vɔ wekɔ pudipudi l’etei ndo l’andja, yoho yahakoke olimu wasalaso mɔnywama oka? Ko kayotota di’ahɔndɔ aso, atapa aso la yoho yokombami kana yele divo diaso na? Diɔ diekɔ pudipudi ndo la yɔngamu, yoho yahakoke onto mbaɛnga amɛku oka? Mɛtɛ, dia sho ndjâla pudipudi, sho pombaka mbɔkaka ndo solaka ahɔndɔ aso esangɔ tshɛ.—w89 1/6 lɛk. 16-19.
5 Ko kakɔna kayotosala naka ɔnangɛso ɔmɔtshi hadje yimba lo pudipudi ka demba diande la ka luudu lande lo yoho ya mbisha ndo etshumanelo sɔnyi na? Kokaka mbokimanyiya la ngandji lo menda ɛnɔnyi wele lande kana pâ kele lande. Naka tayosala ɔsɔku kete tayowɛnya ɔlɔlɔ aso. Onto ɔmɔtshi mbeyaka ndjâla mindo koko nde hadieye; ɔnkɔnɛ alako woshami l’ɔsɛngɔsɛngɔ wayowotshutshuya dia nde nɔngɔsɔla dikambo sɔ. Wanɛ wahasha ɛnyɛlɔ k’ɔlɔlɔ lo dikambo sɔ kema l’akoka walɔmbama dia nongola waɛsɛ w’ohomba wa l’atei w’etshumanelo. Dikumanyi pombaka lo mɛtɛ ndjâlama dia mbidja ɛlɛmbɛ wakiwɔ kana funda awui awɔ w’ɛnawɔ ɔlɔlɔ efula.
6 Anto weke kâ ndjasha lo mɛtɛ, wekɔ lo mbetama dia ndjɔlɛ dambo dia lo nyuma diele lo Mbalasa ka Diolelo. Esangɔ tshɛ, sho mbaetaka l’ɔngɛnɔngɛnɔ nɛ dia mbalasa kekɔ pudipudi ndo kɔmba. Koko, sho pombaka mbidja weolo dia tɔ tshikalaka ɔsɔku. Toshishime lo ndjɛkɛ yotodingi. Onde na, kɔsa, odihe la pele diekɔ pudipudi oka? Komba yekɔ lo mɔmbama mbala la mbala oka? Naka onto ambêkɛ dia mɛnaka odihe w’afuku afuku kana wolodi la ditshu la pele di’omômbɔ mukubu, kete nde ɛ̂naka dikambo sɔ kawɔ. Koko anto waya mbala ka ntondo lo Mbalasa ka Diolelo kokaka ndjɛna kɔlɔ. Sho pombaka sala la wolo aso tshɛ dia mbalasa kôngake pudipudi ndo kɔmba, lo kiɔmbaka kana kilɔngɔsala naka ambokoma lo londa laso.
7 Aha kânga la mbuta ɔtɛkɛta ɔtɔi, sho kokaka tombola Nzambi oma lo ɛnamelo kaso ndo oma lo pudipudi ka luudu laso, ka mutuka aso ndo ka Mbalasa kaso ka Diolelo. Ɛnyɛlɔ kaso hatotakanya ndoko onto, koko tɔ kayɛnya pudipudi la osemboki w’ɔtɛmwɛlɔ aso.—1 Kor. 10:31, 32; Jak. 1:27.