Têwoya diewoyelo dia diambo dia lo Enyelo
1 Dibuku Révélation: dénouement tokimanyiyaka dia sho mpotɔ diewoyelo dia diambo dia lo Enyelo. Tokimanyiya anto dia vɔ mbeya lo na endanawɔ la diewoyelo sɔ, lam’ayotɔsa dibuku sɔ la nɛmɔ l’olimu aso wa lo ngɔndɔ ka Lovula. Tokanyi tayelana tɔnɛ tayotokimanyiya dia sho nɔngɔsɔla asawo aso.
2 L’ɔkɔngɔ wa mbisha onto mɔyɔ, kokaka sho mbotɛ ɔnkɔnɛ:
◼ “Onde na wɛ ambôkaka watɛkɛta dia ambahemi a falasa anɛi wa lo Enyelo oka? [Tshikɛ onto akɔ dihole akadimole.] Elembetshiyelo efula wotshikitanyi wakashama lo dikambo di’ambahemi a falasa asɔ. Ko onde wɛ mbeyaka ɔnɛ wahemelo awɔ a falasa wa didjidji wekɔ etenyi kɛmɔtshi ka pɔlɔfɛsi ka lo Bible kɛ̂nya akambo wasalema lo etena kaso kɛnɛ, ndo sho tshɛ mendanaka la dikambo sɔ lo weho wotshikitanyi oka? [Tshikɛ onto akɔ dihole akadimole.] Onde na, wɛ nangaka shihodia pɔlɔfɛsi kakɔ ndo mbeya kɛnɛ kalembetshiya okotshamelo atɔ le so oka?” Naka tambɛna saki ka mɛtɛ le onto akɔ, towɛnya esato wele lo tshapita 16 ya dibuku Révélation: dénouement ndo tôlembetshiyawɔ l’avɛsa wofundami l’alɛta woleki edima. Kana sho mɔmbɔla waɛnamelo amɔtshi wa l’ɛnɛlɔ oma l’ekimanyielo ka kiatshikatshi Andja one wayoka? Naka onto ekɔ lo mɛnya posa kande, tokani la nde dia mbosha dibuku kana towosha dakanu dia sho ndjoleka sɛdingola ɛnɛlɔ la elembetshiyelo katɔ l’ɔmɔmɔ.
3 Ondo tayolanga sala ɔnkɔnɛ:
◼ “Onde na wɛ ambôkaka ɔtɛkɛta ‘Armagɛdɔ’? [Tshikɛ onto akɔ dihole akadimole.] Efula kanaka ɔnɛ ɔsɔ ekɔ ta di’ayɔlɔshama la bɔngɛ dia dja diayoshila anto oshiki. Koko Armagɛdɔ kema woho wa dikambo dia ngasɔ. Lo ndjela Bible, dikambo sɔ diayela etshikitanu wa weke l’akambo w’ɔlɔlɔ ndo ayodihe lo wɔladi wa pondjo.” Lo ndjela ekashimwelo k’onto, sho kokaka mbadia divɛsa dimɔtshi oko Enyelo 16:16 kana Osambu 37:10, 11, ko l’ɔkɔngɔ diko sho ndjokotola yâmbalo yande lo tshapita 39 ya lo dibuku Révélation: dénouement. Naka onto ekɔ lo mɛnya posa kande, tokani la nde dia mbosha dibuku diakɔ. Naka aha ɔsɔku, ondo tayɛna ɔlɔlɔ dia sɛdingola akambo amɔtshi wasungana wele lo kiatshikatshi Andja one wayoka?
4 Ondo tayokiya onto posa lam’ayotoyela kanyi nyɛ:
◼ “L’etena kambofukutana kɛnɛ, anto efula l’andja ɔnɛ kanyiyaka dia tana okandwelo ɔmɔtshi l’ekakatanu watɔhɛnyahɛnya. Ondo wɛ ndjambolaka ɔnɛ: dikambo sɔ alangadiɔ nembetshiya, ndo kana Nzambi kokaka kandola ekakatanu ɛnɛ. Akambo efula wa mamba wasalema l’etena kaso kɛnɛ mendanaka l’olimu wele la Yeso ɛlɔ kɛnɛ lo sangwelo dia Nzambi. Amɔtshi wambɛnyama lo dibuku di’Enyelo. Onde na, wɛ nangaka nyomoleka mbeya sangwelo diakasangoyaka Nzambi lam’akandatome Ɔnande la kɛtɛ ndo kɛnɛ kalembetshiya dikambo sɔ le yɛ ndo le anyayɛ oka?” Tokotole yâmbalo y’onto akɔ lo palagalafɛ 1 la 2 ka lo tshapita 41 ya lo dibuku Révélation: dénouement, kana toke epole ɔsɛkɛ l’akambo wasungana wele lo numɛlɔ yeke katomba ya La Tour de Garde la ya Réveillez-vous! Kana tokambe nto olimu la kiatshikatshi Loseno la woladi lo andja w’oyoyo dia sho mbokiya onto posa.
5 Têtake wanɛ tshɛ wɛnya posa oya lo sanganya ya l’etshumanelo. Oma l’ɔtshɔkɔ wa Jehowa, tayokoka kimanyiya onto dia nde ‘mboka akambo wa pɔlɔfɛsi kɛnɛ, la kitanyiya akambo wofundami lɔkɔ.’—Eny. 1:3.