Totate nombola ambeki wa Bible lo Mam’ekongo la tange
1 Yeso akatome ambeki ande dui dia vo monga embetsha wa lukumu l’ololo. (Mat. 28:19, 20) Woho woleki ohomba wele laso dia ndakanya anyaso ele dia nombola ambeki wa Bible. Onde sho kambaka olimu ako oso oka? Ko naka kema, woho akona wayototatɛ wekelo dia nyomoleka ndakanya anyaso na?
2 Ondo takatshike onto omotshi kiatshikatshi ko takolake dia tayokalola andjosedingola awui wele loko.
Etena kayotokalola andjenda onto lakatatshike kiatshikatshi “Andja one wayoka?,” kokaka sho mbote shoate:
◼ “Lam’akamaye ambeta nshi motshi, takasawola di’ohomba w’etena keso kene ndo takenyi dia Yeso akakondola l’ololo tshe akambo weta nshi nye. Dimi nangaka sho sedingola lo taahe tomotshi ta wenya, tokanyi tohende kana tosato t’oma lo kiatshikatshi yakamakotshike. Ohenda kene kofundami lo ote a dui wahonyi one: ‘Djembetelo.’ ” Tofole kiatshikatshi yako lo lɛkɛ 3 ndo tosawole dia kene k’endana la palagalafe hiende kana shato ya l’ote a dui wahonyi ako, lo mbadia tovɛsa toshilami naka wonya kokaka. Tenya ohomba w’ekotshamelo ka polofesi kaki Yeso k’endana la nshi yaso nye. Tolakani dia kalola nto woho wa ndjosedingola palagalafe kina yotshikadi ya l’ote a dui ako wahonyi. Tokeketsha onto ako dia nde mbadia palagalafe yako la ntondo.
3 Kana, sho kokaka mbuta oko woho one:
◼ “Mbala k’ekomelo kakatasawola, lakakotshike kiatshikatshi yele la ote a dui Andja one wayoka? Takateketa dikambo di’okende waki Yeso Kristo l’akambo wa l’andja one. Takadia awui ande wokondwami lo Bible lo Joani 17:3. [Adia.] Oko wele eko ohomba efula wa mbeka woho wa mbeya Nzambi la Yeso naka sho kombolaka monga la loseno la pondjo, eko ohomba a sho sala la wolo aso dia kondja diewo diako. Lam’aki Yeso Kristo la kete, nde akenya kana akangamula waonga w’efula ndo w’elolo waki Nzambi. Onde kema dimena kanyia one: etena kayotoleka mbeka awui w’endana la Yeso ndo l’olimu ande, mbayotoleka mbeka akambo w’endana la She oka? [Tshikɛ onto ako dihole akadimole.] Ohenda kene kata dibuku ne: Le plus grand homme de tous les temps.” Tadia palagalafe hiende ya ntondo yatanema lo lɛkɛ la dikumi la tshapita 116. Toshikike one dibuku ne dieko la elembetshiyelo tshe w’endana la Yeso ndo wokondwami lo evangiliɔ enei ndo dibuku diako kondolaka awui ako lo ndjela diahonelo di’enonyi w’akambo wakatombe. Tɔtɛtɛ lo kene k’endana l’ete w’awui w’eshika wele la totshapita, lo kene k’endana la esato wosonwami ndo lo kalate kele l’etatelo ka dibuku. Naka onto ako amboyasha l’otema otoi, tokani lande dia mbosha dibuku.
4 L’okongo wa mbisha onto laketawo dibuku “Le plus grand homme” moyo, sho kokaka mbote onkone:
◼ “Oko akamakote lam’akatenana mbala k’ekomelo, dibuku Le plus grand homme akatondjama dia mbeka Bible. Dimi nangaka kenya lo tshena pe woho wa kamba adio olimu l’ololo tshe.” Tofole dibuku lo tshapita 1, “Des messages venant du ciel.” Tokotole yambalo y’onto ako lo wembola wofundami. Tadia dimbola diatondo, oma laso ko sho ndjosedingola palagalafe ya ntondo. Tôtonganyia awui ako l’osato wele lo lɛkɛ lahende. Totondja wembola ekina ndo takadimole naka teko l’etena. La ntondo ka ndakana, tokani lande dia sho kalola nto andjotetemala la sawo.
5 Naka teko la wangasanu nshi tshe, naka sho ndjalongosolaka la kongamu tshe ndo naka sho kambaka olimu la oseka diaaso tshe diatanema laso, kete tayokotsha kene tshe kele ohomba dia tatɛ nombola ombeki omotshi wa Bible lo Mam’ekongo la tange.