Tɛ̂nyanya periodikɛ la tubukubuku dia mbewɔnya mɛtɛ
1 Lo atshunda wa nshi nyɛ, sango ya mɛtɛ mɔnyɔmwaka tena efula l’ɔkɔkɔ w’ɔkɛnɛmwɛlɔ wa tshamba diko, w’alaka wa kashi wa pɔlitikɛ la wetelo wa kashi wasalema l’andja w’otondo. La Tour de Garde la Réveillez-vous! ndjaemalɛ, nɛ dia yɔ tsho mbêwɔnya mɛtɛ lo dikambo dia Diolelo dia Nzambi ndo mbalembetshiya kɛnɛ kahomba onto sala dia kondja ɛtshɔkɔ wa pondjo wayondêla.
2 Lo wodja ɔmɔtshi, owandji ɔmɔtshi l’olimu wa mbewoya sango, lakandolaka periodikɛ hiende shɔ, akekama l’atei l’otema ɔtɔi lo nyanga dikimɔ dia ndjidianganya. Nde akate ate: “Oko le mi La Tour de Garde ekɔ ɔmɔtshi a l’atei w’ekanda woleki amɛna; lekɔ l’ɔngɛnɔngɛnɔ efula dia mbisha ekimanyelo kami lo dikambo dia tɔ.” Têkɔ l’ɔngɛnɔngɛnɔ a kimanyiya asekaso lo mɛnyanya ekanda ɛnɛ washa ewo katɔla lo lɔsɛnɔ. (Joani 17:3) Woho akɔna ayonyɛnyanya periodikɛ y’ohomba nyɛ lo Tshaka fudu na? Ondo alako wayela anɛ wayonga ohomba le nyu.
3 Naka wɛ ekɔ lo mɛnyanya artikɛlɛ wa lo “La Tour de Garde,” wɛ mbeyaka mbuta w’ate:
◼ “Têkɔ lo sawola l’anto wahomana laso lo dikambo dia dibuku diamboleka diangana l’andja. Onde wɛ dieyaka? [Tshikɛ onto akɔ dihole akadimole.] Toko Bible. Naka anto efula wekɔ latɔ, kete ɔkɔkɔ ɔmɔtshi w’oshika wekɔ. Ɔkɔkɔ akɔ wekɔ lo 2 Timote 3:16.” L’ɔkɔngɔ a mbala divɛsa diakɔ, tɛ̂tɛ dia tokanyi tasungana ta lo artikɛlɛ ɔmɔtshi. Naka ndoko artikɛlɛ w’ɔtɔnɛ la kɛnɛ katama lo divɛsa sɔ, kamba olimu la biukubuku Dieu se soucie-t-il vraiment de nous?, etenyi 4.
4 Kana, l’ɔkɔngɔ a mbɔtwɛlɔ ka tshena pe, wɛ mbeyaka tetemala ɔnkɔnɛ:
◼ “Ondo wɛ akalembetɛ dia, l’ɛnɔnyi wa komelo ɛnɛ, l’andja w’otondo anto wekɔ lo ndjakiyanya dia akambo w’âtombɛ. Naa wanɛ w’ɛnayɛ oko kâhɛka asolo ladiko na?” Tshikɛ onto akɔ dihole akadimole. Ka epole ɔsɛkɛ lo ekakatanu ɛmɔtshi wa wolo efula wele l’anto lo tenyi dikina dia kɛtɛ ndo wotami lo numɛlɔ yêke katomba ya Réveillez-vous!. Naka yɔ kema, kamba olimu la biukubuku Nos problèmes—Qui nous aidera à les résoudre?. Kotola yambalo y’onto akɔ oya lo okandwelo wayêla Diolelo dia Nzambi.
5 L’atei w’anto wembolayɛ, ondo amɔtshi wakɛnya yema ya saki mbala kantondo, koko wakayendjola. Nɛ dia saki kawɔ hatetemala, wɛ mbeyaka mɛna dia ndoko ohomba mbaembolaka mbala la mbala. Lo yoho yotshikitanyi, wɛ mbeyaka mbadja l’ɔnɔngɔ w’ɔsɛsɛ ayɛ w’okahanyelo. Lam’alayɛ artikɛlɛ ɔmɔtshi w’ɛnayɛ ɔnɛ kokaka minda ɔmɔtshi a l’atei w’anto asɔ l’evɔ, sala wolo dia towembola kele otowɛnya wɔ.
6 Esambishelo ka lokolo l’ɔlɔlɔ: Ekɔ yoho yoleki dimɛna dia mbukiya onto saki ka periodikɛ. Wɛ mbeyaka mɛnya ntsho paka poso yakotola yambalo dia tatɛ sawo. Kadiyɛso kɛmɔtshi akakitshaka numɛlɔ mɔtshi ladiko dia mɛsa wa bilɔ kande ɔnɛ kele asekande w’eteta wayɛnake; ɔsɔku mbakandakahe kɔpi efula. Dja yimba dia ndjâla layɔ ngɔndɔ kɛnɛ, dia wɛ ndjiɛnyanya latayatshu tshalo kalasa, lo weteto ayɛ, la ntondo ka mbɔtɔ lo mutuka w’ɛmɛmba anto ndo tena tshɛ diahomanayɛ l’anto akina.
7 La Tour de Garde la Réveillez-vous! yakatosha diaaso dia tana ekadimwelo lo wembola w’ohomba lo dikambo dia Jehowa la di’ɔtɛmwɛlɔ ande. Saki kaso ele ka kamba olimu la periodikɛ shɔ lo tena tshɛ dia kimanyiya akina dia mbeya ‘Jehowa, Nzambi ka mɛtɛ.’—Osam. 31:5.