Ekadimwelo lo Wembola anyu

◼ Etena kakɔna kasungana mbata olui w’oyoyo wa Wekelo wa Dibuku wa l’Etshumanelo?

Dia mbata olui w’oyoyo wa Wekelo wa Dibuku wa l’Etshumanelo, pombaka menda dia kana kokaka monga l’anto oko 15 kana yema l’ɛse ka lâsɔ l’olui tshɛ wa wekelo wa dibuku, mbidja ndo olui wayonga lo Mbalasa ka Diolelo. Lande na kahombadiɔ monga ngasɔ na?

Etena kele elui wa Wekelo wa Dibuku wa l’Etshumanelo wekɔ totshitshɛ, ɔnɔmbɔdi kokaka mbidja yimba dimɛna le onto tshɛ lasangana l’olui ande. Ndo nto, onto tshɛ ekɔ la diaaso di’efula dia mbisha kɔmatɛrɛ lo yoho yasungana dia nde mbeya tɛkɛta akambo wendana la mbetawɔ kande lo sɛkɛ. (Heb. 10:23; 13:15) Monga l’elui wa totshitshɛ l’ahole wotshikitanyi wa l’ɛtshi ka nkɛtɛ k’etshumanelo kimanyiyaka anto dia mbɔtɔ lo Wekelo wa Dibuku wa l’Etshumanelo wosukanyi la lawakawɔ ndo dia nsanganya y’otsha l’esambishelo salemaka lo yoho y’ɔlɔlɔ efula. Tshumanelo diakafudia lofulo l’elui wa wekelo wa dibuku diakɛnyi dia ndo lofulo la wanɛ wɔtɔ lo wekelo wa dibuku mbakadɛ lam’akawalisanganya.

Ekɔ akambo amɔtshi wa lânde wakoka sala dia mbata olui okina wa wekelo wa dibuku kânga mbokokiwɔ monga tshitshɛ efula. Dikambo sɔ kokaka salema lo lɛtshi la nkɛtɛ langanyi l’etshumanelo etale kana l’ahole wele mvudu ya mpika efula kana yele bu l’ahole w’eshika w’anto mbidjasɛ. Naka ohomba wambonga, olui ɔmɔtshi kokaka mbatema ndo vɔ sanganaka la yanyi dia kimanyiya esombe w’anto, wanɛ wakamba olimu l’otsho kana akadiyɛso wele la waumi wele bu Ɛmɛnyi wa Jehowa.

Olui tshɛ wa wekelo wa dibuku pombaka monga l’apandjudi wele nge lo nyuma, wasambisha efula, ndo l’ɔnɔmbɔdi kâmɛ ndo ombadi w’oshika. Anangɛso pombaka sala dia kotsha ehomba ɛsɔ l’etshumanelo.

Dikumanyi kokaka sala di’etshumanelo pama naka vɔ sala woho w’elui wa wekelo wa dibuku wa l’etshumanelo monga la lofulo l’anto lakoka ndo kokamɛ dimɛna lo nyuma ndo ndjashikikɛ dia vɔ wekɔ lo sangana l’ahole w’amɛna. Etena tshɛ konga ohomba, elui w’eyoyo pombaka mbatema di’anto tshɛ kondja wahɔ w’oma l’ekongelo ka lo nyuma ka lânde kɛnɛ. Onde wɛ kokaka mbetawɔ dia wekelo wa dibuku salemaka lo luudu layɛ? Anto efula waketawɔ dikambo sɔ wakakondja ɛtshɔkɔ efula wa lo nyuma.