Têye Anyaso Ɔlɔlɔ
1 Diokanelo diasaso l’asekaso Akristo hahembetɛ paka lo wɔtwɛlɔ oto wa lo sanganya kâmɛ lawɔ. Sho salaka akambo lo ndjela lolango la Nzambi, ɔsɔku mbakondjaso diaaso dia ndjâla la diokanelo dia lo nyuma kâmɛ la Yeso. (Mako 3:34, 35) Ɔnkɔnɛ, l’atei w’etshumanelo k’Akristo, sho tekɔ la diokanelo dia lo nkumbo kâmɛ l’anangɛso ndo l’akadiyɛso wa lo nyuma wanɛ wahombaso mboka ngandji. (Joani 13:35) Ɔnkɔnɛ, wanɛ wambɔ̂tɔ l’atei wa “[ase luudu la Nzambi, NW]” pombaka ndjatshutshuya dia mbeyana ɔlɔlɔ lam’asawɔ.—Ef. 2:19.
2 Têye Anyaso lo Kombo Yawɔ: Onde sho mbeyaka kombo y’anangɛso l’akadiyɛso tshɛ wa l’olui aso wa wekelo wa dibuku oka? Elui akɔ tongaka esangɔ efula totshitshɛ, dikambo sɔ tokimanyiyaka dia sho nembetɛ kombo efula ya wanɛ wɔ̂tɔ lɔkɔ, kânga kombo yawɔ vɔ tshɛ. Naka sho hateye kânga kombo yawɔ, onde sho kokaka mbuta ɔnɛ sho mbeyaka anyaso ɔlɔlɔ oka?
3 Okokiso mbuta di’anto akina, mbidja ndo ana, wɔ̂tɔ lo sanganya ya lo Mbalasa ka Diolelo na? Ondo sho mbeyaka ndjâla la mbekelo ka ndeka mbekesanɛ paka l’angɛnyi amɔtshi ato. Kânga mbele kema kɔlɔ ndeka nanga mɛngɔlaka nshi tshɛ l’anto amɔtshi ato, sho hatolange mbidja olelo lo yoho y’okanaso ngandji, kana ndjâlaka l’asawo washa ekeketshelo paka l’anto amɔtshi ato. Sho pombaka ‘dihola etema aso hwe,’ lo mbidja weolo dia mbeya anangɛso l’akadiyɛso tshɛ ɔlɔlɔ. (2 Kor. 6:11-13) Lâsɔ mbokɛmaka hwe dia sho pombaka mbaeya lo kombo yawɔ.
4 Anangɛso wanɛ walɔmbɔla sanganya ya l’etshumanelo pombaka ndjatshutshuya dia mbeya lokombo l’onto tshɛ lɔ̂tɔ lo losanganya. Naka onto ambelamɛ lo lokombo lande oma lo lɔyɛnga, kete nde ayɛna ɔnɛ diɔmbwɛlɔ diande diambolangema. Paka lo diaaso diakɔ diamɛ, dikambo sɔ kimanyiyaka etshumanelo dia vɔ mbeyana lo kombo. Sho mbeyaka dia nshi tshɛ eyoyo kana angɛndangɛnda wayôngaka l’atei w’ampokami, ndo ayônga wolo dia mbeya kombo yawɔ tshɛ. Koko, lam’ayotodja weolo, tayokeketsha asekaso ndo tayoyasha le wɔ l’otema ɔtɔi.—Rom. 1:11, 12.
5 Tɔ̂sɛ Tɛdikɔ ta Mbeyana l’Asaso: Esangɔ efula, emendji w’eteta mbeyaka anangɛso l’akadiyɛso efula ɔlɔlɔ. Woho akɔna wawaeyawɔ esadi na? Lo weoho esato wotshikitanyi: (1) vɔ sambishaka kâmɛ lawɔ tena efula; (2) Lo ndjela akoka awɔ, vɔ mbetawɔka dia ntshɔ laka anangɛso l’akadiyɛso wawaelɛ; (3) vɔ mbɔsaka tɛdikɔ ta mbisha oyadi ana w’akɛnda kana epalanga mɔyɔ lo sanganya.
6 Onde sho hatokoke, lo yoho mɔtshi kana kina, nyomoleka mbekesanɛ l’anto efula ndo mbeka woho wa nyomoleka mbeya anyaso oka? Mɛtɛ, sho kokaka mbaeta dia vɔ totshindɛ l’esambishelo. Esambishelo ka lo luudu la luudu, waembwelo w’eyoyo, ɔlɔmbwɛlɔ wa wekelo wa Bible kana esambishelo ka l’ɛsɛsɛ l’ekimanyielo ka periodikɛ wekɔ weoho w’ɛlɔlɔ efula dia nyomoleka mbeyana efula. Lo tena dimɔtshi, ekɔ nto dimɛna dia mbelɛ anto akina lakayɛ, ondo kânga dia ndɛ awɔ mma kâmɛ kana yangangɔ mɔtshi ya tshitshɛ. Lam’ayotɔsa tɛdikɔ dia ndjasha le eyoyo kana le wanɛ wôkongaka ɛsɔnyi, sho kokaka ntsha la wolo aha paka dia mbakeketsha lo nyuma oto koko ndo sho tayokondja difuto dia woke efula.—Etsha 20:35; 1 Tes. 5:11.
7 Paulo akêyaka anyande ɔlɔlɔ. Yoho yadimolande kombo y’efula ka l’atei awɔ lo mikanda ande ekɔ djembetelo ya ndjasha kande lewɔ ndo ngandji ka l’otema ɔtɔi kakandawaokaka. (1 Tes. 2:17; 2 Tim. 4:19, 20) Weolo wadjaso dia nyomoleka mbeya anyaso ɔlɔlɔ ayotosha sho tshɛ ɛngɛnɔngɛnɔ.