Tubukubuku: Dihomɔ di’Oshinga a Wolo lo Dikambo di’Olimu
1 Otshudi w’oshika mbelaka dihomɔ dia weoho la weoho, ko ehomɔ l’ehomɔ kekɔ la lotumu latɔ shikaa. Sho wanɛ wele apandjudi wa Diolelo, tekɔ la lemba la tubukubuku tatokimanyiya dia kotsha ehomba wa lo nyuma w’anto wasambishaso l’ɔlɔlɔ tshɛ. (Tok. 22:29) Ondo sho mbeyaka pomana l’onto ɔmɔtshi lambɔkɔmɔ. Kana nto, onto ɔmɔtshi lakombola lowandji la losembwe, kânga layambola dia kana lɔsɛnɔ lekɔ l’oyango ɔmɔtshi. Woho akɔna wayotokamba olimu la tubukubuku taso dia mbakimanyiya na?
2 Lam’ɛnyanyaso biukubuku “Dieu se soucie-t-il vraiment de nous?”, sho kokaka mbuta ɔnɛ:
◼ “Anto amɔtshi wɛna paa la wɛngiya wele l’andja ɔnɛ toyangaka mbisha Nzambi ɛkɔmɔ l’akambo akɔ. Vɔ mbutaka ɔnɛ, nɛ dia Nzambi ekɔ Kanga-Wolo-Tshɛ, otondoyakiyanyaka mɛtɛ dikambo diaso tshike nde amboshidiya paa yaso. Ko wɛ akanayɛ lo dikambo sɔ na? [Tshikɛ onto akɔ dihole akadimole.] Osambu 72:12-14 mɛnyaka dia Nzambi ndjakiyanyaka mɛtɛ dikambo diaso. Nde kema l’ɛkɔmɔ lo dikambo dia paa la wɛngiya. Nde ekɔ lo ndaka ɔnɛ kem’edja atshi w’akambo wa kɔlɔ wayonyɛma. Biukubuku nyɛ, Dieu se soucie-t-il vraiment de nous?, yekɔ lo nembetshiya kɛnɛ kayondosala ndo woho akɔna wokokiso kondja wâhɔ lo dikambo diakɔ.” Ondo sho kokaka tetemala la sawo lo mɔmbɔla palagalafɛ 22, lo lɛkɛ 27.
3 Naka tekɔ lo kamba olimu la biukubuku “But de la vie”, sho kokaka tatɛ sawo ɔnkɔnɛ:
◼ “Oyâdi kakianɛ kânga l’ɔkɔngɔ, onto tshɛ kana suke la tshɛ ndjambolaka lo dikambo di’oyango a lɔsɛnɔ. Onde ekɔ paka dia sɛna ɛnɔnyi 70 kana 80 ko l’ɔkɔngɔ ntshɔ lo diombo oka? Ko kana lɔsɛnɔ lekɔ la kitshimudi mɔtshi oka? Wɛ akanayɛ lo dikambo sɔ na? [Tshikɛ onto akɔ dihole akadimole.] L’Osambu 37:29, sho mɛnaka kakɔna kele sangwelo dia diambo diaki Nzambi lo dikambo di’onto ndo dia kɛtɛ.” L’ɔkɔngɔ a mbala divɛsa diakɔ, towɛnya osato wele lo lɛkɛ 31, ndo tolembetshiya woho akɔna a lɔsɛnɔ layonga laso lo Paradiso.
4 Sho kokaka kotola yambalo y’onto oya lo biukubuku “Voici” lo mɛnya osato w’otondo wele lo lohoso ndo mumbola ɔnɛ:
◼ “Oko le yɛ, ahombama dia kadimola kɛtɛ ɔnkɔnɛ na? [Tshikɛ onto akɔ dihole asha diɔmbwɛlɔ dimɔtshi.] L’osato ɔnɛ, onto l’onto ekɔ la luudu ndo olimu wa dimɛna efula. Wɔladi wekɔ, mbo ya ndɛ yekɔ efula ndo kɛtɛ kema l’edinga wa kɔlɔ. Kânga mbahetahetawɔ la mbidja weolo, mbolomatadi y’anto mbetawɔka dia vɔ hawotokoka komia andja woho wa nganɛ. Koko, Bible toshikikɛka ɔnɛ Nzambi ‘ayetɛ diangɔ tshɛ eyoyo.’ [Fola biukubuku yakɔ lo lɛkɛ 30, ndo ala Enyelo 21:3, 4.] Biukubuku nyɛ yayokɛnya kɛnɛ kahombayɛ sala dia monga la lɔsɛnɔ l’andja ɔsɔ w’oyoyo.” Naka onto akɔ ekɔ lo mɛnya saki mɛtɛ, tofole biukubuku lo lɛkɛ 3, ndo towɛnya woho walɔmbɔlaso wekelo wa Bible.
5 La biukubuku “Nyudjase pundju l’ongenongeno la kete!”, sho kokaka ndjela yoho nyɛ:
◼ “Anto efula kanaka ɔnɛ vɔ pombaka ntshɔ l’olongo dia toyala la lɔsɛnɔ la pondjo, ko ayoyota lo dikambo dia sɛna pondjo la kɛtɛ na? [Tshikɛ onto akɔ dihole akadimole.] Bible toshikikɛka ɔnɛ: lɔsɛnɔ la pondjo kokaka ndjâla, ndo tɔ totɛka woho wokokiso kotsha oyango ɔsɔ.” Ala Joani 17:3. L’ɔkɔngɔ diko tɛnya ɔtɛkɛtshi aso osato 49, ndo towombole shate: “Onde wɛ ayolanga ndjâla la lɔsɛnɔ l’andja wele oko wɔnɛ oka?” Towosha biukubuku yakɔ ndo tolakane lande dia diembwelo di’oyoyo.
6 Tubukubuku tɛkɛtaka dia akambo wasalema nshi nyɛ, tɔ kadimolaka lo wembola wayambola anto ndo mbishaka ekeketshelo. Lam’ayotokambaka olimu la dihomɔ sɔ, sho tayokimanyiya anto w’etema ɛlɔlɔ ‘dia vɔ koma la ewo k’oshika ka mɛtɛ.’—1 Tim. 2:4.