Tolakanya Dui Dia Nzambi L’ekimanyielo Ka Tobukubuku
1 Ekambi wa Jehowa tshɛ wakayakimɔ wekɔ l’ɔkɛndɛ wa ndakanya anto akina Dui dia Nzambi. Sho mɛnaka ohomba w’ɔkɛndɛ ɔsɔ lam’eyaso shate ɔnɛ lakawasha lowandji tshɛ l’olongo ndo la nkɛtɛ ambotosha lotumu la ‘mbetɛ anto wa lo wedja tshɛ ambeki, . . . tawaetsha.’ (Mat. 28:18-20) Ɔnkɔnɛ, esambishelo ka lokumu l’ɔlɔlɔ tɔlɔmbaka dia sho koma embetsha.—2 Tim. 2:2.
2 Lo Yâta Afusa, tayɛnya diewo diaso di’embetsha lo ndɛkanɛ tobukubuku. Sho mbeyaka kondja tokanyi tɔmɔtshi t’oma lo Bible lɔkɔ, tele ohomba efula ko sho nɔngɔsɔla kɔmatɛrɛ mɔtshi yayotokimanyiya dia sho tatɛ sawo.
3 Naka biukubuku “Onde Nzambi Tokaneka Mete Ondo?” mbɛnyanyaso, kete sho mbeyaka mbuta shate:
◼ “Takendji asukanyi ayɛ efula, ko takɛnyi ɔnɛ vɔ wekɔ la lonyangu lo woho watafulanɛ odiakanelo, wɔma w’oma lo tamu t’akambo wa pɔlitikɛ ndo akambo wa ngala. Oko le yɛ, lande na kambɔtɛkɔya akambo asɔ ngasɔ? [Tôtshike etena akadimole.] Ekɔ dikambo dia diambo dia mɛna ɔnɛ Bible ambotataki awui asɔ. [Tâle 2 Timote 3:1-3.] Lembetɛ dia akambo akɔ wakahombe salema lo ‘nshi y’ekomelo.’ Dikambo sɔ mɛnyaka ɔnɛ ɛngɔ kɛmɔtshi kambokoma l’ekomelo katɔ. Oko le yɛ, naa ɛngɔ kakɔ?” Tôtshike etena akadimole. Tofole biukubuku lo lɛkɛ 22, towɛnya sango, ko sho sɛdingola divɛsa ɔtɔi kana avɛsa ahende woshilami lo lɛkɛ lakɔ. Tɔshi tɛdikɔ woho wa ndjokalola dia ndjolembetshiya bonde ketawɔso ɔnɛ ɛtshɔkɔ ɛsɔ waya k’asa onyo l’ɔhɛmbɛ.
4 Ondo tayolanga mɛnyanya biukubuku “Quel est le but de la vie? Comment le découvrir?” ɔnkɔnɛ:
◼ “Anto efula mbokaka wolo dia tana oyango lo lɔsɛnɔ lawɔ. Paka yema tshitshɛ tsho mbele l’ɔngɛnɔngɛnɔ, koko efula wekɔ la lɔsɛnɔ laha l’elongamelo ndo la shɔkɔ. Onde wɛ fɔnyaka ɔnɛ lɔsɛnɔ la woho ɔsɔ mbakalɔngɔsɔla Nzambi lo dikambo diaso? [Tôtshike etena akadimole.] Lo ndjela kɛnɛ kata Bible, Nzambi nangaka dia sho monga la lɔsɛnɔ l’andja wele oko wɔnɛ.” Towɛnya sango diele lo lɛkɛ 21, ko l’ɔkɔngɔ sho ndjotshɔ la nde lo lɛkɛ 25 la 26, odingɔ 4-6, ko sho mbolembetshiya kɛnɛ kakalake Nzambi. Tôke dimbola diayela nɛ woho wa sho ndjokadimola lo diendelo diayaye: “Ngande wokokiso ndjashikikɛ ɔnɛ Nzambi ayokotsha alaka ande?”
5 Sho kokaka ndɛkanɛ biukubuku “Nyudjase pundju l’ongenongeno la kete!” lam’ɛnyaso onto otondo wa sango diele lo lohoso ko mombola ɔnɛ:
◼ “Onde wɛ nangaka mbidjasɛ l’andja wele oko wɔnɛ woludi l’anto wele l’ɔngɛnɔngɛnɔ? [Tôtshike etena akadimole.] Bible totɛka ɔnɛ Nzambi nangaka anto ndo nde nangaka mbaɛna wele la lɔsɛnɔ l’ɔngɛnɔngɛnɔ pondjo pondjo la nkɛtɛ.” Totshu lande lo sango 49, ko sho mbala divɛsa dimɔtshi l’atei a wanɛ woshilami. L’ɔkɔngɔ towɛnya sango dia numɛlɔ 50, ko sho mbolembetshiya kɛnɛ kahombaso sala naka sho nangaka mbidjasɛ lo Paradiso. Towote ɔnɛ tayoya nto dia ndjosawola lande dikambo di’ohomba wa ndjâla la mbetawɔ le Yeso Kristo.
6 Jehowa ngɛnangɛnaka lam’ɛnyaso ‘ohamelo aso lo sɛkɛ lo mpokɛka lotui ɔlɔlɔ lo wetshelo aso.’ (1 Tim. 4:15, 16) Tobukubuku tayonga ohomba efula le so dia sho kimanyiya wanɛ walanga mboka “nkumu y’ɔlɔlɔ ya yangɔ mɔtshi y’ɔlɔlɔ efula.”—Is. 52:7, NW.
[Caption on page 7]
Tokimanyiya Anyaso Dia Vɔ Kondja Ɛlɔlɔ
1 Jehowa ekɔ lo ndaka dia têtsha kɛnɛ kahombaso mbeya. L’osambu Osam. 32:8, nde ekɔ lo tolaka ate: “Dimi [layokosha ewo, NW] ndu layukenyaka mbuka ka we nkendakenda. Dimi layukulaka, layukendaka.” Eshikikelo kɛsɔ kekɔ kiɔkɔ y’ɛlɔlɔ a weke le so. La yimba ya mbetawɔ ndjahombia, sho nangaka mɛnya onyaso wahɔ akɔna wakokande kondja naka nde ndjela alako w’eshika wa lo Bible. (Isaya 48:17) Kɛsɔ mbayotosala lo mbisha anto dibuku Loseno la Pondjo lo Asase a Ndjoko. Lam’ayototasawolaka l’anto, sho kokaka mbaɛnya ohomba wa Bible lo weoho wotshikitanyi.
2 Lam’ele ekakatanu wa l’awala wambekɔnɛ efula nshi yaso nyɛ, sho kokaka mbisha onto kanyi nyɛ lo ndjaɛkɛ lo dibuku “Loseno la Pondjo”:
◼ “Efula k’anto wakasawudi la mi nyangaka efula lo mɛna woho wambofulanɛ ekakatanu wa l’awala lo yɛdikɔ ya mamba ndo woho wambodɛ lofulo l’awala wavɔ. Wɛ akanayɛ lo dikambo sɔ? [Tshikɛ onto akɔ dihole akadimole.] Anto efula hawoshihodia lande na mɛtɛ kele ekakatanu wa weolo wa ngasɔ. Otondoyala atshukanyi mbetawɔka dia mbidja weolo w’oma ka tshina di’otema, tshike vɔ wotokokɛ awala awɔ ndo wotoyala l’ɔngɛnɔngɛnɔ wa mɛtɛ. Okitanyiyelo w’alako wa lo Bible kimanyiyaka wadi l’omi dia vɔ monga la diwala di’ɔngɛnɔngɛnɔ.” Tâle Efeso 5:28, 29, 33. Tofole dibuku lo lɛkɛ 243, tɔsɛdingole odingɔ 16 la 17, ndo towosha dibuku diakɔ.
3 Ana wekɔ l’ohomba di’ambutshi awɔ mbetshaka tena dimɔtshi di’ɛlɔlɔ kâmɛ la wɔ ndo mbidjaka yimba dia olakanyelo awɔ. Lam’ayototakahɛka anto dibuku “Loseno la Pondjo,” sho kokaka mbuta ɔnkɔnɛ:
◼ “Sho tshɛ ndjashaka lo dikambo dia nshi yayaye y’anaso. Oko le yɛ, naa yoho yoleki ɔlɔlɔ yakoka ambutshi nɔngɔsɔla anawɔ dia vɔ ndjoyala l’ɔngɛnɔngɛnɔ lo nshi yayaye na? [Tshikɛ onto akɔ dihole akadimole.] Ɛsɔ tohokame dako dia lo Bible diatosha yokedi nyɛ ya lo Bible yakafundama ambeta oko ɛnɔnyi 3 000. [Tâle Tukedi 22:6.] Oyadi kânga ana wekɔ lo kondja wahɔ a woke oma lo olakanyelo wakondjawɔ lo kalasa, ambutshi mbawasha olakanyelo woleki dimɛna la ngelo. Dikambo sɔ nɔmbaka tena, yambalo ndo ngandji, koko sunganaka mɛtɛ di’ambutshi ndjatshutshuya dia ntsha dikambo sɔ.” Tofole dibuku diakɔ lo lɛkɛ 245 ndo tɔsɛdingole odingɔ 20 la 21. L’ɔkɔngɔ diko, tôlembetshiya woho wakoka onto kamba la diɔ dia mbeka Bible la nkumbo kande.
4 Ondo sho nangaka nkahɛ anto dibuku “Loseno la Pondjo” lo mbalembetshiya ɔnɛ nkɛtɛ kayokadimɔ paradiso:
◼ “Wɛ ndjambolaka mɛtɛ wate: ngande wayonga lɔsɛnɔ laso lo nshi yayaye? Lo Dɔmbɛlɔ dia Shɛso, Yeso akatetsha dia sho nɔmbaka dia lolango la Nzambi ntshama lanɛ la nkɛtɛ oko watshamalɔ l’olongo. Ko lâsɔ, ngande wayonga nkɛtɛ lam’ayokotshama ɛtɛkɛta ɛsɔ na? [Tshikɛ onto akɔ dihole akadimole.] Hɛnyi sango diɛnya woho wayokadimɔ nkɛtɛ kɛnɛ paradiso. [Towɛnya osato wa lo lɛkɛ 12 la 13. Oma lâsɔ, tâle Isaya 11:6-9, divɛsa diofundami lo odingɔ 12.] Shi ɔlɔ wa mamba mbidjasɛ lo dihole dia nganɛ? Dibuku nɛ nembetshiyaka kɛnɛ kahombayɛ ntsha wɛ la nkumbo kayɛ, dia nyu nsɛna lo paradiso kɛnɛ.”
5 Ekɔ ohomba talɔngɔsɔdi sawo diaso naka sho nangaka kondja etombelo w’ɛlɔlɔ l’esambishelo kaso ka lo luudu la luudu. La ntondo ka sho nkɔkɔla lo soko dimɔtshi, sho pombaka monga la kanyi mɔtshi ya shikaa ya lo Bible yakokaso mbisha onto. Tatohɛke ndo kɔmatɛrɛ kɛmɔtshi ka tshena pe lo kanyi mɔtshi y’ohomba yele lo periodikɛ kana lo kiatshikatshi yasangoyaso mbisha onto naka nde halange mbɔsa dibuku. Lo ngɔndɔ k’Asase a Ndjoko, tokambake la waaso tshɛ wakondjaso dia monɛ ntɔngɔ ya Diolelo. (Und. 11:6) Ɔsɔku mbayotokimanyiya anyaso dia vɔ kondja ɛlɔlɔ wa pondjo.