Onde Wɛ Ambohembaka Esambishelo Ka la dikɔlɔ?
1 Naka olimu aso wekɔ lo tondja elowa, sho ngɛnangɛnaka dia mbokamba. Koko, naka hatɛnyi ndoko otombelo w’ɔlɔlɔ, kete tohekɔ ndo ɔlɔ aya bu kânga yema. Olimu wele ohomba ekɔ oshasha ndo ɔtshɔkɔ. (Enda lo Undaki 3:10-13.) Sho kokaka mbɔtɔnganyiya dui sɔ l’olimu aso w’esambishelo. Sho tamboshila mɛna ɔnɛ, lam’asambishaso lo soko la soko ndo lam’ahomɔso lokolo la sawola l’anto lo Bible, sho tokalolaka la ngelo la wolo lo nyuma. Sho mbokaka mɛtɛ dia tambokotsha dikambo dimɔtshi.
2 L’ahole kambe, anto efula hawotanema la wakawɔ lam’etaso la pindju. Tshumanelo dimɔtshi diakalɛmbia okakatanu ɔsɔ lam’akawɔshi tɛdikɔ dia sambishaka la dikɔlɔ, ndo wakakondja etombelo w’ɛlɔlɔ. Lakaso, sho kokaka sambisha ko memɛ naka wonya ambodja. Apandjudi amɔtshi mbutaka ɔnɛ lam’etawɔ la dikɔlɔ vɔ tanaka anto efula la wakawɔ ndo, vɔ mongaka, tena efula, la yimba ya yɔɔ ndo nangaka mpokamɛ losango la Diolelo. Onde wɛ ambohembaka esambishelo ka la dikɔlɔ lo mbilo kayɛ?—Enda lo Mako 1:32-34.
3 Dikumanyi Kongɛka Esambishelo ka la Dikɔlɔ: Lo tshumanelo efula, anto efula tshɔ̂ka lo nsanganya y’esambishelo yalɔngɔsɔlawɔ la dikɔlɔ kana la tosho ta shimba. Kokaka kanɛ apandjudi w’ɛlɔngɔlɔngɔ waya oma la kalasa l’ɔkɔngɔ a midi ndo epalanga washidiya elimu awɔ wonya ambokadimɔ. Le apandjudi amɔtshi wele kema la diaaso dia sambisha lo wikɛndɛ, esambishelo ka la dikɔlɔ l’atei a lomingu ekɔ yɛdikɔ yasungana yawasha diaaso dia sambishaka tena la tena.
4 Esambishelo ka la dikɔlɔ kokaka salema lo weoho wotshikitanyi. Sho kokaka ntshɔ lo luudu la luudu ko ndɛkɛ anto periodikɛ la ekanda wakalɔngɔswama dia ngɔndɔ kengo. Ɔsɔ ekɔ nto diaaso dia dimɛna efula dia menda anto waki komonga la wakawɔ etena kakete apandjudi akina la pindju kana lo wikɛndɛ. Ondo ahole akina wekɔ wasungana dia esambishelo ka l’ɔsɛsɛ, lɛnɛ okokiso pomana l’anto wayakalola oma l’elimu. Efula mɛnaka ɔnɛ la dikɔlɔ mbele etena koleki ɔlɔlɔ ka kalola dia tenda wanɛ wakɛnya saki.
5 Tônge la Yewo ndo la Kɛsɔ: Tomba la dikɔlɔ di’otsho ekɔ wâle lo kartie mɔtshi ya l’esomba aso. Ekɔ dimɛna mɛngɔlaka ahende kana l’olui. Sho nangaka mbuta ɔnɛ elui efula wa apandjudi ahende wasambisha kâmɛ l’ɔsɛsɛ akɔ wâmɛ. Anangɛso, tôhɔ dikambo nɛ: Hasungana dia mbidja apandjudi asato kana anɛi olui ɔtɔi, dia vɔ sambisha kâmɛ. (Enda lo Mako 6:7; Luka 10:1.) Sho kokaka sambisha shamɛ, kana ahende ahende. Ayoleka dimɛna sɔna ɛsɛsɛ wele kema wodjima ndo ntshɔ paka lo kartie yeyaso ɔnɛ hatotonga la wâle. Lam’akɔkɔlaso lo lokuke lɔmɔtshi, temale yoho y’anto tɛ̂na ndo toyalowole dimɛna. Tônge la shɛnɔ. Tena efula, ndeka dimɛna minyɔ lam’adja wonya, lo dihole dia têndana l’otsho etena kele ondo anto akina woyalɔngɔsɔla dia ndala.
6 Nshi y’ɔwɔ ndo akɔlɔ wahalwɛ mvula ndeka sungana dia sambisha la dikɔlɔ. Mɛtɛ Jehowa ayɔtshɔkɔla weolo aso dia sho mbôkambɛ “olimu w’ekila ndo la yanyi ndo l’otsho.”—Eny. 7:15, NW.