Têwoya Anto ‘Awui wa Pɔlɔfɛsi’
1 Tekɔ lo sɛna l’etena katakotshama pɔlɔfɛsi yofundami lo dibuku di’Enyelo. Anto efula pembaka dia shihodia olembetshielo w’efukutanu wasalema nshi nyɛ. Vɔ kokaka kimanyiyama ‘lam’ayowoka awui’ wa pɔlɔfɛsi ka dibuku di’Enyelo. (Eny. 1:3) Lo Ngɔndɔ ka Divwa, tayonga la diaaso dia mbakimanyiya lo mbasha dibuku Révélation: dénouement. Lam’ayototadiɛnyɛnyaka, tatohɛke ɔnɛ dibuku di’Enyelo diakatewoyisha ekakatanu wahomana l’anto ɛlɔ kɛnɛ. Kakɔna kakokaso mbuta na?
2 Ondo mbɔtwɛlɔ ka lo sawo kɛnɛ kayonga dimɛna efula:
◼ “Ata, ndjala ya kasha, ndo hemɔ yekɔ lo pɛnyahɛnya anto l’eleko kɛnɛ ka 20. Oko le yɛ, lande na kasalema akambo asɔ lam’ele tambohama efula l’akambo wa tshulatshula na? [Tshikɛ onto akɔ etena akadimole.] Anto efula mambaka dia mbeya ɔnɛ ekakatanu ɛsɔ tshɛ wakewoyama l’atei wa Bible. Ondo wambokaka watɛkɛta dikambo di’‘ambahemi a falasa anɛi wa lo Enyelo.’ Kɛnɛ kata Bible lo dikambo di’ambahemi a falasa asɔ kekɔ mɛtɛ tshondo ya pɔlɔfɛsi kɛnaso ekotshamelo katɔ l’akambo weta l’andja w’otondo ɛlɔ kɛnɛ. [Tofole dibuku Révélation : dénouement lo tshapita 16 ndo towɛnya esato w’oma lo lɛkɛ 91 polo 97.] Pɔlɔfɛsi kɛnɛ tɛkɛtaka di’etena ka shɔkɔ ya mamba, koko tɔ mbishaka ndo elongamelo kɛmɔtshi. [Tâle Enyelo 6:2 lo odingɔ 3.] Ombahemi a falasa lahemi lâdiko dia falasa ka wɛma kɛdikɛdi Yeso Kristo. Nde akalake dia minya akambo wa kɔlɔ ndo mbela andja w’ɔngɛnɔngɛnɔ ndo wa wɔladi oma l’ekimanyielo ka Diolelo diakandatetsha dia sho nɔmbaka.” Towosha dibuku.
3 Ondo dimbola diayela nɛ diayotondja ɔkɛtshanyelo wa dimɛna efula:
◼ “Oko le yɛ, kakɔna kahomba dia kumiya lɔsɛna la pâ la l’andja ɔnɛ? [Tshikɛ onto akɔ etena akadimole.] Anto efula fɔnyaka ɔnɛ pombaka akambo tshɛ wa l’andja ɔnɛ tshikitana ko vɔ mbika. Bible mɛnyaka ɔnɛ Nzambi mbeyaka woho wakoka ekakatanu aso kandolama ndo nde akasha daka dia tokimanyiya.” Tofole dibuku Révélation : dénouement lo lɛkɛ 171 ndo tâle Enyelo 11:15 lo odingɔ 1. Towɛnya esato wa lo lɛkɛ 302 la 308, ndo tokotole yambalo y’onto akɔ oya l’ɛlɔlɔ wayela Dioelelo dialɔmbwama oma le Kristo. L’ɔkɔngɔ diko, tôlembetshiya woho wakokande ndamɛ kondja ɛlɔlɔ oma lɔkɔ.
4 Ondo mbɔtwɛlɔ ka lo sawo kɛnɛ kayosungana:
◼ “Anto efula wakâle dibuku dia lo Bible dietawɔ ɔnɛ Enyelo wakɛnyi ɔnɛ ekɔ dibuku dia wolo mana fundo. Diɔ kɔndɔlaka akambo efula wa mamba ndo wele ohomba efula. Dibuku nɛ, La Révélation le grand dénouement est proche!, sɛdingolaka divɛsa la divɛsa dia lo Enyelo. Diɔ nembetshiyaka ɔnɛ ekotshamelo ka Pɔlɔfɛsi mendanaka l’ɔm’ɔmɔ la l’atei aso.” Tofole dibuku lo lɛkɛ 15, odingɔ 2, ndo towɛnya divɛsa di’Enyelo 1:1 diofundami l’alɛta woleki edima. Tote onto akɔ ɔnɛ divɛsa tshɛ dia lo dibuku di’Enyelo nembetshiyama lo yoho nyɛ ndo awui wofundami wayowokimanyiya dia nde shihodia pɔlɔfɛsi shɔ ya diambo. Towosha dibuku naka nde ekɔ la saki.
5 Naka onto ekɔ la wosanu kana tambɛna di’oko nde kema la saki k’efula, sho kokaka mbotshikɛ periodikɛ kɛmɔtshi kana kiatshikatshi mɔtshi. Naka nde amboyɛnya saki kande lo diendelo dikina ko sho ndjowosha dibuku.
6 Anto tshɛ mendanaka la losango lele lo dibuku di’Enyelo. Omalɔkɔ, ekɔ ohomba di’onto tshɛ mboka awui wa lo pɔlɔfɛsi. Nyɛsɔ tosale la weolo aso tshɛ dia mbewoya losango lɔsɔ l’ohomba efula!