Tokimanyiya Akina dia Vɔ ‘Kitanyiya Akambo Wofundami’
1 Aha paka ‘mboka’ awui w’amvutshi wele lo dibuku dia Enyelo tsho kete ambokoka. Dia sho kondja ɛlɔlɔ tshɛ watomba oma lɔkɔ, sho pombaka ‘kitanyiya’ kɛnɛ kofundami. (Eny. 1:3) Le onto lalanga mbetɛ anto akina ambeki, tshika ekanda ekɔ paka nna dia ntondo to. L’ɔkɔngɔ wa sho pomana l’onto layasha, lakombola mbeka, sho pombaka kalola esadi dia ndjokimanyiya dia nde mbeya akambo akɔ efula. Dikambo diakɔna diokokiso tɛkɛta lo diendelo diaso dikina na?
2 Naka takatɛkɛta dikambo dia ambahemi a falasa anɛi wa didjidji mbala ka ntondo, kete sho kokaka tatɛ sawo ɔnkɔnɛ:
◼ “Mbala ketshi takatɛkɛta dikambo dia dibuku di’Enyelo ndo takɛnyi ɔnɛ akambo wasalema ɛlɔ kɛnɛ l’andja w’otondo wekɔ lo kotsha pɔlɔfɛsi shɔ. Enyelo tshapita 6 akate dikambo dia lɔkɛndɔ l’ambahemi a falasa anɛi wa didjidji wayela akambo a ngala ndo fɔnu la nkɛtɛ. Tekɔ lo mɛna woho wasalema akambo asɔ ko asho aso. Anto efula ndjambolaka etena kakɔna kayoshila fɔnu shɔ ndo etena kayoya etena k’ɔngɛnɔngɛnɔ l’atei w’andja wa wɔladi. Ko wɛ akanayɛ lo dikambo sɔ na? [Tshikɛ onto akɔ etena akadimole.] Ambeki wa Yeso wakayange dia mbeya okadimwelo lo dimbola sɔ.” Tâle Mateu 24:3, lɛnɛ okami dimbola diakɔ, ko l’ɔkɔngɔ sho ndjadia divɛsa 34, lɛnɛ asha Yeso okadimwelo. Naka onto akɔ ekɔ lo ndjasha, towosha tolembetelo tokina tendana la nshi y’ekomelo.
3 Naka takatɛkɛta dikambo dia Diolelo diaki Nzambi mbala kakatɛnana ntondo, kete sho kokaka sangoya dia tosawola nto lam’ayotombola dimbola nɛ:
◼ “Oko le yɛ, lowandji la woho akɔna lahombama dia kotsha ehomba w’anto tshɛ na? [Tshikɛ onto akɔ etena akadimole. Tâle Jeremiya 10:23.] Oko wadiɛnayɛ, ndoko lushi lakonge Nzambi la kanyi y’ɔnɛ onto alɔmbɔlɛ lɔsɛnɔ lande ndamɛmɛ. Akambo efula watokomɛ ndjaka oma lo woho walanga anto ndjalɔmbɔla vɔamɛmɛ aha l’ekimanyielo ka Nzambi. Paka Diolelo diaki Nzambi to mbele tshɔi yakɔ ya lowandji lakoka kotsha ehomba aso.” Totshu lo lɛkɛ 339 la dibuku commet raisonner, ko sho kɛtshanya la nde lo avɛsa wele lo ɔtɛ a dui woyedi wa hende. Totetemale la sawo lo nembetshiya lande na kakokaso mendɛ paka le Nzambi.
4 Ondo tayolanga pemba ndjela dako nɛ dia tatɛ sawo lo Bible:
◼ Tɛnya onto sango diele lo lɛkɛ 302 la dibuku Révélation: dénouement, ko sho kotsha ɔnɛ: “Anto wayonga la lɔsɛnɔ la nganɛ etena kayosalema lolango la Nzambi la nkɛtɛ oko asalemalɔ l’olongo. Koko, anto amɔtsni wekɔ lo mboka wɔma ɔnɛ kɔlɔ atokoyokalola nto. Dikambo hadiotokoka salema nɛ dia anto wa kɔlɔ tshɛ wayoshishɔ.” Tâle Osambu 37:10, 11. Tɔsɛngɔlɛ ɔtɛkɛtshi aso dia nde tetawoe dia mbeka l’Ɛmɛnyi wa Jehowa Bible dia nde mbeya akambo akina efula.
5 Naka takatshike kiatshikatshi “Loseno la woladi lo andja w’oyoyo,” kete sho kokaka mɛnya onto sango ko sho mbala odingɔ wa ntondo l’ɔtɛ a dui wahɔnyi wata ɔnɛ: “Loseno lo andja w’oyoyo waki Nzambi,” ko sho kotsha ɔnɛ:
◼ “Dikambo dimɔtshi di’ohomba dia sala diekɔ, naka sho nangaka ndjâla la lɔsɛnɔ l’atei w’andja wa nganɛ.” Tâle odingɔ wa komelo wele lo kiatshikatshi ko sho mbosha dibuku Révélation : dénouement.
6 Lam’ele oyango aso ele wa tatɛ mbeka l’anto Bible, sho pombaka salaka waendelo w’eyoyo w’eshika. Todje dikambo sɔ l’ekongelo kaso, ndo toyalɔngɔsɔlɛ dimɛna. Ɔsɔku mbayotokoka mɛtɛ kimanyiya anto w’etema ɔlɔlɔ.—Eny. 22:6, 7.