Tewoya Anto Lokumu L’ɔlɔlɔ, Oko Weyaso Ɔnɛ Nshi Hayoviya
1 Sho mɛnyaka ɔnɛ tekɔ la lowando la mamba l’elongamelo ka Diolelo diaki Nzambi lo kambaka olimu w’Akristo l’otema ɔtɔi. Sho pombaka mbôkamba oko weyaso ɔnɛ nshi hayoviya. Lande na? Ekambi bu efula, ekomelo ka dikongɛ di’akambo dia kɔlɔ kaya suke ndo lɔsɛnɔ l’anto wa lo lɛtshi laso la nkɛtɛ lekɔ lo wâle. (Ezek. 3:19; Mat. 9:37, 38) Ɔkɛndɛ w’ohomba efula ngasɔ nɔmbaka dia sho mbidja weolo aso tshɛ l’olimu w’esambishelo. Ngande wayotɛnya l’esambishelo ɔnɛ sho mbeyaka dia nshi hayoviya? Lo nɔngɔsɔlaka mbɔtwɛlɔ ya l’asawo y’amɛna, lo nyangaka anto l’etete l’ahole tshɛ watanemawɔ, lo mbeyaka dimɛna saki tshɛ kɛnya onto, lo salaka waendelo w’eyoyo esadi dia fudia saki kakɔ ndo lo mbohɔka ɔnɛ, nɛ dia nsɛnɔ yekɔ lo wâle, sho pombaka mbɔsa olimu aso la nɛmɔ. Tokanyi tayela tɔnɛ mbeyaka monga ohomba le so lam’ayalɔngɔsɔlaso dia mbewoya anto lokumu l’ɔlɔlɔ lo Asase a Ndjoko, oko weyaso ɔnɛ nshi hayoviya. Tayosha anto dibuku La Révélation: le grand dénouement est proche!
2 Ondo sho kokaka tatɛ sawo lo shila akambo wakomɛ asukanyi aso tshɛ lo tshena pe shate:
◼ “Anto efula mbetawɔka ɔnɛ Nzambi ekɔ, koko vɔ ndjambolaka ɔnɛ nshi yayaye ya ngande yatombɛnde. Wɛ akanayɛ lo dikambo sɔ? [Tôtshike akadimole.] Onde wɛ mbeyaka dia Bible têtshaka lolango la Nzambi lo dikambo di’anto ndo kɛnɛ kasalande dia likotsha?” Tofole dibuku Révélation: dénouement lo lɛkɛ 301. Tâle Enyelo 21:1 l’odingɔ wa ntondo, kâmɛ ndo olembetshiyelo wa divɛsa diakɔ lo etenyi kahende ka l’atei atei w’odingɔ 2. Towɛnya sango diele lo lɛkɛ 302 diɛnya olembetshiyelo wa dikambo sɔ lo kɛnɛ kendana la nshi yaso yayaye. L’odingɔ 6, tâle Enyelo 21:4. Naka onto akɔ ambetawɔ, towosha dibuku l’oshinga wasungana. Tôkane la nde wonya wasungana dia ndjotetemala la sawo lushi lokina.
3 Sho mbeyaka ndjotetemala la sawo l’Enyelo 21:1, 4 ɔnkɔnɛ:
◼ “Mbala ketshi kakamaye, takatɛkɛta dikambo dia daka diaki Nzambi dia nɔngɔsɔla tshunda di’oyoyo di’anto lanɛ la nkɛtɛ. [Tokotole yambalo yande nto lo lɛkɛ 302 la dibuku Révélation: dénouement.] Onde wɛ kombolaka dia nkumbo kayɛ monga la lɔsɛnɔ la nganɛ? [Tôtshike akadimole.] Dimbola mumbwamaka ɔnɛ: Onde sunganaka monga la mbetawɔ l’alaka wa Nzambi? Enda kɛnɛ katande ndamɛ lo dikambo diakɔ.” Tâle Enyelo 21:5, 6a l’odingɔ 8 wa lo lɛkɛ 303. Tôke dimbola dia l’odingɔ 9, lo lɛkɛ 304, ndo tâle okadimwelo, kâmɛ ndo etelo ka komelo ka l’odingɔ akɔ. Tɔ̂sɛngɔlɛ dia mbeka la nde Bible ofele. Tɔshi tɛdikɔ dia ndjowɛnya woho wasalema wekelo akɔ lushi lokina.
4 Anto efula ndjakiyanyaka dia woho watafule ekakatanu wahomana l’anto; omalɔkɔ sho kokaka mbuta, lo diendelo diaso dia ntondo, dui dimɔtshi diele oko:
◼ “Anto efula ndjakiyanyaka dia ekakatanu watɛnya pâ. [Toshile ɛmɔtshi.] Aya ɛnɔnyi akumi mbatolaka ase pɔlitikɛ ɔnɛ wayoshidiya ekakatanu akɔ pondjo, ndo amɔtshi wakahembe disala. Oko le yɛ, lande na katatɛkɔya pâ na? [Tôtshike akadimole.] Bible mbishaka olembetshiyelo ɔmɔtshi wahalange anto efula mbetawɔ. Dibuku di’Enyelo kɔndɔlaka ta dimɔtshi diakalɔma l’olongo. Enda kɛnɛ kakatombe lo ta diakɔ, lo ndjela Enyelo 12:9.” Tâle divɛsa diakɔ ndo tofole dibuku Révélation: dénouement lo lɛkɛ 182. Tokambe la sango dia mɛnya woho wayatambiya Satana tshavu l’akambo w’anto. Towosha dibuku diakɔ. Tôkane la nde dia ndja nto la ndjowɛnya woho wayoshidiya Nzambi ekakatanu w’anto.
5 Naka takalake onto dia ndjowɛnya woho wayoshidiya Nzambi ekakatanu wa nshi nyɛ, kete sho kokaka pemba mbuta ɔnɛ:
◼ “Lamboya nto paka dia ndjokenda dia sho tetemala la sawo diaso diendana la yoho y’oshika ya shidiya ekakatanu w’anto. Mbala ketshi, takɛnyi lo Bible ɔnɛ Satana kesaka anto wa lo nkɛtɛ k’otondo. Lam’ele nde ekɔ etongami ka lo nyuma koleki onto, onde wɛ fɔnyaka ɔnɛ yoho mɔtshi yekɔ ya minya shɛngiya yande ya kɔlɔ pondjo? [Tôtshike akadimole.] Ohenda kɛnɛ kata Bible lo dikambo sɔ.” Tâle ndo tolembetshiya Enyelo 20:1-3. L’ekimanyielo ka sango diele lo lɛkɛ 4 la 5 la dibuku Ewo, towɛnya nganɛ wayonga lɔsɛnɔ l’anto lam’ayoshila shɛngiya yaki Satana. Tɔ̂sɛngɔlɛ dia mbeka la nde Bible ndo tohembe tatɛ ko wonya akɔ.
6 Anto efula ndjashaka lo dikambo dia dihole diodjashiwɔ. Lâsɔ sho kokaka pemba tatɛ sawo dimɔtshi nganɛ:
◼ “Tekɔ lo mɛna dia anto suke la tshɛ ndjakiyanyaka lo dikambo dia olanyelo wa hiɛlɛlɛ, ashi ndo mbo ya ndɛ. Lo wedja ɛmɔtshi, lɔsɛnɔ lekɔ ndo lo wâle oma lo woho wele dihole diodjashiwɔ diekɔ kɔlɔ. Lam’ele Nzambi mbele Otungi wa nkɛtɛ, afɔnyɛ ayondosala na? [Tôtshike akadimole.] Bible mbutaka ɔnɛ nde ayokoya l’anto l’ɔkɔkɔ wa woho wakambawɔ la nkɛtɛ. [Tâle Enyelo 11:18b.] Ohokana dia wɛ sɛna la nkɛtɛ kahawayolanya hiɛlɛlɛ!” Toke epole ɔsɛkɛ lo daka dia Nzambi diendana la paradiso lo Enyelo 21:3, 4. Towɛnya sango diele lo lɛkɛ 302 la dibuku Révélation: dénouement. Naka saki kɛnya onto akɔ tosokoyaka dia disala, towosha dibuku ndo tɔshi tɛdikɔ dia kalola la ndjowenda.
7 Lam’akalolaso dia tenda onto lakɛnya saki lo dikambo dia Paradiso ka la nkɛtɛ, sho kokaka mbuta ɔnɛ:
◼ “Mbala ketshi, taketawɔ dia mbuta ɔnɛ pombaka Nzambi mbɔtɔ l’akambo w’anto dia shidiya dikambo di’olanyelo wa hiɛlɛlɛ la nkɛtɛ. Koko dimbola mumbwamaka ɔnɛ: ahombaso sala dia sɛna l’andja w’oyoyo ndo wa losembwe waki Nzambi na?” Tâle Joani 17:3. Tɔsɛngɔlɛ ɔtɛkɛtshi aso dia nde mbetawɔ wekelo wa Bible waha fute falanga wayowokimanyiya dia nde monga l’ewo kɛsɔ ka lânde.
8 Ande diɛsɛ diele laso dia mbɔsama oko ase olimu lo dinela diasalema ɛlɔ kɛnɛ, ndo dia kamba olimu w’esambishelo washimbela nsɛnɔ y’anto lee! Tonge sho tshɛ la lotumu la mbewoya anto lokumu l’ɔlɔlɔ, oko weyaso ɔnɛ nshi hayoviya ndo ‘ɔnɛ opipi aso kema w’anyanya.’—1 Kor. 15:58.