Tshoto y’Etangelo la Réveillez-vous!: Periodikɛ Yasungana lo Tena Diaso Nɛ dia Wolo
1 Oko akadiatama lo pɔlɔfɛsi yele lo Bible, akambo w’ofukutanu wekɔ lo salema l’andja w’otondo! Lam’endaso kɛnɛ kasalema lasuke laso, oyadi l’atei kana l’andja w’ɔlɔngɔswamelo wa Teokrasi, tekɔ lo mpotɔ dia sambisha “lukumu l’ololo” la Diolelo ekɔ dikambo diahomba salema esadi esadi. (Mako 13:10) Dikambo sɔ totshutshuyaka dia sho tetemala l’olimu aso l’ohetoheto tshɛ lo ngɔndɔ ka Kɔlɛkɔlɛ.
2 Olimu wakambaso lo ngɔndɔ kɛnɛ mbikaka epole ɔsɛkɛ l’ohomba wa losango laso. Sho kokaka tetemala l’odianganyelo wa Nkumu ya Diolelo wakatatatɛ lo ngɔndɔ ka Mɔmbi la ka Yitshu. Dia sho nyomoleka monga l’ohetoheto l’olimu ɔsɔ ndo dia mbotsha anto wele lo mbilo kaso saki, Tshoto y’Etangelo la Réveillez-vous! yayotondja asawo wasungana, wayɔkɛnɛmɔla olembetshiyelo wa pɔlɔfɛsi y’endana l’efukutanu watomba l’andja ɔnɛ. Woho akɔna wakokaso nɔngɔsɔla wɛnyanyelo ɔmɔtshi wayôtsha anto saki ya periodikɛ na?
3 Mɛtɛ, wɛnyanyelo aso ayonga dimɛna efula naka sho takula wanya anɛ woleki ohomba: (1) Tɔsɔnɔlɛ sawo dimɔtshi diɛnaso oko diayokoka munanda etema w’anto wele lo mbilo kaso. (2) Todje kanyi mɔtshi lɔkɔ kana divɛsa dimɔtshi diɛnaso ɔnɛ diayotsha ɔtɛkɛtshi aso saki. (3) Tɔlɔngɔsɔlɛ mbɔtwɛlɔ kɛmɔtshi ka lo sawo ka tshena pe kele la mɔyɔ wa la lɔngɛnyi, dimbola kana etelo kɛmɔtshi kaka epole ɔsɛkɛ lo kanyi mɔtshi y’ohomba y’oma lo Bible, ndo mbɔsɛngɔla la wangasanu tshɛ dia nde nongola periodikɛ. Oko akokaso diɛna, ekɔ wɔdu efula. Lande na ahatalɔngɔsɔla wɛnyanyelo ɔmɔtshi kâmɛ la opandjudi wayototshindɛ otsha l’olimu na? Wɛnɛ wayela ɛnɛ wakashama oko diɛnyɛlɔ. Wɛ kokaka mbaɔtɔnganyiya la periodikɛ yeke ka tomba yatanema l’etshumanelo.
4 Nɛ dia numɛlɔ ka “Réveillez-vous!” ka Mɔmbi 22 ekɔ lo mumbola dimbola di’ɔnɛ “Onde tekɔ lo nshi y’ekomelo?,” sho kokaka sɛdingola tokanyi toshami l’ɔtɛ a dui w’ɔnɛ “Nshi y’Ekomelo,” lo lɛkɛ 89 la dibuku “Comment raisonner.” Sho kokaka tatɛ sawo lo mbuta ɔnɛ:
◼ “Tamboya dia ndjokenda woho wa sho sawola lo kɛnɛ k’endana l’olembetshiyelo w’akambo wa lonyangu wasalema lasuke laso. Ohenda kɛnɛ kata sawo nɛ. . . ”
5 “Tshoto y’Etangelo” ya Mɔmbi 1 tondjaka dimbola nɛ: “Onde Ekila Sawola Dikambo dia Ɔtɛmwɛlɔ?” Lam’ashaso onto periodikɛ, sho kokaka mbuta shate:
◼ “Vɔ mbutaka tena efula ɔnɛ tosombɔke ko wɛ sawola l’onto lo dikambo di’ɔtɛmwɛlɔ, nɛ dia dikambo sɔ tondjaka londjo efula. Ko wɛ akanayɛ lo dikambo sɔ na?” L’ɔkɔngɔ diko, towɛnya ɛtɛkɛta ɛmɔtshi w’oma lo sawo diakɔ.
6 Sho kokaka mɛnya onto sawo diakatombe lo “Tshoto y’Etangelo” ya Mɔmbi 15 diele l’ɔtɛ a dui w’ɔnɛ “Onde Mɛtɛ Kokaka Mbeyama?” Mbɔtwɛlɔ ka lo sawo kɛnɛ mbeyaka ndjâla dimɛna efula:
◼ “Ɛlɔ kɛnɛ ɛtɛmwɛlɔ wamboleka efula ko anto amɔtshi woyambola dia kana mɛtɛ kokaka mbeyama lo dikambo sɔ. Sawo nɛ nembetshiyaka woho wa kondja okadimwelo w’oshika lo dimbola sɔ. . . ”
7 Lande na kahatatahembi wɛnyanyelo aso nto kâmɛ l’opandjudi okina woho w’aha sho tokakatana na? Ɔsɔku mbayotokoka mbishana tokanyi t’ohomba tayotokimanyiya dia sho ndjâla tomanamana ko ndeka monga l’eshikikelo.
8 Lam’ele ekomelo ka dikongɛ di’akambo nɛ ndjasukanaka, nyɛsɔ totakule ekolo esadi esadi woho wa sho kimanyiya anto w’etema ɔlɔlɔ dia vɔ tomba oma lo Babilɔna ka Woke! (Eny. 18:4) Tshoto y’Etangelo la Réveillez-vous! mboleki kamba lotumu l’olimu ɔnɛ wahakambemaki nto. Tosha Jehowa losaka lo woho wakandatosha dihomɔ sɔ di’amɛna efula.