Nkumu ya Diolelo Yotshikitanyi lo Dikambo di’Anto Tshɛ
1 Oma ko Ngɔndɔ ka Nɛi 24, tekɔ lo kahɛ anto Nkumu ya Diolelo yotshikitanyi; l’andja w’otondo, yɔ yekɔ lo kotola yambalo y’anto wayakiyanya. Losango lele lɔkɔ kema paka latɛkɛtama nshi tshɛ; lɔ lekɔ nto ohomba woleki tshɛ. Apandjudi wa lo tshumanelo tshɛ sukɛka olimu ɔsɔ l’otema awɔ tshɛ, wakombola mbakombolawɔ mbisha miliyɔ y’anto losango lɔsɔ k’anya. Onde wɛ ekɔ lo kamba olimu akɔ woho wokoki?
2 Wɔmbɔ wa Nkumbu ya Diolelo watomamla l’oseka etshumanelo tshɛ, lo yɛdikɔ ya tokatshikatshi oko 50 l’opandjudi ndo 200 l’ombatshi mboka. Ngana yamboyokahanya? Naka wɛ kokahanya lofula lakayalongamɛka, onde wɛ ambokana yimba lo kɛnɛ kokokiyɛ sala dia ndjikahanya efula la ntondo ka yɔ shila lo lɔkɔtɔ l’etshumanelo? Lande na ahayakambe olimu w’ombatshi mboka wa tshanda? Onde wɛ hakoke kondja ɛlɔlɔ watomba oma lo nsanganya y’esambishelo yalɔngɔsɔma lo lomingu, ɛnyɛlɔ oko lo mbɔtɔka, lo nyɛ yasalema la dikɔlɔ?
3 Dikumanyi diayodjaka yimba dimɛna dia mbilo kindjakindjama. Naka etshumanelo hakoke ntshɔ lo tenyi dimɔtshi dia mbilo, kete vɔ kokaka nɔmba ekimanyielo ka tshumanelo dikina diosukanyi lawɔ. Weolo wadjawɔ l’otema ɔtɔi ndo woho wakamba tshumanelo kâmɛ dimɛna ayowakimanyiya mɛtɛ dia awui tshɛ salema.
4 Ondo wɛ mbokaka ɔngɛnɔngɛnɔ efula l’esambishelo lam’ele anto efula kokaka sambisha oyadi apandjudi weke eyoyo kana ɛlɔngɔlɔngɔ wa l’etshumanelo. Sho nongamɛka dia ɔngɛnɔngɛnɔ ɔsɔ wayongaka tsho ndo ayotshutshuya onto l’onto dia nde nyomotshɔ dia tena anto waketawɔ. Sho tshɛ tambokeketshama dia mbɔsaka nɔtɛ ya lo luudu la luudu y’eshika ndo fundaka towuiwui tɔmɔtshi t’anto wɛnya saki. Ayosungana dia tetemala sala waendelo w’eyoyo lo ngɔndɔ yayoyela tele l’oweso wa tatɛ mbeka l’anto Bible.
5 Akokayɛ mbuta lam’ayoyokalola? Wɛ ayɛna dia ekɔ ohomba mbuta ɔnɛ: “Wɛ mbohɔka kiatshikatshi yakamakotshikɛ atayala edja; dimi kanaka dia wɛ akakondja diaaso dia ndjiala ndo dia kana yema ya yimba lɔkɔ. Losango lele lɔkɔ lakakɛtshama efula lo tshenyi yanyu ya ngelo, nɛ dia lɔ lekɔ l’akambo w’eshika wendana l’anto tshɛ.” Tɛkɛta di’akambo amɔtshi wakatama wahomba kana yimba wele lo lɛkɛ la hende ko wɛ mumbola ɔnɛ: “Oko le yɛ ahombaso sala dia sho ndjalɔngɔsɔla dia kɛnɛ katombɛ nshi yayaye na?” Tshikɛ onto akɔ etena akadimole. Naka nde ekɔ lo mɛnya saki, nyɔsɛdingole akambo akina wele lo lɛkɛ 2 polo lo 4 la Nkumu ya Diolelo, ko wɛ mbɔsɛngɔla dia mbeka la nde Bible, kana naka hakoke, shande numɛlɔ yeke katomba ya periodikɛ.
6 Naka wɛ ekɔ lo sambisha lo mbilo k’etshumanelo kekina, kewoya lokombo l’onto tshɛ lakɛnya saki, kele apandjudi wa l’etshumanelo kengo kaweye woho wa sala waendelo w’eyoyo. Woho akɔ wâmɛ naka wambokosha ɔkɛndɛ wa sala waendelo w’eyoyo, totshimbatshimbake dia menda anto asɔ esadi.
7 Okahanyelo wa Nkumu ya Diolelo nyɛ akatɔhɛtshahɛtsha ndo akakeketsha onto l’onto l’atei aso dia nde mbidja weolo efula dia sambisha Diolelo. Sho kokaka ndjâshikikɛ ɔnɛ okahanyelo ɔsɔ ayeta dimɛna ndo ɔnɛ ayokimanyiya anto l’andja w’otondo dia vɔ nyomoleka mbeya lokombo ndo sangwelo dia Jehowa dia diambo efula. (Is. 2:4, 5) Ko woho watataleke ndjasha l’esambishelo, mbatataleke monga l’ɔngɛnɔngɛnɔ.—Osam. 126:3.