“Ɛnɔnyi kinunu w’eyoyo —kakɔna katokongɛ lo nshi yayaye na?”
1 Wombola ɔsɔ waki lo timba t’anto wa lo nkɛtɛ k’otondo. Kânga mbakasale ana w’anto akambo efula lo efula ka ntambe nyɛ yetshi, anto wambɔkɔmɔ alemba nɛ dia ekakatanu wa weke wambɛnya anto pâ l’edja ka nkama y’ɛnɔnyi wekɔ lo tatetemala tsho. (Jobo 14:1; Osam. 90:10) Lâsɔ, lende akoka anto tana esambelo na?
2 Lo Ngɔndɔ ka Dikumi ndo ka Dikumi l’Ɔtɔi, tayokondja diaaso dia mbisha anyaso anto okadimwelo lo wombola ɔnɛ. Woho akɔna na? Oma l’okahanyelo wa Nkumu ya Diolelo No. 36. Traktɛ kakɔ kekɔ l’ɔtɛ a dui ɔnɛ: “Ɛnɔnyi Kinunu w’Eyoyo—Kakɔna Katokongɛ lo Nshi Yayaye Na?” Lo nshi dikumi la tshanu y’etatelo ka Ngɔndɔ ka Dikumi, tayokahɛ anto Tshoto y’Etangelo la Réveillez-vous ! Koko, tatɛ oma lo Lushi l’Ɔtɔi, Ngɔndɔ ka Dikumi 16, polo Lushi la Tanu, Ngɔndɔ ka Dikumi l’Ɔtɔi 17, tayoyasha la wolo tshɛ l’okahanyelo wa Nkumu ya Diolelo No. 36. L’etena kɛsɔ, tayoyasha dia kahanya paka Nkumu ya Diolelo No. 36 lo nshi ya lo lomingu. Lo nshi ya wikɛndɛ, tayoyikahanya kâmɛ la periodikɛ.
3 Onde ndo wɛ mbayoyasha tshɛ l’okahanyelo Ɔsɔ? Dikumanyi, ekambi w’olimu ndo ambatshi mboka la dia mbisha ɛnyɛlɔ l’okahanyelo ɔsɔ, nɛ dia vɔ mbele la ntondo k’olimu akɔ. Apandjudi efula kokaka nɔngɔsɔla ekongelo kawɔ woho wa vɔ kamba oko ambatshi mboka wa tshanda lo ngɔndɔ ɔtɔi kana ngɔndɔ yakɔ hiende yayosalema okahanyelo ɔsɔ. Akina wamboyadjɛ oyango wa sambisha efula oleki woho wokowosambishaka.
4 Ɛnɔmbɔdi wa Wekelo wa Dibuku kokaka monga dihomɔ diakeketsha anto tshɛ wa l’elui awɔ dia ndjasha tshɛ l’okahanyelo wa Nkumu ya Diolelo No. 36. Ondo mbeyaka monga ko apandjudi amɔtshi wambɔla yɔɔ lo kɛnɛ kendana l’olimu w’esambishelo. Dikumanyi la dia membola anto asɔ dia mbeya kɛnɛ kahombama sala dia mbâkimanyiya. Ondo vɔ koka mbɔsa yɛdikɔ di’opandjudi ɔmɔtshi wambohokɔ akambo tshindɛ onto tshɛ lambɔla otsha l’esambishelo lo ngɔndɔ shɔ. Dia mpɛtshahɛtsha apandjudi wambɔla asɔ, kokaka monga tsho ohomba mbaɛnya woho wa sala mbɔtwɛlɔ ka wɔdu dia mbisha onto Nkumu ya Diolelo No. 36.
5 Ɔsɔ ayonga nto diaaso di’ɔlɔlɔ le ambeki wa Bible waya suke la mana wekelo wa dibuku Ewo ndo waya l’akoka wa koma apandjudi wahatabatizama dia vɔ tatɛ sambisha. Kânga ana w’akɛnda, kokaka mbidja lonya l’olimu ɔnɛ w’ohomba.
6 Ekɔ ohomba sala paka mbɔtwɛlɔ ka wɔdu. Wɛ kokaka mbuta wate:
◼ “Dimi lakayakimɔ la lolango dia mbetsha wenya wakimi l’okahanyelo wa losango l’ohomba efula lɔnɛ le nkumbo tshɛ ya lo [ta lokombo la ngelo kana l’osomba]. Dikatshi diakiyɛ diɔ nɛ. Lambokɔlɔmba dia mbadia dikatshi diakɔ lam’alangɛ.” Ayonga dimɛna dia tshika atapa watotombaka laso l’esambishelo lam’ayototakahanyaka Nkumu ya Diolelo No. 36.
7 Nyokongɛ dimɛna nsanganya y’otsha l’olimu w’esambishelo: Dikumanyi la dia menda dia kana ekongelo k’otsha l’esambishelo kekɔ dimɛna ndo sunganaka. Omendji w’olimu la dia ndjâshikikɛ ɔnɛ bɛtshi dia nkɛtɛ diakoka anto sambisha lo luudu la luudu ndo l’ahole w’ase okanda diekɔ lo yɛdikɔ yakoka woho wokoki onto tshɛ kamba olimu ɔnɛ lo yoho y’efula. Naka ayokoka, kete nsanganya y’otsha l’esambishelo yayɔlɔngɔswamaka oseka lushi tshɛ la lo lomingu, lo waa wikɛndɛ ndo l’akɔlɔ. Kokaka nɔngɔsɔla losanganya lokina l’esambishelo l’akɔlɔ wa yɔɔ woho wa kimanyiya wanɛ wɔtɔ kalasa, la wanɛ wanyɔ oma l’elimu la dikɔlɔ ndo anto akina.
8 Kɛnɛ kahomba salema dikambo di’anto wahatatane lawakawɔ: Oyango aso ele sala tshɛ dia sambisha anto efula. Naka wɛ ambɔkɔkɔla ko ndoko onto, kete ɔsa adrɛsɛ ko wɛ ndjeta wonya okina. Koko, naka nyaya lo lomingu l’ekomelo l’okahanyelo ko anto wa lo lokombo lakɔ hawotanema, wɛ mbeyaka mbâtshikɛ kɔpi ka Nkumu ya Diolelo No. 36 lo dihole diahakoke ambetshetshi mɛna. Dikumanyi mbeyaka mbutɛ etshumanelo dia tshika kɔpi ka Nkumu ya Diolelo No. 36 le anto wahatanema lawakawɔ mbala ka ntondo kawaendawɔ naka etshumanelo kekɔ lo shamba kana kekɔ la bɛtshi dia nkɛtɛ efula diele ayonga wolo dikindjakindja tshɛ lo nshi y’okahanyelo.
9 Nyɛsɔ toyasha l’olimu akɔ! Tshumanelo la dia sala tshɛ dia shidiya okahanyelo l’ɛtshi kawɔ ka nkɛtɛ la ntondo ka vɔ komɛ lo Ngɔndɔ ka Dikumi l’Ɔtɔi 17. Naka ɛtshi kanyu ka nkɛtɛ kekɔ woke efula, kete apandjudi amɔtshi kokaka kamba vamɛ l’ahole wakoka ndo wele bu wâle. Ekongelo kɛsɔ kokaka tokimanyiya dia tana anto efula wasungana nongola tokatshikatshi tɔnɛ. Tanyohɛke funda nkombo yaki anto tshɛ wakɛnyisha nsaki kawɔ.
10 Dikumanyi pombaka tendji kɔ̂lɔmɔ kana lofulo la periodikɛ la ladiko layonga ohomba l’etshumanelo ndo sala kɔmandɛ ka lofulo lakɔ. Ndoko ohomba sala kɔmandɛ ka Nkumu ya Diolelo No. 36 nɛ dia wayotomɛ etshumanelo tshɛ lofulo lahombama. Ambatshi mboka wotshikitanyi, wa pondjo, ndo wa tshanda wayolongola l’onto ndo l’onto kɔpi 200 dia kahɛ anto, ndo opandjudi tshɛ wa l’etshumanelo ayokahanya kɔpi 50. Onde wɛ ekɔ suke ndo la mposa k’efula ka ndjasha l’olimu ɔnɛ wa lânde? Tekɔ mɛtɛ la diɛsɛ dia mbewoya asekaso anto tshɛ kɛnɛ kakalake Nzambi lo nshi nyɛ yaya kasuke!