Ekadimwelo lo Wembola Anyu
◼ Ahombaso mɛmba otsha lo nsanganya?
Lo nsanganya ya lomingu la lomingu sho kondjaka wetshelo ndo ekeketshelo dia ɔlɔlɔ aso. (Is. 48:17; Heb. 10:24, 25) Koko, sho kondjaka ɛlɔlɔ w’oma lɔkɔ efula kana yema tshitshɛ lo ndjela woho wayalɔngɔsɔlaso.
Ayonga ɔlɔlɔ dia ose nkumbo tshɛ mɛmba ekanda ande wayekama ndo oseka ɛngɔ kekina tshɛ kele ohomba lo nsanganya, ɛnyɛlɔ oko Bible, buku di’esambu, okanda kana ekanda wayekama, kalupɛ ya mbɔsaka nɔtɛ, kâmɛ ndo kidiyɔ kana bikɛ
Lo wonya wa Kalasa k’Olimu wa Teokrasi, Ekongelo ka Kalasa k’Olimu wa Teokrasi kekɔ ohomba ndo Manuel de l’École du ministère théocratique. Diangɔ sɔ tokimanyiyaka dia sho mbohɔ ɛtɛ w’alako wayoshama oma le ambeki ndo dia mpokɛ lotui l’alako w’ɔnɔmbɔdi a kalasa. Sho kokaka mbɔtɔnganyiya alako asɔ washama le so shoamɛ, ndo kɛsɔ tshɛ ele l’oyango wa nyomolowanya asawo aso dimɛna efula ndo wɛnyanyelo aso l’esambishelo. Oma lo Ngɔndɔ ka Ntondo 1996, alako efula wa wetshelo (discours d’instruction) wayɔsɔnamaka oma lo dibuku Les Témoins de Jéhovah — Prédicateurs du Royaume de Dieu. Ondo hatotokoka dia ose nkumbo kaso tshɛ mɛmba dibuku diande ndamɛ; ondo tayɛmba ɔtɔi dia nkumbo kaso tendaka lɔkɔ.
Lo wonya wa losanganya l’olimu, tekɔ l’ohomba wa Olimu Aso wa Diolelo la dibuku Comment raisonner. Tɛ̂mbɛ ekanda tshɛ wayowɔsaka awui oma lɔkɔ lo losanganya, oko wɛnɛ wayokambema olimu lo diɛnyɛlɔ. Dikumanyi pombaka mɛmba dibuku Organisés pour bien remplir notre ministère.
Ambutshi pombaka sala tshɛ kakokawɔ sala dia anawɔ mbidjasɛ ki ndo mpokɛ atui wonya wa nsanganya. Lo mbashaka kɔpi kɛmɔtshi ka Tshoto y’Etangelo ndo y’ekanda ekina, la ntondo ka ndo vɔ mbeya mbala, saki kawɔ kayolomialomiama. Etena kalakanyawɔ ana dia vɔ mbɔsaka ekanda la nɛmɔ ndo dia kambaka lawɔ olimu, vɔ kondjaka mbekelo ya lo nyuma yasha panda yayowomba lɔsɛnɔ lawɔ l’otondo.
Ɔngɛnɔngɛnɔ wakondjaso oma lo nsanganya ya l’etshumanelo tɛkɔyaka etena kɔtɔso lɔkɔ la dihomɔ tshɛ diahombama. (2 Tim. 3:17) Ɔsɔ mbele yoho y’ɔlɔlɔ yakokaso ndjashikikɛ ɔnɛ ‘tambolola la ewo k’oshika ka lolango lande [laki Nzambi], lo lomba tshɛ ndo lo yimba tshɛ ya lo nyuma.’—Kol. 1:9.