Teyake Kamba la Wenya Aso
1 Jehowa mbidjaka yimba lo wenya. Nde kombolaka dia ndo sho lawɔ ndjakiyanya lo dikambo sɔ ndo nde tokimanyiyaka lo tshimbo y’ɔlɔngɔswamelo ande. Tambokeketshama dia mongaka ‘nshi tshɛ la lotumu efula l’olimu wa Nkumadiɔndjɔ.’ (1 Kor. 15:58) Ngasɔ mbayotoleka monga l’etete l’olimu wa Jehowa.
2 Sho tshɛ tekɔ la wenya 168 oseka lomingu tshɛ. Wenya ɛsɔ sho kambaka lawɔ la lomba oka? Onde sho mɛnyaka ɔnɛ tekɔ lo mbeya mɛtɛ lɛnɛ ayaso lo ndjela alamanaka wa Jehowa? Onde tekɔ lo mbekola yimba yaso l’elimu wele bu ohomba efula?
3 Ekɔ ohomba dia ndjâla l’ekongelo ka dimɛna. Akristo efula ndjatshutshuyaka dia ndjela elimu woleki ohomba l’ɔnɔngɔ. Olimu tshɛ nɔngama lo ndjela ohomba awɔ. Woho akɔna wakokaso shikikɛ ɔnɛ wɔnɛ mboleki ohomba na? Bible mbutaka di’onto pombaka ‘ngɛnangɛna oma l’olimu ande wa wolo.’ (Und. 3:13) Elimu ɛmɔtshi ndeka ekina tondja elowa w’ɔlɔlɔ. Tende etombelo wakokaso kondja oma lɔkɔ. Onde tayokondja wâhɔ w’ɔlɔlɔ lo sala olimu ɔsɔ kapanda? Onde sho koka ‘ngɛnangɛna’ oma lo olimu aso a wolo? Naka aha ɔsɔku, kete ondo olimu ɔsɔ bu mɛtɛ ohomba efula.
4 L’Olimu Aso: Sho ngɛnangɛnaka di’apandjudi koma la wonya lo nsanganya y’otsha l’esambishelo, mpokamɛ alako la yambalo tshɛ ndo ntshɔ aha la tshimbatshimba otsha lo mbilo. Sho ndeka nanga ndjasha l’olimu w’esambishelo, oleki kɔma anya. Mɛtɛ, Paulo akɛnaka ohomba dia ntsha akambo l’ɔnɔngɔ, nɛ dia nde akafunde ɔnɛ: “tshɛ asalemi la kɔmba ndo l’ɔnɔngɔ.”—1 Kor. 14:40, NW.
5 Lam’asambishaso, ondo sho shishaka wonya ɔmɔtshi w’ohomba la tomuyaka. Tena efula naka yanyi amboleka wolo, kete sho mbeyaka mumuya yema dia kondja wolo wa tetemala la elimu aso. Koko apandjudi efula ndekaka nanga sambisha ndo hawɔshi wenya wakawalɔngɔsɔdi lo dikambo di’esambishelo dia mumuya kâmɛ l’anangɛwɔ ndo akadiyɛwɔ akina. Pombaka memala l’atei atei lo dikambo sɔ.
6 Bible mbukaka dia kânga “Yemema . . . mbeyaka tena diayo” dia yɔ monɔ ngelo; ndo tɔnɔna, “to tatumbaka mbu ya nde yato lu nshi y’owo” dia tɔ ndjɔsɛna dimɛna lo nshi y’avula. ‘Jer. 8:7; Tuk. 6:6-8) Ɔsɔ mbele sheke ya mbeya kamba la wenya aso. Ndo sho lawɔ pombaka ‘mbeya tena diaso diakashikikɛma dimɛna.’ Sho pombaka mbidja yimba lo wenya aha la sala tshamba ndeko. Sho hatohombe mbeya ntsho kɛnɛ kahombaso sala, koko mbeya ndo etena kakɔna kahombama salema dikambo diakɔ. Sho pombaka monga la mbekelo ka kongɛka elimu takanyiya ndo akambo wa wanyandja wakoka têkamɛ. Sho pombaka tshikaka wesanu ɛmɔtshi dia sho kimɔ wenya aso l’elimu woleki ohomba oko nɔngɔsɔla nsanganya, esambishelo ndo elimu ekina wa Teokrasi.
7 Sho kombolaka ndjâla oko Shɛso lele l’olongo, Jehowa Nzambi, latetsha ɔnɛ “engo tshe keko la etena kato.” (Und. 3:1) Naka tayeyaka kamba la wenya aso, kete ‘tayokotsha olimu aso ɔlɔlɔ.’—2 Tim. 4:5.