“Nyosungukalake”
1 Lam’akatɛkɛta Yeso ɛtɛkɛta wofundami lo Mateo 26:38-41 (NW), nde aki suke la koma lo tena diakaleke wolo lo lɔsɛnɔ lande l’onto. Tena sɔ diakahombe monga tena dioleki ohomba l’Ɔkɔndɔ w’otondo w’anto. Panda k’anto tshɛ kaki lo wâle. Ambeki wa Yeso wakahombe ‘sungukala.’
2 Tekɔ ɛlɔ kɛnɛ ka onyɔ w’oyelo wa Yeso ele l’ɔkɛndɛ ande a wedi ehende: otshungodi la ondjaki. Oko weso Akristo wa têwo weya ohomba wa tena, sho hatɔkɔmɛ paka anya ato ko kongaka panda. Sho mbeyaka ɔnɛ tekɔ la dia mangemɛka wonya tshɛ. Ekɔ ohomba dia sho tetemala la ‘kambaka wolo ndo ndɔ ta’ l’olimu wa Jehowa. (1 Tim. 4:10) Ko kayotota lo dikambo di’ɔm’ɔmɔ a l’atei aso? Onde tekɔ lo sungukala?
3 Toyasɛdingole: Yeso akawaewola ndo l’ɛtɛkɛta ɛnɛ ate: “Nyuyalamaki.” (Luka 21:34, 35) Sho pombaka ndjalamaka, tenda ‘di’aha ndjâla l’onongo ndo l’ɛkɔmɔ . . . l’atei wa lɔlɔnga la kɔlɔ ndo lahasembwe.’ (Fil. 2:15) Onde sho sɛnaka oko Akristo nshi tshɛ, tôkoya Yeso ndo tayela ɛlɛmbɛ wofundami lo Dui dia Nzambi? Sho pombaka tshika lɔkɛwɔ tshɛ lahasungana l’Okristo la l’andja ɔnɛ wele “la tshina dia wolo wa kanga kɔlɔ.” (1 Joa. 5:19, NW; Romo 13:11-14) Etena kayasɛdingolaso lo ndjela Afundelo, onde mɛtɛ sho sungukalaka oko akatɔlɔmbɛ Yeso?
4 Dikumanyi pombaka mbidja yimba dia kotshaka ɛkɛndɛ awɔ dimɛna l’atei w’etshumanelo, weya ɔnɛ wayokoya lawɔ lo woho wakokɛwɔ ɛkɔkɔ. (Heb. 13:17) Ewandji wa nkumbo wekɔ l’ɔkɛndɛ wa lânde wa nɔmbɔla wa lo mvudu yawɔ lo mboka ya Jehowa. (Etat. 18:19; Jas. 24:15; enda lo 1 Timote 3:4, 5.) Ekɔ nto ohomba efula dia sho tshɛ ndjela didjango diele lo Bible dia mbokanaka ngandji. Ɔsɔ kele djembetelo yeyama Lokristo la mɛtɛ.—Joa. 13:35.
5 Todje Yimba dia Mbewola Onyaso: Sungukala halembetshiya ɔnɛ ndjalama tsho ko ambokoka. Tekɔ l’ɔkɛndɛ wa mbetɛ anto ambeki. (Mat. 28:19, 20) Ngandji kokaso onyaso pombaka totshutshuya dia sho mbêwola woho wa nde mbika l’elanyelo k’andja ɔnɛ. Ɔkɛndɛ ɔsɔ wekɔ le Okristo tshɛ. Ɔsɔ ekɔ dikambo dimɔtshi di’ohomba lo ɔtɛmwɛlɔ aso. (Romo 10:9, 10; 1 Kor. 9:16) Tena efula sho pomanaka la wendjodi kana l’otonelo wa lohonolɛ lam’atatakambe olimu ɔnɛ washa panda. Sho pombaka tetemala, oyadi kânga anto efula hawodje yimba lo kɛnɛ kawaewolaso. (Ezek. 33:8, 9) Ngandji k’oshika kokaso Nzambi la anyaso kayototshutshuya dia sho tetemala.
6 Ɔnɛ kema etena ka sho mɛna ɔnɛ ambokoka. Hatokoke tshikɛ ekiyanu wa lo lɔsɛnɔ la nshi tshɛ diaaso dia mbekola yimba yaso, kânga ndjâsha l’ɛngɛnɔngɛnɔ wa l’andja ɔnɛ polo ndo lo yɛdikɔ ya vɔ ndjoyala djonga. (Luka 21:34, 35) Ɛlɔ mɛtɛ mbele etena kahombaso mpotɔ ɔnɛ tekɔ lo sɛna lo etena ka wolo. Etena kayokotsha Yeso Kristo tɛdikɔ takandɔ̂sɛ dikongɛ dia kɔlɔ kaya ka suke. Paka wanɛ wasɛna, wele la yewo ndo wasungukala mbayoka. Naka sho nɛmiya alako wa Yeso ko ‘ndjokondja panda l’akambo asɔ tshɛ,’ kete mɛtɛ tayoka Jehowa losaka.—Luka 21:36.