Onde Wɛ Sɛngɔlaka Anto dia Mbeka La Wɔ Bible?
1 Apandjudi efula mbidjaka olimu wa tatɛ mbeka l’anto Bible lo mbasɛngɔlaka mbala kakɔ ɔtɔi dia vɔ sɛdingola Bible. Pami kɛmɔtshi kakatonaka ekanda aso mbala efula aketawɔ la lolango lande ndamɛ dia mbeka Bible. Nde akate ate: “Dimi tokombolaka nshi tshɛ dia mbeka Bible.” Wekelo wakatatɛ, ko nkumbo kande k’otondo kakahame esadi eto.
2 Sho tshɛ pombaka nyanga woho wa tatɛ mbeka l’anto Bible. Dia anto pama dia vɔ koma ambeki wa Kristo; sho pombaka mbaetsha. (Mat. 28:19, 20) Ko tete le, lam’ekaso la wɔ Bible kâmɛ mbawaetshaso. Tena efula sho kokaka tatɛ mbeka l’anto Bible paka lo mbatɛ ɔnɛ sho nangaka mbaɛnya woho wa mbekesanɛ la Bible ndo l’alaka wa Nzambi. Ɔnangɛso ɔmɔtshi akatatɛ mbeka Bible l’anto atanu lo kiatshikatshi Loseno la woladi lo andja w’oyoyo. Lam’ele nde kokokaka mbeka l’efula k’anto kɛsɔ tena tshɛ, nde akawasha apandjudi akina.
3 Naka sho kema l’okakatanu dia tatɛ mbeka l’anto, kete sho kokaka ntshɔka l’apandjudi akina kâmɛ ndo mbakimanyiyaka dia ndo vɔ lawɔ tatɛ mbeka l’anto. Kana sho kokaka mbisha ase etshumanelo akina anto weka laso. Naka wɛ nangaka mbeka l’onto ɔmɔtshi Bible, lande na kahayakoke sɛngɔla anto wahomana la yɛ lo soko la soko? Opandjudi ɔmɔtshi akakalola dia tenda osekaseka ɔmɔtshi waki kɔmɛnya saki efula. Opandjudi akɔ̂sɛngɔla kango dia mbeka la nde Bible, ko nde aketawɔ. Ɛlɔ kɛnɛ nde ambolongola batismu, ndo ɔnango la omoto la ɔnango omɛnde la pami wekɔ lo mbɔtɔ lo nsanganya.—Ngal. 6:6.
4 Aha anto tshɛ watatɛ la mbeka Bible mbayotetemala. Aha anto tshɛ weka mbayetawɔ mɛtɛ. Koko amɔtshi wayodisala. Naka sho tatɛka mbeka l’anto efula, kete tayonga la diɛsɛ efula dia konya anto, oma l’ekimanyielo kaso, lo vɔ tɛmɔla Jehowa.