Tosha Ɛnyɛlɔ k’Ɔlɔlɔ
1 Lam’ele tekɔ lo sɛna lo “tena dia wulu,” sho tshɛ tekɔ l’ohomba w’ekeketshelo. (2 Tim. 3:1) Lam’akandashile la mboka ohomba ɔsɔ lo tena diande, Paulo akadje yimba dia ‘keketshanaka’ l’anango lo tena diahomanawɔ. Nde akâlake dia vɔ ‘ndjela akambo weyawɔ mbishana di’ɛnyɛlɔ di’ɛlɔlɔ.’ (Romo 1:11, 12; 14:19) Weolo ɛsɔ ‘wakakeketsha etema w’ambeki, wâkɔkɔmiya dia vɔ tshikala lo mbetawɔ.’ (Etsha 14:22) Tekɔ l’ohomba efula w’ekeketshelo ka ngasɔ ɛlɔ kɛnɛ.
2 Ɛtɛkɛta aso kokaka mbodia anto akina ndo, naka vɔ mbutama shikaa lo dikambo, kete wayonga oko “elua wa paunyi lu asangu wa fesa.” (Tuk. 25:11) Lo mbishaka kɔmatɛrɛ lo nsanganya, sho ‘keketshanaka.’ (Heb. 10:25) Tayokamba la lolemi laso dimɛna naka tayɔkɔndɔlaka awui weta l’esambishelo, mandolaka akina kana kɛtshanyaka akambo wa lo nyuma. Tɛkɛta ngasɔ ‘ekɔ ɔlɔlɔ dia mbodia, mbisha wanɛ watolonga ɛngɔ kɛmɔtshi dia ɔlɔlɔ awɔ.’—Ef. 4:29.
3 Tɔtɛkɛtɛ Akambo Washa Ɛnyɛlɔ k’Ɔlɔlɔ: Lo Filipi 4:8, Paulo akasha alako w’eshika wɛnya woho wa kamba l’ɔtɛkɛta dimɛna: mbidja yambalo yaso lo kɛnɛ tshɛ kele mɛtɛ ndo kasungana nɛmiyama, kɛnɛ tshɛ kele losembwe, kele pudipudi ndo dimɛna, kɛnɛ tshɛ kele la lokumu l’ɔlɔlɔ, kele ɔlɔlɔ ndo kasungana mandɔma. Sho kokaka ndjashikikɛ ɔnɛ kɛnɛ kataso kekɔ mɛtɛ ndo mbishaka ɛnyɛlɔ k’ɔlɔlɔ naka tɔ ndja oma lo Dui dia Nzambi. (Joa. 17:17) Ndjakimɔ kaso le Nzambi, kɛnɛ kekaso lo nsanganya ya l’etshumanelo, ohetoheto wele laso l’olimu w’esambishelo ndo awui akina wa woho ɔsɔ sunganaka nɛmiyama. Asawo w’endana la adjango ndo l’ɛlɛmbɛ wa lo Dui dia Nzambi ayotokimanyiya mɛtɛ dia sho monga la ‘lomba dia panda.’ (2 Tim. 3:15) Tonge la lowando lo lɔkɛwɔ la pudipudi lele la wanɛ wele l’ɔlɔngɔswamelo wa pudipudi waki Jehowa. Tândole etsha w’ɔlɔlɔ wa mamba w’anangɛso. (Joa. 13:34, 35) L’atei w’akambo wele la lokumu l’ɔlɔlɔ mbatanema ndo waonga anɛ wa pudipudi w’Akristo: mbetawɔ, ɔngɛnɔngɛnɔ, ki ndo ndjakimela, waonga wɛnama le anangɛso. Sawola lo akambo asɔ wasungana la lowando ekɔ ‘dimɛna dia mbodia’ akina.—Romo 15:2.
4 Ekɔ kɔlɔ ntokomɛka tokanyi ta l’andja ɔnɛ nshi tshɛ. Ande ɔlɔ mboka akambo asɔ ɔkɔngɔ dia monganɛ ngandji k’onto l’ɔnango woho wetɔ lee! Totenyi ta wenya tetshaso kamɛ tekɔ ɛngɔ k’oshinga wolo kahombaso nanga efula. Naka sho keketshaka anto nshi tshɛ ndo mbishaka ɛnyɛlɔ k’ɔlɔlɔ, kete mɛtɛ anto akina wayokoka mbuta lo dikambo diaso ɔnɛ: ‘wakakeketsha otema ami.’—1 Kor. 16:18.