Waendelo W’eyoyo W’eshika Oma L’ekimanyielo Ka Wetshelo Wa Djembi
1 Waendelo w’eyoyo wekɔ etenyi kɛmɔtshi k’ohomba ndo k’ɔngɛnɔngɛnɔ k’olimu aso. Lande na kahombaso nyomɛnana esadi l’anto wakɛnya saki? Oma l’ekimanyielo k’olimu wa mbetɛ anto ambeki, lokombo la Jehowa lambeyama ndo lambɔlɛmiama, ndo wanɛ woka Nzambi wɔma wekɔ lo kondja ekimanyielo kele lawɔ ohomba dia mɛna mboka ka lɔsɛnɔ. (2 Kor. 2:17 polo 2 Kor. 3:3) Naka sho shihodia ɔnɛ ekidiamelo ka lokombo la Jehowa ndo nsɛnɔ y’anto yekɔ lo wâle, kete tayosokoyama dia sho ndjalɔngɔsɔlaka dimɛna la ntondo ka sho kalola la tênda anto.
2 Ombetsha w’ɔlɔlɔ kimanyiyaka ombeki dia nde mbika lâdiko di’etshina kambosalemaka edja. Oko atokotshaka ombetsha ewo k’ambeki lushi la lushi, woho akɔ mbahombaso ndjelanya ohomanelo aso wa ntondo l’elembetshiyelo ekina w’endana la sawo diakɔ diamɛ. Dikambo sɔ kimanyiyaka dia nama ɔlɔndji wa kanyi y’onto ndo ndjela woho watandakane yimba yema yema.
3 Naka takatshike biukubuku “Onde na Nzambi Tokaneka Mete Ondo?” ko tamboyoya nto, kete sho mbeyaka mbuta ɔnɛ:
◼ “Osangɔ wa ndjihelo, takasawola lo dikambo dia ‘nshi y’ekomelo’ yatɛkɛta Bible ndo dia kɛnɛ katolembetshiyayɔ. Aha la tamu, wɛ ndjambolaka kɛnɛ katetawoya di’ɔnɛ tekɔ lo nsɛna lo nshi y’ekomelo. (2 Tim. 3:1) Ambeki wa Yeso wakakombolaka kondja okadimwelo lo wombola ɔsɔ. [Tâle Mateu 24:3.] L’okadimwelo ande, Yeso akakɔndɔla akambo wɛnaso l’omamu aso, mbidja ndo lonyangu kâmɛ l’akambo wa ngala wahatasalemaka ndoko lushi.” Toke epole ɔsɛkɛ l’akambo wa djembetelo watanema l’odingɔ 3 la 4, lo lɛkɛ 19. Naka onto akɔ ambɛnya saki, towɛnya akambo akina wa djembetelo yakɔ watanema l’odingɔ 5 polo 8, lo lɛkɛ 20. Towote ɔnɛ tayokalola nto dia ndjokadimola lo wembola wambɔma lo lɛkɛ la ntondo la biukubuku yakɔ.
4 Dia pɛtshahɛtsha saki kele l’onto ka biukubuku “Quel est le but de la vie? Comment le découvrir?,” sho mbeyaka mbuta ɔnɛ:
◼ “Lekɔ la saki ka sho nyomosawola nto lo dikambo di’oweso wa lɔsɛnɔ. Aha la tamu, wɛ mbetawɔka ɔnɛ Nzambi akalange dia tɛna todjashi l’ɔngɛnɔngɛnɔ ndo lo wɔladi la nkɛtɛ, aha l’atei w’efukutanu wɛnaso ɛnɛ. Onde wɛ fɔnyaka dia nde ayokotsha daka diande?” Tôtshike etena akadimole. Tâle Isaya 55:11, ko sho ndjɔkɛtshanya lande lo tokanyi tatanema l’odingɔ 25 polo 27, lo lɛkɛ 30. Towɛnya ɔnɛ wekelo wa Bible mbele yoho yoleki ɔlɔlɔ ya lɔsɛnɔ laso monga l’oyango wa mɛtɛ.
5 Dia pɛtshahɛtsha saki kakoke onto l’ekimanyielo ka biukubuku “Nyudjase pundju l’ongenongeno la kete!” sho kokaka mbɛ̂nyayɔ nto ko mbuta ɔnɛ:
◼ “Takatɛkɛta dikambo di’andja wa dimɛna efula wosangemi lo lohoso la biukubuku nyɛ. Lamboya dia ndjokolembetshiya lande na kele ekɔ ohomba efula dia wanɛ walanga mbidjasɛ lo dihole nɛ ndjâla la mbetawɔ le Yeso Kristo.” Towɛnya sango 41 ko sho mbala Isaya 9:6. Lo sango 62, tâle Joani 3:16 ko sho mbika epole ɔsɛkɛ l’ohomba wa monga l’okitanyiya. Tôlembetshiya ɔnɛ Ɛmɛnyi wa Jehowa kimanyiyaka anto; vɔ mbaetshaka woho wa ndjâla la mbetawɔ lo mbekaka Bible ndo lo ndjatshutshuyaka dia ndjela alako wele lɔkɔ.
6 Tɔsɛdingole diendelo diaso tshɛ di’oyoyo woho wa sho disala dimɛna efula. Toyambole ɔnɛ: Onde laki la dikambo dimɔtshi di’oshika lo yimba dia mbuta? Onde lakakutudi yambalo yande lo Bible? Onde lakaki lâdiko di’etshina kakasalema l’ohomanelo wa ntondo? Onde sawo diami diakasalemi lo woho wa tatɛ mbeka l’onto akɔ Bible? Naka sho kokaka kadimola ɔnɛ elo lo wembola ɛsɔ, kete mɛtɛ tekɔ lo sala la weolo aso tshɛ dia ndjâla embetsha w’ɛlɔlɔ wa Dui dia Nzambi.
[Caption on page 8]
Tosale Onyaso Ɔlɔlɔ Lo Mbesa Saki Tshɛ
1 Lo na atotɔsaka tɛdikɔ dia ntshikɛ ɔtɛkɛtshi aso okanda? Lo dikambo di’ohomba nɛ: saki kande. Lo dikambo diakɔ diamɛ mbakalolaso dia tênda anto. Lam’ɛnaso ɔnɛ onto ekɔ la saki ka losango la Diolelo, kânga saki ka yema tshitshɛ, sho ntshaka tshɛ l’otema ɔtɔi dia mbosalɛ ɔlɔlɔ. Diɔ diakɔ diatotokalolaka nto dia towenda, la mposa ka tolomialomia saki kande ndo ka totatɛ mbeka la nde Bible. Ɔsɔ mbele oyango aso oyadi kânga hatotshike ekanda. Ngande ayotosala na?
2 Naka mbala kêtshi takasawola woho wambokokanɛ ekakatanu wa l’awala ndo takatshike dibuku “Loseno la Pondjo,” kete sho kokaka nyomotatɛ sawo diakɔ lo yoho nyɛ:
◼ “Lam’akamaye mbala kêtshi, takatɛkɛta dikambo dia diwala ndo di’alako w’eshika wa lo Bible wakoka tosha ɔngɛnɔngɛnɔ. Onde wɛ hakanyiya wate: kânga nkumbo y’amɛna efula pomanaka l’ekakatanu mbala mɔtshi? [Tshikɛ onto akɔ dihole akadimole.] Bible mbishaka alako w’amɛna efula wɛnya woho wakokaso kandola ekakatanu wa l’atei a nkumbo. Nyu mbeyaka kimanyiyama efula naka nyu mbeka Bible lo nkumbo.” Tofole dibuku lo lɛkɛ 246 ndo tosha kɔmatɛrɛ lo odingɔ 23. Tâle Joani 17:3, ndo tombole nkumbo kakɔ kana vɔ mbetawɔka sho mbakimanyiya lo ndjêkaka la wɔ Bible lakawɔ.
3 Naka takatɛkɛta dikambo di’ana ndo di’ohomba wa mbasha olakanyelo wa dimɛna, sho kokaka tetemala mbuta ɔnɛ:
◼ “Mbala kêtshi, takate ɔnɛ ana pombaka kondja olakanyelo wa lo nyuma ndo takɛnya woho wakoka ambutshi mbasha olakanyelo akɔ. Efula k’ambutshi wahomana la mi wekɔ la lonyangu, nɛ dia ɛlɔngɔlɔngɔ waya la dionga dia kɔlɔ ɛlɔ kɛnɛ. Ko wɛ akanayɛ lo dikambo dia . . . ? [Shila ɛnyɛlɔ kɛmɔtshi kɛnya lɔsɛndji lele l’ɛlɔngɔlɔngɔ efula wa lo etenyi kanyu ka ngelo ndo tshikɛ onto akɔ dihole akadimole.] Otshike kɛnya alako amɔtshi w’eshika wele lo Bible.” Tofole dibuku Loseno la Pondjo lo lɛkɛ 246, odingɔ 22, tosawole la nde lo etshina ka dikambo kele lɔkɔ ndo tâle Efeso 6:4. Towɛnya ɔnɛ: ana tshɛ mɛtɛ wekɔ l’ohomba w’ohokwelo ndo w’ɛlɔmbwɛlɔ, naka ambutshi mbashatɔ, kete vɔ wayoleka monga l’ɔngɛnɔngɛnɔ ndo la dilɛmiɛlɔ otsha le anto akina. Towɛnya woho wekaso Bible sho l’anaso.
4 Naka takasawola dikambo dia Paradiso ka la nkɛtɛ, kete tolomialomia saki k’onto lo mbotɛ ɔnɛ:
◼ “Takênde esato ɛmɔtshi wa lo dibuku nɛ watɛnya woho wayonga nkɛtɛ lam’ayokikadimola Nzambi paradiso. Koko ɔngɛnɔngɛnɔ aso hawotoyala kokele naka shamɛ ato mbidjasɛ lo paradiso kɛsɔ ko wanɛ walangaso bu. Shi ngasɔ mbakanyiyayɛ? [Tshikɛ onto akɔ dihole akadimole.] Oma lâsɔ, tofole dibuku Loseno la Pondjo lo lɛkɛ 162. Tâle Enyelo 21:3, 4 ndo tôlembetshiya woho wayokoka wanɛ walangaso monga kâmɛ la so nshi tshɛ. Naka onto akɔ nangaka, tâle Joani 5:28, 29 dia mbɛ̂nya ɔnɛ wanɛ wakavu wayolɔ. Towɛnya lohoso la dibuku ndo towote ɔnɛ: “Ɔnɛ ekɔ dikambo dia mɛtɛ mɛtɛ: onto kokaka nsɛna pondjo pondjo la nkɛtɛ kambokadimɔ paradiso!” Toshane la nde randevu dia sho ndjowênda nto ndo ndjowɛnya kɛnɛ katokimanyiya dia sho kanyiya ɔnɛ Paradiso kaya suke.
5 Oyango wa ntondo wa diendelo di’oyoyo ele dia ntsha di’anto wele la saki kondja wahɔ oma lo losango la Diolelo. Ekɔ wolo dia wɛ mɛna anto wele bu l’ohomba wa yangɔ mɔtshi yalomialomia mposa kawɔ k’akambo wa lo nyuma. Tokotole yambalo yande oya lo tokanyi t’eshika tɛnya ohomba w’abuku, ndo towɛnya ohomba wa nde mana Bible fundo. Naka tayotshaka ɔsɔku lo waendelo aso w’eyoyo, kete tayosalɛ anto akina ɔlɔlɔ lo yɛdikɔ yoleki dimɛna yakokaso ntsha.