Toyakiyanya Mɛtɛ Lo Dikambo Dia Saki Tshɛ Kɛnya Onto
1 Kem’edja, olimu wa l’andja w’otondo w’esambishelo ka Diolelo ayoshila; ko l’ɔkɔngɔ wanɛ ‘waheye Nzambi’ wayolanyema. (2 Tes. 1:7-9) Kɛsɔ katshutshuya ekambi wa Jehowa, wanɛ wayakiyanya mɛtɛ dia lɔsɛnɔ l’akina, dia vɔ mbewoya anto efula losango la Diolelo.—Zef. 2:3.
2 Ngɔndɔ tshɛ, tekɔ lo mbetsha miliyɔ ya wenya lo tayangaka wanɛ walanga mboka “nkumu y’ɛlɔlɔ y’ɛngɔ kɛmɔtshi ka dimɛna efula.” (Is. 52:7, NW) Lam’akatawasha losha la ngɔndɔ kɛnɛ, efula wakalongola kɔpi ya Tshoto y’Etangelo la ya Réveillez-vous ! kana biukubuku Kakɔna Katɔlɔmba Nzambi? Tayɛnya ɔnɛ sho ndjakiyanyaka mɛtɛ lo dikambo di’anto asɔ naka sho ndjela saki tshɛ kakawɛnya esadi.—Tuk. 3:27.
3 Tofunde Awui w’Eshika: Tayokamba lotumu l’ɔlɔlɔ naka sho funda awui tshɛ w’eshika wendana la saki kakɛnyisha onto ndo okanda wakatotshike. Awui wele oko lokombo l’adrɛsɛ w’onto, lushi la wonya wakatetshi, okanda wakatotshike ndo kɛnɛ kakatasawudi la nde ayotokimanyiya dia sho tosambisha dimɛna efula lam’ayototshɔ dia towenda nto. Tofunde nto awui amɔtshi wakandalembetɛ lo sawo diaso dia ntondo; awui asɔ ayonga ohomba le so dia sho ndjotetemala la sawo lo diendelo di’oyoyo.
4 Tokalole Esadi dia Tenda Anto: anto angana l’atei a wanɛ wakayatshikɛ ekanda ngɔndɔ ketshi wakayahembe menda nto? Onde mingu efula yambeta yenyu nyatɛnana nto? Naka sho kanyiya mɛtɛ dikambo dia panda ka pondjo k’anto asɔ, kete tayokalola dia towaenda kam’akondjaso diaaso, djekoleko l’ɔkɔngɔ wa nshi mɔtshi, etena keke sawo oyoyo oto lo yimba yawɔ. Lo ndjelaka saki esadi esadi mbokokiso mbekamɛ Satana la ntondo, nde ɔnɛ ‘layoyaka ko ndjonya dui diakonɛma l’etema awɔ.’—Mako 4:15.
5 Ndjalɔngɔsɔla Ekɔ Ohomba Efula: Dia sho sambisha dimɛna efula lo waendelo w’eyoyo, sho pombaka ndjalɔngɔsɔla dimɛna. Totakanyiyisha woho wayototosawola l’onto akɔ la ntondo ka sho ntshɔ. Lɛkɛ la komelo l’Olimu Aso wa Diolelo wa Yitshu 1997 ekɔ l’asawo efula wa mbishana periodikɛ ndo biukubuku Katɔlɔmba wokokiso kamba la wɔ l’ɔngɛnɔngɛnɔ. L’ɔkɔngɔ, tonge ndo la tokanyi tɔmɔtshi lo yimba tayotolanga mbewoya anto lo diendelo di’oyoyo. Okokiso mbuta di’onto tetemala la ndjasha? Woho akɔna wokokiso tatɛ mbeka l’onto Bible?
6 Dia sho tetemala la sawo diaso diakatate dikambo dia kɛnɛ kahombama dia mbɛdia nkɛtɛ ndo kietɛ dihole dia dimɛna efula dia mbidjasɛ, sho kokaka mbuta ɔnɛ:
◼ “Mbala ketshi, sho tshɛ takasuya ɔnɛ, dia nkɛtɛ koma paradiso ka wɔladi, pombaka tɛdikɔ ta wolo mbɔsama. Onde wɛ fɔnyaka dia anto wekɔ l’akoka wahombama dia sala dikambo sɔ? [Tôtshike akadimole.] Enda bonde kele paka Nzambi kekami l’akambo w’anto ko hɛ.” Tadia Osambu 37:38, ko sho ntshɔ la nde lo wekelo 5 wa lo biukubuku Katɔlɔmba ko sho sɔna awui amɔtshi w’oma l’odingɔ 4-5 wɛnya woho wayokotsha Nzambi pɔlɔfɛsi kɛsɔ. Lo kumiya, tɔ̂sɛngɔlɛ dia sho mbeka la nde Bible l’ekimanyielo ka biukubuku yakɔ.
7 Naka lam’akatete mbala ka ntondo takasawola l’onto dia Diolelo ko sho mbôtshikɛ biukubuku “Katɔlɔmba” kete sho kokaka kalola dia towenda ko mbotɛ kânga ɔnɛ:
◼ “Lo sawo diaso dia mbala ketshi, takɛnyi ɔnɛ Diolelo diaki Nzambi ekɔ tshondo ya lowandji mɛtɛ yayolɛ lo nkɛtɛ k’otondo. Bible mɛnyaka ɔnɛ Yeso Kristo mbayonga owandji alɔ. Onde wɛ mbeyaka ɛlɔlɔ wayela lowandji la ngasɔ ndo owandji wa ngasɔ?” Tôtshike akadimole. Tofole biukubuku Katɔlɔmba lo wekelo 6. Towɛnya kɛnɛ kayosalɛ Diolelo diaki Nzambi anto l’ekimanyielo k’awui amɔtshi wɔsɔniso l’odingɔ 6-7 ndo esato wele lo lɛkɛ 13. Tâdia Danyɛlɛ 2:44 ko, naka kokaka, towosha dibuku Ewo ko sho mbɔsɛngɔla dia mbeka la nde Bible.
8 Naka onto lakahomana la so akeyaka ɔnɛ ɛtɛmwɛlɔ wa l’andja ɔnɛ mbele lo kiɔkɔ y’ekakatanu wele l’anto, kete sho kokaka mombola lo diendelo di’oyoyo kânga ɔnɛ:
◼ “Onde wɛ atayambolaka woho wokokiyɛ mbeya ɔtɛmwɛlɔ wetawɔma le Nzambi? [Tôtshike akadimole.] Lo biukubuku nyɛ, Kakɔna Katɔlɔmba Nzambi? tolembetelo tekɔ takimanyiya onto dia nde mbeya ɔtɛmwɛlɔ wa mɛtɛ.” Totshu lo wekelo 13 ko sho sɔtɔla akambo atanu wofundami l’alɛta wa lolasha l’odingɔ 3-7. L’ɔkɔngɔ sho mbeyaka tetemala ɔnkɔnɛ: “Mbeya ɔtɛmwɛlɔ wa mɛtɛ ekɔ ohomba efula, koko sho pombaka mbeya nto ndo kɛnɛ kalɔmba Nzambi ɔm’ɔmɔ a l’atei aso.” Tadia Joani 4:23, 24. Towote dia sho sawola la nde efula lo dikambo diakɔ. Tɔshi wekelo 1 wa lo biukubuku yakɔ ndo towɛ̂nya woho wekaso l’anto Bible.
9 Dia tetemala la sawo lo dikambo di’ɔngɛnɔngɛnɔ wa lo nkumbo, sho kokaka ndjela yoho nyɛ:
◼ “Mbala ka ntondo kakatɛnana, lakakolembetshiya nte sheke y’ɔngɛnɔngɛnɔ wa lo nkumbo ele ndjela alako wa lo Bible, Dui dia Nzambi. Oko le yɛ, onde Bible kokaka kotsha ehomba wa lo nkumbo ya nshi nyɛ, kana tɔ kambeta lowe?” Tôtshike akadimole. Towɛnya dibuku Ewo. Todifole lo tshapita 2 ko sho mbadia awui wakate onto ɔmɔtshi wofundami l’odingɔ 13. Tɔ̂sɛngɔlɛ dia sho mbeka la nde Bible lo nkumbo lo ndjela tokanyi tele l’odingɔ 3.
10 Lo fundaka awui w’eshika, lo ndjalɔngɔsɔlaka lo woho wahombama ndo lo kalolaka esadi dia tenda anto dia fudia saki kawɔ, sho mɛnyaka ngandji kokaso anyaso, ngandji kayowakotola oya lo mboka ka panda.—Mat. 22:39; Ngal. 6:10.