Tokalole A Tenda Anto Wakɛnya Saki

¹ Lam’akatombe dibuku Ewo Katɔla Otsha lo Lɔsɛnɔ la Pondjo, ombahemi a loseke akalembetshiya ɔnɛ “lam’ayowokoma la komelo ka dibuku nɛ, anto w’etema ɛlɔlɔ wayohomba mbeya akambo efula woho wa vɔ mbɔsa yɛdikɔ ya mbɛkama Jehowa ndo batizama.” Dibuku nɛ diakafundama dia ndakanya mɛtɛ esadi esadi. Diɔ mbishaka alako w’eshika wokoki sokoya onto dia nde pama lo nyuma. Diɔ mɛnyaka mɛtɛ lo woho w’ɔlɔlɔ oto, aha la mbetsha wenya lo wetshelo wa kashi. Dia kamba l’ehomɔ kɛsɔ dimɛna efula sho pombaka kalola a tenda wanɛ wakɛnya saki.

² Naka takatɛkɛta l’onto laki komonga la mbetawɔ le Nzambi koko akɛnya yema ya saki, kete sho kokaka tatɛ sawo lo mbifola dibuku l’osato wa lɛkɛ 4 la 5 ko sho mbuta ɔnɛ:

◼ “Lakamaye mbala ketshi, takende kâmɛ osato wa dimɛna ɔnɛ wɛnya woho wele lɔsɛnɔ la dimɛna. Dimbola nɛ tanemaka l’ɛtɛkɛta w’osato: ‘Kakɔna kahombayɛ sala dia monga latɔ na?’ Akanayɛ lo dikambo sɔ? [Tôtshike akadimole.] Bible kɛnɛmɔlaka didjango dimɔtshi di’ohomba. [Tâle Joani 17:⁠3.] Ewo ekɔ ohomba dia sho monga la mbetawɔ le Nzambi. Yoho yoleki ɔlɔlɔ ya mbeka kɛnɛ kahombaso mbeya ele sala wekelo wa Bible wele l’ekongelo kɛmɔtshi.” Tofole dibuku lo tshapita ya ntondo ko sho sɔtɔla tokanyi tɔmɔtshi takeketsha onto tatanema lo odingɔ 1 polo 5. Tôlembetshiya woho wekaso l’anto Bible, ko sho mbolaka dia kalola a ndjotetemala la sawo.

³ Naka tambokalola la saki ka nyomoyosawola lo dikambo dia woho watshika Nzambi kɔlɔ, kete sho kokaka mbuta ɔnɛ:

◼ “Lam’akamete mbala ka komelo, takatɛkɛta dikambo dia [tohole dikambo diakatate]. Dikambo sɔ diakatokomia lo ndjambola bonde ketawɔ Nzambi dia pâ ya nganɛ monga l’andja. Kitshimudi yakɔna yamboyotana? [Totshike ɔtɛkɛtshi akadimole.] Ekɔ ekeketshelo dia mbeya ɔnɛ aha Nzambi mbele l’ɔtɛ w’akambo asɔ wasoya anto.” Tofole dibuku Ewo Katɔla Otsha lo Lɔsɛnɔ la Pondjo lo lɛkɛ 71-72 ko sho kɛtshanya lo tokanyi ta lo Bible tele lo odingɔ 3 polo 5. Tôlake dia kalola a ndjôlembetshiya bonde kakokaso mbetawɔ ɔnɛ kem’edja Nzambi ayonya pâ pondjo.

⁴ Naka onto lotshweso a têmbola ekɔ l’ana ndo ndjashaka l’akambo wa nkumbo, kete sho kokaka mbuta ɔnɛ:

◼ “Dimi fɔnyaka dia oko weyɛ papa (kana mama) ka nkumbo, wɛ kombolaka mbisha anayɛ kɛnɛ koleki ɔlɔlɔ. Lam’ele ekɔ wolo dia mbashimbɛ oma lo kɛnɛ tshɛ kele kɔlɔ, pombaka wɛ mbalakanya woho wa ntokomɛ ekakatanu wa lo lɔsɛnɔ. Ngande wakanayɛ wokokiyɛ tondoya dikambo sɔ? [Tôtshike akadimole.] Ɛngɔ kɛmɔtshi koleki ohomba kakoka ambutshi mbisha anawɔ ele, mbaodia dimɛna.” Tofole dibuku Ewo lo lɛkɛ 145-146 ko sho mbika epole ɔsɛkɛ l’alako w’eshika wa lo Bible; tɔtɛtɛ di’ohomba awɔ ndo ɛlɔlɔ wakondjaso lo mbayela. Tôlake dia kalola a ndjowɛnya woho wa kamba la dibuku diakɔ dia sho monga la lɔsɛnɔ la nkumbo l’ɔngɛnɔngɛnɔ.

⁵ Naka tekɔ lo membola onto lakatasambisha lo tshena pe, kete sho mbeyaka mbuta ɔnɛ:

◼ “Kanyi ya sho tshunda ndo mvɔ komonga lo sangwelo diaki Nzambi. Nde akalange dia sho sɛna pondjo pondjo lo paradiso la nkɛtɛ.” Tôlembetshiya sango dia lo lɛkɛ 188-189. Tâle odingɔ 11 wa lo lɛkɛ 184. Tôkane la nde lushi la ndjowenda mbala kekina.

⁶ Dibuku nɛ diekɔ mɛtɛ ehomɔ kekina kakamba Jehowa latɔ dia ‘kɛndjakɛndja’ olimu w’otshumanyelo wasalema lo nshi y’ekomelo nyɛ. (Is. 60:22) Naka sho kamba ladiɔ dimɛna efula, kete tayosha onto ewo kokoki mbokimanyiya dia nde kondja lɔsɛnɔ la pondjo.