Tɔhɛtshahɛtshake Saki Kakalomialomiama
1 Lam’atatasambisha lo luudu la luudu, yema ya wenya yele laso dia sawola l’onto layasha lo losango kema efula. Tena efula, olimu wa wetshelo mɛtɛ kambemaka lam’asalaso waendelo w’eyoyo ndo lam’alɔmbɔlaso wekelo wa Bible. (Mat. 28:19, 20) Dia sho ndakanya dimɛna efula lo wonya wa diendelo di’oyoyo, sho pombaka mbohɔ kɛnɛ kakatatɛkɛta mbala kakete, ko ndjalɔngɔsɔla woho wa tetemala la sawo.
2 Naka takatɛkɛta dikambo dia osukusuku wa lɔsɛnɔ la nkumbo, kete sho mbeyaka mbɔsa awui wele lo tshapita 29 ya dibuku “Vivre éternellement” ko mbuta ɔnɛ:
◼ “Mbala ka komelo takɛnyi ɔnɛ ekɔ dui dia tshundju ndjela alako wele lo Bible dia ndjâla la lɔsɛnɔ la nkumbo l’ɔngɛnɔngɛnɔ. Oko akanayɛ, ɛngɔ kakɔna kokoki kakatanya nkumbo ɛlɔ kɛnɛ na?” Tshikɛ onto akɔ etena akadimole. Towɛnya odingɔ 27 lo lɛkɛ 247 ko sho mbala Kolosai 3:12-14. Tôlembetshiya awui amɔtshi nto wɛnya ɔnɛ ngandji ka mɛtɛ mɛtɛ kokaka kakatanya nkumbo. Tôlembetshiya ɔnɛ wekelo wa dibuku Vivre éternellement tena la tena mbeyaka mbokimanyiya dia nde kandola ekakatanu ande.
3 Naka, lam’akatete mbala ka ntondo, takasawola dia olanelo w’akambo wa l’andja ɔnɛ, kete sho mbeyaka tetemala la sawo lo mbuta ɔnɛ:
◼ “Dimi mbetawɔka dia wɛ ayosuya ɔnɛ etshikitanelo w’eshika wekɔ ohomba efula naka sho nangaka ndjâla la lɔsɛnɔ lushi lɔmɔtshi lo wɔladi. Bible mɛnyaka ɔnɛ Satana mbele kiɔkɔ ya ntondo y’ekakatanu aso. Anto efula ndjambolaka lande na ketawɔ Nzambi dia dikambo dia ngasɔ mbiviya edja nganɛ. Akanayɛ lo dikambo sɔ na?” Totshike onto akɔ etena akadimole. Tofole dibuku Vivre éternellement lo lɛkɛ 20, odingɔ 14 la 15, ko sho nembetshiya bonde kahatalanyema Satana. L’ɔkɔngɔ ko sho mbala Romo 16:20, wɛnya kɛnɛ kokokiso kongɛ lo nshi yayaye yaya ka suke.
4 Naka takatɛkɛta dikambo di’ɛlɔlɔ wayotokondja la tshina dia lowandji la Diolelo, sho kokaka mbuta lo diendelo di’oyoyo ɔnɛ:
◼ “Diolelo diaki Nzambi diayela ɛlɔlɔ wa mamba lo kɛtɛ ndo le anto. Ɛlɔlɔ ɛsɔ wakɛnyama dimɛna efula l’asango lo dibuku nɛ, lo lɛkɛ 12 la 13. Ɛngɔ kakɔna kakɔngɛnyangɛnya l’osato ɔnɛ na? [Tshikɛ onto akɔ etena akadimole.] Ohokanyiya nganɛ wayonga lɔsɛnɔ l’andja wele oko wɔnɛ!” Tale odingɔ 12. Naka onto akɔ ekɔ lo mɛnya saki, toke dimbola diele lo odingɔ 13 ko sho kɛtshanya di’okadimwelo adiɔ. Towɛnya ɔnɛ tshapita nyɛ tɛkɛtaka akambo akina w’endana l’ɛlɔlɔ wayela Diolelo ndo ɔnɛ sho tayɔngɛnangɛna dia kɛtshanya lande l’akambo akɔ lo diendelo diaso mbala kekina.
5 Kokaka tatɛ mbeka l’onto Bible lam’ataso ɔnɛ:
◼ “Anto efula wakakondja ekadimwelo w’oma lo Bible lo wembola wayambolawɔ l’ekimanyielo ka dibuku nɛ.” Todifole l’ɛtɛ w’awui wofundami, ko sho mumbola onto akɔ ɔnɛ: “Naa dikambo dioleki kɔngɛnyangɛnya?” Totshike onto akɔ etena akadimole, totshu lo tshapita yangɛnyangɛnya onto akɔ ko sho mbala odingɔ wa ntondo. Tôlembetshiya ɔnɛ wembola watanema l’ɛse ka lɛkɛ la dikatshi tondjaka tokanyi t’ehomba tele l’odingɔ l’odingɔ. Towɛnya dikambo sɔ lo kɛtshanya lande l’odingɔ ɔtɔi kana ehende nto, ko l’ɔkɔngɔ sho mbɔsa tɛdikɔ dia nyomoya nto.
6 Lam’ayelaso saki kakɛnyama lo dikambo dia dibuku Vivre éternellement, sho tayɛnyaka ɔnɛ tekɔ la saki ka kotsha olimu aso dimɛna. (2 Tim. 4:5) Sho mbeyaka kimanyiya wanɛ watolonga dia vɔ kondja lɔsɛnɔ la pondjo.—Joa. 17:3.