Ekadimwelo Lo Wembola Anyu

◼ Lam’ele taya la dibuku Ewo Katɔla Otsha lo Lɔsɛnɔ la Pondjo, nshi ngana yahombaso mbeka l’onto Bible la ngelo?

Olimu Aso wa Diolelo wa Lovula 1993 (lo Falase) akate dia paka tetemala mbeka l’oyoyo Bible la ngelo edja ndo abuku ahende wamboshila. Lam’ele taya la dibuku Ewo, ekɔ ɔlɔlɔ tshikitanya woho wa sala, lo ndjela kɛnɛ kata Tshoto y’Etangelo ya Yâta Afusa 1, 1996 lɛkɛ 8.

Dibuku Ewo diakafundama dia kimanyiya wanɛ ‘wakoka kondja lɔsɛnɔ la pondjo’ dia vɔ mbeka kɛnɛ kele la wɔ ohomba dia ndjakimɔ le Jehowa ndo batizama. (Etsha 13:48) Omalɔkɔ, kam’ayoshila okanda ɔsɔ w’oyoyo, honga ohomba mbeka dibuku diahende. Lam’atetawɔ ambeki aso mɛtɛ, sho kokaka tawakeketshaka yema yema dia vɔ fudia ewo kawɔ lo mbɔtɔka lo nsanganya y’Ɛmɛnyi wa Jehowa ndo lo mbalaka Bible l’ekanda ekina w’Akristo.

Ayonga ohomba dia sho manyamanya wembola wele lo lɛkɛ 11 polo 63 la biukubuku Atshina a Wetshelo w’oma lo Bible. Oyadi kânga sho hatohombe menda wembola ɛsɔ kana mbavusola kamɛ l’ombeki aso, ayonga dimɛna sho mbika epole ɔsɛkɛ lo dibuku Ewo l’akambo wayowokimanyiya dia nde mɛnya diewo diande di’atshina wa mɛtɛ yele lo Bible lam’ayɔsɛdingola dikumanyi kâmɛ la nde wembola woho wa nde batizama.

Kema ohomba kotsha awui akina lâdiko a wanɛ wele lo dibuku Ewo lo mbishaka kɔmatɛrɛ kina yele bu lɔkɔ kana tokanyi tokina dia keketsha wetshelo wa lo Bible kana dia manya wetshelo wa kɔlɔ. Kɛsɔ tshɛ ayotalolaka paka wekelo. Ayoleka dimɛna dibuku shila esadi esadi, ondo lo ngɔndɔ oko shamalo. Diɔ diakɔ diahombaso tadieki ntondo ndo dimanyamanya, woho wa diokiya onto atoyi akɔ ahende. Ndo ombeki lawɔ pombaka keketshama dia ndjalɔngɔsɔlaka, lo mbalaka avɛsa woshilami ndo salaka tshɛ dia mpotɔ kɛnɛ kalakanya tshapita la tshapita.

Tshoto y’Etangelo akatɛtɛ dia ekɔ ohomba efula Ɛmɛnyi wa Jehowa mbetsha anto efula Bible dimɛna l’etena ka tshitshɛ. (Enda lo Isaya 60:22.) Naka sho kamba la dibuku Ewo dimɛna, kete tayokimanyiya eyoyo dia vɔ kondja ewo katɔla otsha lo lɔsɛnɔ la pondjo ndo kamba la tɔ.​—⁠Joa. 17:⁠3.