Ekadimwelo Lo Wembola Anyu
◼ Edja kakɔna kahombaso mbeka l’onto lo dibuku Ewo?
Jehowa ekɔ lo tshɔkɔla anto ande ɛlɔ kɛnɛ. Tekɔ lo mɛna dikambo sɔ lam’eta nunu di’anto w’eyoyo lo wedi wa mɛtɛ ɔnɔnyi tshɛ. Lo menda kɛnɛ keta, sho koka mbuta ɔnɛ dibuku Ewo ekɔ ehomɔ ka wolo efula dia ndakanya anto mɛtɛ. Numɛlɔ ka Tshoto y’Etangelo ya Yâta Afusa 1, 1996, akakotola yambalo yaso lo dikambo di’ɔnɛ dibuku sɔ diakafundama dia kimanyiya ombeki wa Bible dia nde pama esadi esadi; ngɔndɔ ngana tsho ayokoka dia nde koma lo batismu.
Diɔ diakɔ diakashikikɛ numɛlɔ kakɔ ka Tshoto y’Etangelo lo lɛkɛ 11 ɔnɛ: “L’ɔkɔngɔ w’onto shidiya la mbeka Bible lo dibuku Ewo, ko nde ambolongola batismu, kema ohomba mbeka la nde dibuku dia hende.”
Ayotosala naka dibuku Ewo diamboshila ko ombeki atayalɔngɔsɔla dia batizama? Olimu Aso wa Diolelo wa Lotena Eduwa 1996, lɛkɛ 6, od. 23, akohola dako diele lo Tshoto y’Etangelo dia aha mbeka dibuku dia hende l’ɔkɔngɔ wa dibuku Ewo. Onde lâsɔ kɛdikɛdi aha sho kimanyiya ombeki nto dia nde pama? Kema. Sho nangaka dia anto monga la ewo k’etshina ka mɛtɛ. Koko, sunganaka dia sho kanyiya ɔnɛ tena efula ombetsha wa manamana koka, lo tshenyi ya wonya tsho, kimanyiya ombeki wele l’otema w’ɔlɔlɔ dia nde pama lo yoho yakoka dia nde mbɔsa yɛdikɔ yasungana dia kambɛ Jehowa. Mbeyaka monga ko, lo ndjela etena kele lawɔ, ambeki amɔtshi mbekaka mbala efula lo lomingu.
Sho pombaka mbeya ɔnɛ ambeki amɔtshi hawohame esadi oko akina. Koko, naka l’ɔkɔngɔ wa wekelo wa dibuku Ewo, wokoki monga otale efula tena dimɔtshi, onto akɔ hɔshi yɛdikɔ ya mbɔtɔ l’etshumanelo, opandjudi akɔ koka mbewoya ekumanyi kɛmɔtshi ka lo kɔmite k’olimu dikambo diakɔ. Naka awui amɔtshi wa lânde wekɔ wahombande kondja ekimanyielo ka lâdiko, kete kokaka mbokimanyiya lo ndjela dako diele lo Tshoto y’Etangelo ya Yâta Afusa 1, 1996, lɛkɛ 10, od. 11-12.
Ombeki wakawakimanyiya dia mbeya mɛtɛ, oyadi kânga lo hiembola, pombaka tshutshuyama, la lowando, dia nde mbɔtɔka lo nsanganya y’Akristo. Dikambo sɔ mbeyaka mbokonya lo nde mɛnya hwe ɔnɛ nde nangaka kambɛ Jehowa. Naka l’ɔkɔngɔ w’ombeki mbeka dibuku Ewo edja efula, nde hɛnya ɔnɛ nde ekɔ lo mbɔsa akambo wa lo nyuma la nɛmɔ, kete ondo ayoleka dimɛna tshika mbeka la nde.