Onde Tekɔ La Wesanu Efula?

¹ Paulo akatolake dia sho ‘mongaka nshi tshɛ la lotumu efula l’olimu wa Nkumadiɔndjɔ.’ (1 Kor. 15:58) Tambokeketshama efula dia shikikɛ ekongelo ka lushi la lushi ka wekelo w’onto ndamɛ, dia sambishaka tena la tena, dia mbɔtɔka la kɔlamelo lo nsanganya ndo dia kotsha ɛkɛndɛ wakawatosha l’etshumanelo l’ohetoheto. Aha la mbohɛ ekimanyielo kahombaso mbisha wanɛ wele l’ohomba atɔ. La ekongelo ka ngasɔ, tena dimɔtshi sho kokaka nɛmba ko mbuta ɔnɛ etena kambokoka ka nyanga woho wa minya ekolo.

² Lo akambo amɔtshi, tshika ntumu mɔtshi kana ndjikitshakitsha koka monga dui dia tshundju ndo diasungana. Anto amɔtshi fɔnyaka ɔnɛ vɔ pombaka sala kɛnɛ tshɛ kawalɔmbawɔ. Naka sho pomba wɛdimo (équilibre) lo dikambo sɔ kete diɔ mbeyaka monga kiɔkɔ ya nkɛlɛ la okiyanu wakoka ndjotokonya lo wâle.

³ Tônge la Wɛdimo: Ndjela dako dia Paulo lo ‘mbɛdikola akambo woleki ohomba,’ ɔsɔ kele sapi ka wɛdimo. (Fil. 1:10) Kɛdikɛdi toyasha tshɛ l’akambo woleki ohomba mɛtɛ, ko l’ɔkɔngɔ, lo ndjela etena kambototshikalɛ ndo akambo watombi, ndjenda akambo wele bu ohomba efula. Ɛkɛndɛ aso wa lo nkumbo wekɔ mɛtɛ l’atei w’akambo asɔ woleki ohomba. Sho pombaka nto kotsha ɛkɛndɛ ɛmɔtshi wa l’emunyi. Koko Yeso akatolakanya ɔnɛ akambo wetshaso la ntondo pombaka mbɔtɔnɛ la didjango nɛ: nyanga ntondo Diolelo. Sho pombaka tokosala ntondo kɛnɛ kahombama dia kotsha ɛkɛndɛ wakatosha Jehowa.​—⁠Mat. 5:3; 6:⁠33.

⁴ Lam’ayotonga la kanyi shɔ l’ɔtɛ, tayodja yimba dia minya wesanu ɛmɔtshi lo ekongelo kaso, kambolola tɔ, l’elimu aso shamɛ, la tɔkɛnyɔ ndo lokema l’ɛkɛndɛ. Etena kasalaso ekongelo kaso ka lo lomingu, toyaombe wonya wahombama wa sala wekelo w’onto ndamɛ ko shidiya, sambisha lo woho wakoka, ntshɔ lo nsanganya ndo sala kɛnɛ tshɛ k’endana la ɔtɛmwɛlɔ aso. Wonya watshikala mbeyaka mbeta l’elimu ekina, naka vɔ kimanyiyaka dia sho kotsha oyango aso wa ntondo mbuta ate sɛna oko Okristo wemadi lo wɛdimo wakanyiya ntondo dikambo dia Diolelo.

⁵ Koko, sho mbeyaka mɛna ɔkɛndɛ aso paka wotsho oto. L’etena kɛsɔ, sho pombaka kadimola lo lêta la Yeso lɔnɛ: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya.” (Mat. 11:28) Tende nto le Jehowa, “latutembelaka wetshu asu [nshi tshɛ, NW]” ndo atoshaka ɔnɛ lambɔkɔmɔ wolo. Nde hetawɔ onto ɔlɔlɔ sutshasutshama pondjo, mbalakande (Esam. 55:22; 68:19; Is. 40:29) Sho kokaka ndjashikikɛ ɔnɛ alɔmbɛlɔ aso wayokɛma, lo tosha akoka wa tetemala la sɛna lɔsɛnɔ la Teokrasi l’ɔngɛnɔngɛnɔ.

⁶ Naka ekɔ mɛtɛ dia oweso wa wahɔ w’amɛna wa Diolelo mbatatayange, kete sho kokaka ngɛnangɛna, nɛ dia sho mbeyaka shate lotumu lakambaso kema anyanya lo kɛnɛ k’endana la Nkumadiɔndjɔ.​—⁠1 Kor. 15:⁠58.