Asawo Wa Lo Lɔngɛnyi Wakoka Munanda Otema
1 Sawo kokaka nembetshiyama oko “woshanelo wa tokanyi.” Sawola asawo wa lo lɔngɛnyi lo dui dimɔtshi diangɛnyangɛnya onto kokaka kotola yambalo yande ndo tokimanyiya dia sho munanda otema ande la losango la Diolelo. Tambɛna dia ekɔ dimɛna efula tatɛ sawola l’anto sawo dia lo lɔngɛnyi ndo diahonyi kanyiya etale oleki tatɛ la dako.
2 Woho wa Tatɛ Sawo dia lo Lɔngɛnyi: Monga l’akoka wa sawola l’onto hate ɔnɛ mbosha lokema la tokanyi la avɛsa wawâmbia. Dikambo sɔ mɛnyaka lo tshena pe ɔnɛ sawola. Oko ɛnyɛlɔ, asawo wasawolaso l’osukanyi aso wa lo kartiye bu wolo ndo honyi kanyiya etale. Lo dihole dia kanyiya la ntondo etelo kayotota, sho kadimolaka mbala kakɔ ɔtɔi lo tokanyi tashande. Naka sho mbidja yimba mɛtɛ lo kɛnɛ katande, kete ondo nde ayolanga nyomosawola asawo wa ngasɔ. Ngasɔ mbahombaso sala lam’asambishaso.
3 Asawo wele oko odiakanelo, ekakatanu w’ɛlɔngɔlɔngɔ, awui wa lo ngelo, akambo wa l’andja kana tena sunganaka sawola lo lɔngɛnyi. Akambo w’endana la lɔsɛnɔ l’anto la lushi la lushi wekɔ amɛna efula dia kotola yambalo yawɔ. Etena kayotatetemalaka sawo, sho kokaka taditɔlaka yema yema otsha lo losango la Diolelo.
4 Sawola akambo wahonyi kanyiya etale hate ɔnɛ bu ohomba ndjalɔngɔsɔla. Ekɔ ohomba. Koko, kema ohomba sala ekongelo kɛmɔtshi ka kawotake kana kimɛ dako dimɔtshi l’ɔtɛ, tatokoyoka wolo tshikitanya sawo ndo mbuta kɛnɛ kasungana. (Enda lo 1 Koreto 9:20-23.) Yoho yoleki ɔlɔlɔ ya ndjalɔngɔsɔla ele sɔna dikambo ɔtɔi kana ahende w’oma lo Bible, la kanyi ya asawo tshimbaka l’akambo akɔ. Nyomenda awui wele lo dibuku Comment raisonner ayotokimanyiya efula.
5 Waonga Wele Ohomba lo Sawo dia lo Lɔngɛnyi: Lam’asawolaso l’onto, sho pombaka mangasana ndo mbuta mɛtɛ. Ɔmɔnɔmɔnɔ ndo elongi k’ɔngɛnɔngɛnɔ ayotokimanyiya dia sho monga la waonga asɔ. Tekɔ lo mɛmba losango loleki ɔlɔlɔ l’andja w’otondo; ndoko ema koleki kotola yambalo y’anto w’etema ɛlɔlɔ oko lɔ. Naka vɔ mboka ɔnɛ yambalo yadjaso le wɔ ndjâka oma lo saki ka mɛtɛ ka mbaewoya lokumu l’ɔlɔlɔ, kete ondo vɔ wayotshutshuyama dia nonga.—2 Kor. 2:17.
6 Sawo pombaka monga etena k’ɔlɔ efula. Omalɔkɔ, tônge la ngandji ndo la kiɔmi lam’asambishaso losango la Diolelo. (Ngal. 5:22; Kol. 4:6) Tosale tshɛ dia ɔtɛkɛtshi aso tshikala la lokanyi l’ɔlɔlɔ. Lo woho ɔsɔ, oyadi kânga hatonandi otema ande mbala ka ntondo, ondo onto ɔsɔ ayoyetawɔ esadi mbala kekina lam’ayondoyosawola l’Ɔmɛnyi ɔmɔtshi.
7 Aha l’ɔnɛ sho manyamanyaka dako dimɔtshi dia wolo efula mbayotɔtɔ l’asawo wa lo lɔngɛnyi. Ekɔ paka dia kotola yambalo y’onto lam’ataso dikambo dimɔtshi diawenda. Naka sho ndjalɔngɔsɔla, kete tayokoka tatɛ asawo wa lo lɔngɛnyi l’anto tshɛ. Tosale tshɛ dia munanda etema w’anto wahomana la so lo mbaewoyaka lokumu loleki ɔlɔlɔ: ɛtshɔkɔ wa Diolelo waha l’ekomelo.—2 Pet. 3:13.