Ekadimwelo Lo Wembola Anyu

◼ Lande na ahombaso kimɔ alapɔlɔ w’olimu esadi oseka ngɔndɔ tshɛ na?

Sho tshɛ ngɛnangɛnaka lam’okaso etombelo w’ɛlɔlɔ w’oma lo esambishelo ka losango la Diolelo. (Enda lo Tukedi 25:25.) Etsha 2:41 kɔndɔlaka ɔnɛ lushi la Pɛntɛkɔsta, l’ɔkɔngɔ wa dako dia mamba diakasha Petero, “[apami, NW] uku nunu satu wakasanganyema kame la wo.” Yema l’ɔkɔngɔ, lofulo lɔsɔ lakadɛ “uku nunu tanu.” (Etsha 4:⁠4) Ande ɔlɔ wakoke Akristo wa l’eleko ka ntondo lam’akawoke dikambo sɔ le! Ɛlɔ kɛnɛ, sho mbokaka woho akɔ wamɛ lam’alongolaso alapɔlɔ w’ɛlɔlɔ. Sho mbokaka ɔlɔ wa mamba lam’okaso etombelo w’ɛlɔlɔ wakondja anangɛso wa l’andja w’otondo l’olimu w’esambishelo ka lokumu l’ɔlɔlɔ.

Pombaka wenya efula ndo mbidja weolo dia mbɛdika alapɔlɔ wa ngasɔ, diɔ diakɔ diele ekimanyielo k’ompandjudi tshɛ wa Diolelo kekɔ ohomba. Onde sho mbeyaka dia ekɔ ohomba efula kimɔ alapɔlɔ esadi oseka ngɔndɔ tshɛ?

Ohamelo watewoyawɔ lɔkɔ toshaka ɔngɛnɔngɛnɔ. Ndo nto, alapɔlɔ kimanyiyaka la Société dia mbeya woho watahame olimu l’andja. Tɛdikɔ pombaka mbɔsama lo dikambo dia tenyi dia nkɛtɛ diele l’ohomba w’ekimanyielo, dia sɔna ekanda wa tondja ndo mbeya lofulo la mbâtondja. Lo etshumanelo tshɛ, dikumanyi sɔtɔlaka alapɔlɔ w’olimu dia shikikɛ l’akambo akɔna wahombatɔ nyomodja wolo. Alapɔlɔ w’ɛlɔlɔ tokeketshaka ndo tshutshuyaka onto l’onto l’atei aso dia nde sɛdingola olimu ande dia mbeya lɛnɛ okokinde pama.

Opandjudi tshɛ pombaka mbeya ɔkɛndɛ ande hita wa kimɔka alapɔlɔ ande w’olimu esadi oseka ngɔndɔ tshɛ. Anɔmbɔdi wa wekelo wa dibuku wekɔ la diaaso di’ɔlɔlɔ dia mbohola apandjudi ɔkɛndɛ ɔsɔ, nɛ dia vɔ ndjatshutshuyaka nto dia kimanyiya onto l’onto la l’atei a wanɛ wele l’ekakatanu dia sambisha ngɔndɔ tshɛ, tena la tena. Vɔ kokaka mbohola anto lo wekelo wa dibuku wa lo komelo ka ngɔndɔ, kana l’etena kekina kasungana. Naka heyama kimɔ alapɔlɔ w’olimu lo Mbalasa ka Diolelo, kete ɔnɔmbɔdi wa wekelo wa dibuku kokaka mbâkɔngɔla ndo mbidja yimba dia vɔ koma le sekeletɛlɛ la wonya dia nde mbâdja lo alapɔlɔ wa ngɔndɔ la ngɔndɔ w’etshumanelo watomɛwɔ la Société.

Woho walɛnyaso wonya lo kɛnɛ kendana l’okimwelo w’alapɔlɔ w’olimu aso la kɔlamelo esadi kitshakitshaka olimu wa wanɛ wele l’ɔkɛndɛ w’ɔlɔlɔ aso wa lo nyuma.