Tokambe Olimu Wahakambemaki Nto Pondjo
1 Jehowa akakotsha dombwelo diande le atunyi ande lo deko diotshikitanyi dia l’Ɔkɔndɔ w’anto. Koko, oma lo kɛtshi kande, nde akalɔngɔsɔlɛ anto w’etema ɔlɔlɔ yoho mɔtshi ya vɔ panda. (Osam. 103:13) Dionga diawɔ mbakashikikɛka kɛnɛ kakakoke mbâkomɛ.
2 Ɛnyɛlɔ, la ntondo ka mvula k’elola, l’ɔnɔnyi 2370 ntondo ka tena diaso nɛ, Nɔa aki “osambisha w’akambo wa losembwe.” Wanɛ wakɔnyɔla ɔhɛmwɛlɔ wa Nzambi wakavu. (2 Pet. 2:5, NW; Heb. 11:7) La ntondo k’elanyelo ka Jerusalɛma, l’ɔnɔnyi 70 lo tena diaso nɛ, Yeso akɛnya hwe kɛnɛ kakahombe onto sala dia nde panda l’elanyelo kakahombe salema l’osomba. Wanɛ tshɛ wakatone dui diande di’ɔhɛmwɛlɔ wakɛnyi diɛdimi awɔ. (Luka 21:20-24) Ɛhɛmwɛlɔ ndo dombwelo dia ngasɔ diaki Nzambi diakasalema mbala efula l’Ɔkɔndɔ w’anto.
3 Olimu w’Ɔhɛmwɛlɔ lo Nshi Yaso Nyɛ: Aya edja, Jehowa akate ate nkɛlɛ kande kayotshulwɛ dikongɛ dia nshi nyɛ dia kɔlɔ ndo ɔnɛ akanga a ndjakitshakitsha ato mbayoshimbamela. (Zef. 2:2, 3; 3:8) Etena kambotshikala dia mbewoya dui sɔ di’ɔhɛmwɛlɔ kekɔ lo teete esadi esadi! ‘Fɔnu ka woke’ kaya suke, ndo otshumanyelo w’akanga w’okitshakitsha wekɔ lo salema. Mɛtɛ, ‘Dikambɔ diambɛla kasakasa, dia muna.’ Omalɔkɔ, ndoko olimu okina wele ohomba ndo wahomba salema esadi esadi oko wɔnɛ.—Mat. 24:14, 21, 22; Joa. 4:35.
4 Ɛlɔ kɛnɛ, sho pombaka mbewoya anyaso mbeka ka dui sɔ di’ɔhɛmwɛlɔ, ‘oyadi vɔ nonga kana hawolongi.’ Ɔsɔ ekɔ ɔkɛndɛ wakatosha Jehowa wahatahombe tona. (Ezek. 2:4, 5; 3:17, 18) Lo ndjasha tshɛ l’olimu ɔsɔ, sho mɛnyaka l’eshikikelo tshɛ ngandji kaso k’omaka tshina di’otema kokaso Jehowa l’eshikikelo tshɛ, woho wayashaso l’otema ɔtɔi le onyaso ndo mbetawɔ kaso ka nge le Oshimbedi aso, Yeso Kristo.
5 Etena ka Kamba Tɔ Kɛnɛ: Lo nshi y’edjedja, l’ɔkɔngɔ wa dombwelo diaki Jehowa salema, akambo wa kɔlɔ wakatombaka nto, nɛ dia Satana l’ɛdiɛngɛ ande wakatetemalaka kamba olimu awɔ. Koko, mbala kɛnɛ, hatonga ɔsɔku. Shɛngiya yele la Satana yayoshila. Hatonga nto ohomba wa mbewola anto l’andja w’otondo ɔnɛ ‘fɔnu ka woke’ kaya suke. (Eny. 7:14; Romo 16:20) Tekɔ la diɛsɛ dia lânde dia kamba olimu wahakambemaki nto pondjo. Etena ka sho kamba olimu ɔsɔ efula tɔ kɛnɛ.
6 L’eshikikelo tshɛ, ɔpɔstɔlɔ Paulo akate ɔnkɔnɛ lo dikambo di’olimu ande w’esambishelo: “Dimi laha la unungu wa dikila [di’anto tshɛ].” (Etsha 20:26) Nɛ dia nde kotshika mbewola anto, nde kondjaokaka l’onongo wa dikila. Lande na? Nɛ dia nde akakoke mbuta di’olimu ande ate: “Eelo, dia dikambo diakɔ mbatumokambaka olimu wolo, lalɔ ta dia ta.” (Kɔl. 1:29, NW ) Nyɛsɔ tokambe olimu ɔsɔ wahakambemaki nto pondjo la wolo aso tshɛ, ko tayonga l’ɔngɛnɔngɛnɔ oko akonge Paulo!—2 Tim. 2:15.