Tokimanyiya Anto Wahatahokɔ Akambo Dia Vɔ Mbashihodia
1 Oma l’olimu wa mbetɛ anto ambeki mbetshaso anto akina kɛnɛ kawalɔmba Nzambi. (Mat. 28:19, 20) Lo dikambo sɔ, Ɛmɛnyi ndekana miliyɔ tshanu wadjakɔ weolo wa mamba l’andja w’otondo. Aha lofulo la wenya, l’ekanda washaso anto kana lofulo l’anto wetshaso Bible mbɛnya ɔnɛ tambodja olimu akɔ. Sho kotshaka oyango aso lam’ashihodia anto ndo akitanyiyawɔ kɛnɛ kekiwɔ.
2 Dia mbâkimanyiya lo nyuma, pombaka ‘mbokiya anto wahatahokɔ akambo.’ (Osam. 119:130) Etema awɔ munandemaka ndo vɔ ndjotshutshuyamaka dia sala dikambo diakɔ paka naka ‘wambodimana fundo.’ (Mat. 15:10) Lo yɛdikɔ yatahame olimu aso ndo yatawafule mbatataleke mɛna ohomba wa tɛkɛta ndo mbetsha anto lo yoho ya vɔ mboka esadi. Diɔ diakɔ diakatondja la Société biukubuku Kakɔna Katɔlɔmba Nzambi? Wekelo w’otondo wendana l’atshina a wetshelo wa lo Bible wekɔ lɔkɔ. Wekelo wa lɔkɔ wekɔ tomondo, ɔtɛkɛta wa wɔdu, ndo wetshelo wa wɔdu shihodia, diɔ diakɔ diakoka anto efula mbadia biukubuku yakɔ.
3 Lo Yitshu la lo Mam’ɛkɔngɔ la Tange, tayoyisha anto kâmɛ la periodikɛ. Lam’ayotosala ekongelo dia lomingu laso l’esambishelo, wambotɔlɔmba dia sho ndjalɔngɔsɔla dia mbisha anto periodikɛ Lushi la Samalo ko kamba la biukubuku nshi kina ya lo lomingu. Toyisha anto wakalongola ekanda aso lo nshi yakete. Tatohɛke dia yɔ kokaka monga ohomba efula dia mbetsha ana, anto watɛkɛta ɔtɛkɛta wa lo wodja okina ndo wanɛ wele l’ekakatanu lo mbadia.
4 Tɔtɛkɛtsha Anto lo Yoho ya Vɔ Mboka Esadi: Lam’ɛnyaso onto biukubuku Katɔlɔmba, totshu la nde lo lɛkɛ 2 lɛnɛ olembetshiyishawɔ ɔnɛ yɔ “yakalɔngɔswama dia mbekaka Bible.” Tokotole yambalo yande l’odingɔ 3, lɛkɛ 3, dia mbɛ̂nya bonde kahombande mbeka Bible. Temule saki kande l’ekimanyielo k’ɔtɛ a dui wa wekelo ɛmɔtshi wakɛnɛmɔla akambo wa mɛtɛ wa wɔdu shihodia wa lo Bible. Towɛnya ɔnɛ biukubuku nyɛ mbetɛka wekelo ɔlɔ efula ndo towote dia sho nangaka mbokimanyiya.
5 Têtsha Onto Bible lo Yoho ya Nde Pama: Oyango aso kema wa mbeka l’anto Bible oto ko pe, sho nangaka ndo mbaetɛ ambeki wayoyonga amamedi w’ohetoheto w’ɔtɛmwɛlɔ wa mɛtɛ. Biukubuku yakɔ mbeyaka shila lo mingu ngana tsho, ndo ɔsɛdingwelo ɔsɔ pombaka ndjokitɛ lo dibuku Ewo. (Enda nɔtɛ kele l’ɛsɛ ka lɛkɛ 31.) Oma ko etatelo, tokimanyiya ombeki dia nde mbeya ele ɔlɔngɔswamelo waki Jehowa. (Enda lo Comment raisonner lɛkɛ 273-4.) Tɔtɛtɛ lo dikambo di’ohomba wa nsanganya ya l’etshumanelo ndo tôlembetshiya ɔnɛ tshelo ya mbɔtɔka lɔkɔ kimanyiyaka onto dia nde ndjashihodiaka yema yema woho wa nde tɛmɔla ɔtɛmwɛlɔ wa pudipudi.—Heb. 10:24, 25.
6 Ekɔ mɛtɛ dia naka sho kamba olimu ɔnɛ wa lânde efula lo Yitshu la lo Mam’ɛkɔngɔ la Tange, kete tayoka ɔlɔ waya oma lo kimanyiya anto w’etema ɛlɔlɔ dia vɔ ‘monga la yimba’ yatɔla otsha lo lɔsɛnɔ.—Tuk. 4:5.