Tetsha Akina Kɛnɛ Katɔlɔmba Nzambi
1 Tâkakoke tana anto efula waki ‘komboka awui wa Jehowa.’ (Am. 8:11) Amɔtshi mbetawɔka ɔnɛ Nzambi ekɔ, koko haweye oyadi asangwelo ande kana adjango ande. Omalɔkɔ, sho pombaka mbaetsha akambo wa mɛtɛ wa Diolelo washa lɔsɛnɔ. Naka tekɔ la dihomɔ ndo tekɔ suke dia sambisha lo diaaso tshɛ, kete tayotana anto walanga mbeka kɛnɛ katɔlɔmba Nzambi.
2 Lo Yitshu la lo Mam’ɛkɔngɔ la Tange, tayodianganya Tshoto y’Etangelo la Réveillez-vous ! wayonga l’asawo mɛtɛ wasungana. Ndo nto, ayonga mbala ka ntondo kayotosha anto biukubuku Kakɔna Katɔlɔmba Nzambi? Asango w’amɛna wele lɔkɔ ndo wembola wasokoya onto lo kana yimba kotolaka anto efula dia vɔ ndjiɔsa. Wambotosha alako wayela anɛ dia tokimanyiya dia sho mbeya kamba l’ekanda ɛsɔ w’amɛna efula.
3 Toyangeyange Anto: Lo tenyi dia ngelo diahatanema anto lawakawɔ lam’atshɔso lo luudu la luudu, tongaka ohomba dia sho mbâyangayanga ndo tɛkɛta la wɔ oyadi lo dihole diakɔna tshɛ diewɔ. Dikatshi di’okotsha di’Olimu Aso wa Diolelo wa Kɔlɛkɔlɛ 1996 diakatokeketsha dia sho sambisha lokumu l’ɔlɔlɔ l’ahole tshɛ: l’ɔsɛsɛ, lo mituka wɛmba anto tshɛ, lo wa parkɛ, lo wa parkingɛ ndo lo tenyi dia ngelo diasalawɔ ekanda. Diɔ diakatosalanganya nto dia ekɔ ohomba sho nyanga waaso wa sambisha lo tshakitudi. Oko ɛnyɛlɔ, ombatshi mboka ɔmɔtshi wa omoto akatshu lo zoo la kanda ya Réveillez-vous ! wa Loseketanya 8, 1996 wele l’ɔtɛ a dui w’ɔnɛ “ Espèces menacées: pourquoi s’en soucier ? “ L’ɔkɔngɔ w’oshidi a tango ɔtɔi, nde akayikahanya 40 le anto walanga wa nyama efula! Onde tambokondjaka etombelo w’ɛlɔlɔ lam’akatasambisha lokumu l’ɔlɔlɔ l’ahole tshɛ? Tshoto y’Etangelo, Réveillez-vous ! la biukubuku Katɔlɔmba sunganaka mɛtɛ lo weho tshɛ w’esambishelo, nɛ dia kɛnɛ kele lɔkɔ mendanaka la lɔsɛnɔ l’anto ndo sokoyaka onto dia nde kana yimba.
4 Totate Asawo: Lɛkɛ la komelo l’Olimu Aso wa Diolelo wa Tshaka Fudu 1996 mɛnyaka dimɛna woho wa nɔngɔsɔla sawo diaso shamɛ dia mɛnyanya Tshoto y’Etangelo la Réveillez-vous ! Alako akɔ wekɔ nto ohomba lo kɛnɛ kendana la nɔngɔsɔla sawo diaso dia mɛnyanya biukubuku Katɔlɔmba. Sho kokaka tɛkɛta lo tshena pe, wetelo engana eto, kana tɛkɛta kambe woho wa mbuta kanyi mɔtshi ya lo divɛsa dia Bible. Ekɔ ohomba efula sɔna ɛtɛkɛta wa mbɔtwɛlɔ, nɛ dia vɔ mbeyaka tshutshuya onto lasawola la so dia nde tetemala la tohokamɛ kana kema. Amɔtshi kondjaka etombelo w’ɔlɔlɔ lo tatɛ nganɛ: “Lakadia sawo dimɔtshi diakakeketsha ndo dimi nangaka kotɛdiɔ.” Sho kokaka mumbola nto dimbola dimɔtshi di’ohomba efula dia tshutshuya ɔtɛkɛtshi aso lo nde tɛkɛta.
5 Naka sunganaka l’etenyi kaso ka ngelo, kete sho kokaka pemba mumbola wembola wa nganɛ l’asawo aso ngɔndɔ kɛnɛ:
◼ “Ɛlɔ kɛnɛ, nkombo y’ofundafunda lo pele, diangɔ dia nyɛtɛtɛ ndo olanyelo wa hiɛlɛlɛ hashile. Ahombama dia mbɛdia nkɛtɛ ndo kietɛ dihole dia dimɛna efula dia mbidjasɛ na?” Tôtshike akadimule ko ndjôlembetshiya ɔnɛ sho mbeyaka l’eshikikelo tshɛ woho ndo etena kayonga nkɛtɛ k’otondo ekambɔ ka woke. Towɛnya lo periodikɛ kɛmɔtshi keke katomba kɔmatɛrɛ kɛmɔtshi k’oshika, divɛsa dia tshena pe ndo sango dia dimɛna ko sho mboshatɔ dia nde kiadia. La ntondo ka komiya sawo, tohembe mbokana l’ɔtɛkɛtshi aso dia sho ndjowenda nto.
◼ “Onde wɛ fɔnyaka dia Nzambi akalange ɔnɛ tɛnake pâ l’ekakatanu oko wɛnɛ wele laso nshi nyɛ?” L’ɔkɔngɔ wa nde kadimula, sho kokaka mbuta shate: “Ondo wɛ mbeyaka dɔmbɛlɔ diakalakanya Yeso ambeki ande, dialɔmbande dia Diolelo diaki Nzambi ndja. Onde wɛ ambokanyiyaka dia mbeya ele mɛtɛ Diolelo diaki Nzambi?” Tofole biukubuku Katɔlɔmba lo wekelo 6 ko sho mbadia wembola wele l’etatelo ka wekelo. Ko sho ndjokotola yambalo yande l’okadimwelo wa dimbola dia ntondo lam’alaso odingɔ 1. Towote ɔnɛ okadimwelo wa wembola ekina ɛnɛ wekɔ nto tomondo nganɛ. Towosha biukubuku ndo tôlake dia ndjɛnana la nde nto dia ndjosawola efula lo dikambo dia Diolelo.
◼ “Anto efula wakana yimba mbeyaka ɔnɛ ɛtɛmwɛlɔ wa l’andja ɔnɛ hawoshidiya ekakatanu wahomana l’anto, ndo vamɛ mbele lo kiɔkɔ y’ekakatanu akɔ. Ko wɛ wɛmɛ akanayɛ lo dikambo sɔ?” L’ɔkɔngɔ wa sho nonga kanyi y’ɔtɛkɛtshi aso, towɛnya kanyi mɔtshi ya lo periodikɛ keke ka tomba yokoki memula saki kande lo woho wambokita ɛtɛmwɛlɔ tatala kana lo woho wayowolanyema lo nshi yayaye. Towombole kana nde nangaka mbadia periodikɛ kakɔ. Towote lokombo lakiso ndo towombole lakinde, tôlake dia ndjowenda nto dia ndjôlembetshiya ɔnɛ ɔtɛmwɛlɔ wa mɛtɛ hɛnya anto pâ.
◼ “Lo menda lokema l’ekakatanu lɛnya nkumbo pâ nshi nyɛ, onde wɛ atayambolaka wate, naa sheke y’ɔngɛnɔngɛnɔ wa lo nkumbo?” Tôtshike akadimule ko sho mbɛ̂nya ɔnɛ Nzambi ekɔ lo mɛnya sheke y’oshika y’ɔngɛnɔngɛnɔ wa lo nkumbo lo Bible. Ondo tayokoka mbadia Isaya 48:17. L’ɔkɔngɔ ko sho mbifola biukubuku Katɔlɔmba lo wekelo 8 ko sho mbika epole ɔsɛkɛ l’avɛsa amɔtshi woshawɔ lɔkɔ washa alako wasungana ose nkumbo tshɛ ndjela. Tadia ɔnɔngɔ wa wembola wele l’etatelo ka wekelo. Towombole kana nde nangaka mbadia ekadimwelo wa wembola akɔ. Naka nde ate eelo, towosha biukubuku yakɔ ko sho mbotɛ oshinga wa nshi nyɛ. Towolake dia mɛnana la nde nto dia ndjosawola efula di’alako w’eshika washa Bible lo dikambo dia lɔsɛnɔ la nkumbo l’ɔngɛnɔngɛnɔ.
6 Dikatshi di’okotsha di’Olimu Aso wa Diolelo wa Mɔmbi 1997 akatokeketsha dia sho monga l’etete lo sala waendelo w’eyoyo. Wakatolake lɔkɔ dia sho kambaka la biukubuku Katɔlɔmba dia tatɛ mbeka l’anto Bible naka kokaka ko mbala ka ntondo ka pomana l’onto, naka hakoke ko ndjomɛ lo diendelo di’oyoyo. Ohomba woleki woke le anto ele mbeka kɛnɛ katɔlɔmba Nzambi ko mal’asɔ kikitanyiya. (Kol. 1:9, 10) Tayewoya anyaso akambo efula lo ngɔndɔ ka Yitshu la ka Mam’ɛkɔngɔ la Tange naka sho tatɛ mbaetsha kɛnɛ keyaso lo dikambo dia kɛnɛ kalɔmba Jehowa di’onto kondja lɔsɛnɔ.—1 Kor. 9:23.