Naa Ohomba Wa Tetemala?
1 Ondo wɛ amboyambolaka dimbola sɔ, lam’akayalɔngɔsɔlaka lushi lɔmɔtshi dia ntshɔ atosambisha. Lo tenyi dimɔtshi dia nkɛtɛ, mbilo kaso ambokindjakindjama efula, ndo anto kokaka teya ko totshanya esadi eto. Anto amɔtshi ato mbatetawɔka losango laso dimɛna. Koko tekɔ l’ɛkɔkɔ efula wahombaso tetemala.
2 Ntondotondo, sho pombaka tetemala la sambisha losango la Diolelo edja ndo lam’ayoya ekomelo. (Mat. 24:14; 28:19, 20) Omvutshi Isaya akambola Nzambi edja ndo kaande akandahombe tetemala l’olimu w’esambishelo. Okadimwelo wele lo Isaya 6:11, mbokɛmaka hwe. Jehowa akawotɛ dia nde tetemala la mbewoya anto losango l’oma le Nzambi. Ngasɔ mbele ndo ɛlɔ kɛnɛ. Jehowa tɔlɔmbaka dia sho tetemala la menda anto wele lo mbilo kaso, oyadi kânga vɔ kototshanyaka. (Ezek. 3:10, 11) Ɔsɔ mbele ɔkɛndɛ w’ekila wakatalongola.—1 Kor. 9:17.
3 Kahende, lo tetemala la sambisha mbayotɛnya omamemelo aso le Jehowa. (1 Joa. 5:3) Ndo nto, lam’akanyiyaso nshi yayaye yamombɛ Nzambi anto tshɛ, ngande wokokiso tshika aha la pemba mbewola anto, onyaso, la ngandji na? (2 Tim. 4:2; Jak. 2:8) Naka sho kotsha kɛnɛ kahombaso mbasalɛ la kɔlamelo tshɛ, kete tayowafudiɛ diɛsɛ dia vɔ mbetawɔ losango l’oma le Nzambi lasha panda, ndo hawotanguna ɔnɛ ndoko lakawaewola.—Ezek. 5:13.
4 Ndo nto, akɔna eya kana amɔtshi mbeyaka kadimola etema awɔ na? Ondo kana l’ɔkɔkɔ w’otshikitanelo ɔmɔtshi wa lɔsɛnɔ lawɔ, mpokoso kɛmɔtshi lo nkumbo kawɔ kana awui wa l’andja mbawasha tokanyi efula lo dikambo dia nshi yawɔ yayaye. Ko kana, lushi lokototshɔ lawakawɔ mbayototowatɛ dui dimɔtshi diayowasokoya dia vɔ mbetawɔ losango laso. (Und. 9:11; 1 Kor. 7:31) Awui wa monônɔ wa ngelo nto wekɔ. Sho kokaka tɛna anto weke ka ndja l’etenyi kaso ka ngelo wayetawɔ lokumu l’ɔlɔlɔ, ko kana ɛlɔngɔ w’apami l’eseka w’amato wôyadjasɛ vâmɛ ndo wayambola dia oyango wa lɔsɛnɔ lawɔ.
5 Onde tayotetemala? Eelo! Afundelo tɛnyaka ɛkɔkɔ wahombaso ntshɔ dia tenda anto. L’ekomelo, lam’ayoshila olimu w’esambishelo, Jehowa ayotɔtshɔkɔla nɛ dia takadje weolo l’olimu ndo ayɔtshɔkɔla wanɛ waketawɔ lokumu l’ɔlɔlɔ la Diolelo oma lo lowando laki lawɔ.—1 Tim. 4:16.